Jonashi 2 - JONASHI

Jonashi iniakerira Tasorintsi

¹ Antari inakera Jonashi isegutoku kañovetakaririra omani, ovashi inianakeri Tasorintsi shintaririra,

² ikanti: «Antari nokenkisureavagetanakara noniakempi viro, Notinkami, impo viro pikemakena. Antari noneavakara panikyara nonkamanake nosaviatakovagetanakera nonianakempi, viro pikemakena ovashi pitsarogakagaana.

³ Pokaavagetakena saviaku otsonpogiatira omaraane nia, noshintsiatakovagetanaketyo kara. Ogari omarapageni ovore apamankakovagetanakenatyo kara virotari kogankitsi onkañotakempara maika.

⁴ Naro noneaka onti pokavagetakena parikoti tera nonae viroku; impo nosuretanaka nokanti garorokari noneimatairo pivanko.

⁵ Ogari nia apamankovagetakenatyo magatiro; nonavagetaketyo saviaku; ogari mankosepage avuagetanakenatyo nogitoku.

⁶ Notsitigavagetanaketyo kara saviaku notsatavagetaketyo onakera kipatsi; ¡Noneakatyo oganirikatyo nokañotanakari yashitakotaganirira, garatyo nokonteatumatai! Kantankicha viro, Notinkami, notasorintsite, pitsarogakagakena ovashi pogavisaakotaana tera nonkame.

⁷ Antari noneavakara tenige noshintsitae, vintityo nosuretanaka, Notinkami, impo nonianakempi viro pikemakena anta pivankoku.

⁸ Yogaegiri ventaigaririra pashini itasorintsiegite kogapage garatyo ikantumaigimpi ishineventumaigimpi viro;

⁹ kantankicha naro, noshineventavagetakempityo kara, aikiro nontagakempi piratsi, nontsatagakero maika nokantakempirira. ¡Panirotari viro, Notinkami, pagaveakera pogavisaakotantakera!»

¹⁰ Impo yogari Tasorintsi itigankakeri otsapiaku kañovetakaririra omani kameti inkamarankakotaerira Jonashi.