Jonashi 3 - JONASHI

Ikantatigaiganakara Ninivekunirira

¹ Impo yogari Tasorintsi iniairi aikiro Jonashi, ikantiri:

² «Maika, piate anta apatotara pankotsi paitacharira Ninive pinkamantaigakerira nokantakempirira.»

³ Impo yogari Jonashi itsatagakero ikantakeririra Tasorintsi iatanake Niniveku, antari Niniveku otovaigavagetityo pankotsi kara, antari ontsotenkenkanira magatiro onti okogakotaka anuitakenkanira mavati kutagiteri.

⁴ Yogari Jonashi iatake yanuitanakera kara apatotakara pankotsi patiro kutagiteri, ikenkitsatanakera imaraenkarikatyo kara ikanti: «¡Agapaakempara 40 kutagiteri ogari Ninive ompogereakenkani!»

⁵ Impo yogaegiri timaigatsirira Niniveku, visaenkavageigatsirira intiegiri terira impaitumaigempa ikematsaigakeri Tasorintsi. Impo ovashi ikantakagantakero impitashiigakemparora kogapage gara isekatumaiga, aikiro irogaguiganakemparora manchakintsi tontaporokiri iokotagantaiganakempara arisano ikenkisureavageiganaka.

⁶ Antari ikemavakera koveenkari Ninivekunirira, ovashi imatanaka irirori ikaviritanaka ipirinitira, isapokanakarora imanchaki mechomagori ikoveenkatantarira, irorokya yogagutanaka manchakintsi tontaporokiri iatakera ipirinitakera kipatsiseku.

⁷ Impo, yogari koveenkari intiegiri inanpinaegi ikamantakagantaigakeri maganiro timaigatsirira Niniveku ikantaigakerira intsatagaigakerora oka: «Gara tyani sekatumataacha. Ario inkañoigake aikiro piratsipage, vaka intiri ovisha gara ipagaani iseka, ontiri imire.

⁸ Maganirosanotyo, irogagugakempa manchakintsi tontaporokiri iokotagantaigakempara arisano ikenkisureaiganaka, aikiro iriniaigakerira Tasorintsi inkaemageigamataketyo kara. Irapakuaiganakerora magatiro yovetsikageigirira terira onkametite, ganigera yogantavageigai aikiro ganigera ikisantavageigai;

⁹ inkañoigakerorika maika ariorika irapitsimareanaempa Tasorintsi ovashi inkantatigaero ikantavetakarira impogereaigakaemera ariokya intsarogakagaiganajae ganiri yogamagaigai.»

¹⁰ Impo yogari Tasorintsi ineaigakerira ikantatigaiganakara yapakuaiganakerora yovetsikageigirira terira onkametite, ovashi yapitsimareanaa tera impogereaigakerimera.