SAMUEL 1 20 - Alkitab Singog In Mongondow Masa In Tanaa

Ki Yonatan notuḷung kon i Daud

¹ Dá noḷaguidon in ki Daud nongkon Nayot kon diug in Rama bo minayá nokipodungkuḷ kon i Yonatan, bo noḻibó, “Onu in taḷáku? Onu degá in moraat inta pinomiaku bo onu in dosaku kon i amámu modapot in sia moniatbí mako moḻimod kon inakó?”

² Tubag i Yonatan, “Dika mosingog kon natua! Podoyon kon i Tuhan, iko in diábí koḻimodan. Ki amáku in umuranbí mopotaau kon inakó in bayongan in tomayánea, pinomayá inta moponting, andeka diá. Dá diábí doman bunionnea kon inakó in makusudnea tatua. Tuamai, onu in siningogmu tatua in diábí totuu!”

³ Ki Daud in notubag, “Kinotaauanbí totok i amámu kon iko in motabibí kon inakó. Dá notantú bidon kon diábí potaaunea kon inimu in soaḷ tatua sinbá diá moajar in ginamu. Naondaka doman, podoyon kon i Tuhan inta nobiag, totuubí kon kobiaganku naa in naonda bo natu kon ḷuntung in tungoi!”

⁴ Bo ki Yonatan in noguman, “Onukabí in poigumonmu yo pomiaankubí.”

⁵ Ki Daud in notubag, “Nanaa, ikoḷom in Rame Buḷan Mobagu, bo sabanarnea akuoi in mongaanbí moyotakin i Tuangku. Táe aka moibog in iko, yo mayá in akuoi bo mogadop kon dogami modapot in toumá doḷom.

⁶ Aka ḻibóon i amámu nongonu sin akuoi in diábí noiangoi, yo pogumandon kon i Tuangku, kon akuoi in nopoigumdon kon inimu kon akuoi in ḷagidon mobui kon Betlehem, sin kon tua in pomiaandon kon upacara kuruban taongan kon bayongan in motoḷuadíku.

⁷ Aka ki datu moguman, ‘Mopiadon,’ dá moaman in akuoi, táe aka ki datu tumorú, dá pokotaaudon kon ki datu in nomontowdon kon tosingogon kon mopobodito kon inakó.

⁸ Akuoi in mokituḷung kon inimu, sin kitada in nomiadon kon dodandian kon tayowon i Tuhan. Tongá aka akuoi in kotaḷá, yo ḻimodon in akuoi, táe dikabí in akuoi ogoimu kon i amámu.”

⁹ Tubag i Yonatan, “Dika moondok! Aka kotaauanku kon notantúdon kon ki amáku in moniatdon totuu kon mopobodito kon inimu, yo notantúbí kon potaauku kon inimu.”

¹⁰ Onda intua ki Daud noḻibó, “Ki ine in mamangoi mopotaau kon inakó aka ki amámu motubag kon inimu poḷat tumorú totok?”

¹¹ “Koḻigaidon in kita mayá in dogami” guman i Yonatan. Dá minayádon noyotakin in taya dua kon dogami.

¹² Bo ki Yonatan in noguman kon i Daud, “Igumon mako ki Tuhan Allah in Israel in mobaḻí sakusi kon i natonda! Ikoḷom doḷo-doḷom andeka toumá degá orasmai ná tanaa, ḷongasionku totaauon onu in kon bonu in gina i amáku. Aka mopia in dodianea kon inimu, yo pokidiaanku in koyow kon inimu.

¹³ Aka sia moniat mopogutú kon inimu, yo notantúbí doman kon potaaukubí doman kon inimu sinbá mokoḷagui in iko. Igumon mako ki Tuhan moḻimod kon inakó aka tua bo diá pomiaanku. Poigumon mako ki Tuhan motuḷung kon inimu ná doman pinototuḷung-Nea kon i amáku koḻipod!

¹⁴ Bo aka akuoi mobiagpa, yo toropdon in dodandian naton kon tayowon i Tuhan bo pokosatiadon kon inakó; táe aka akuoi bo diádon,

¹⁵ yo umurandon poniata in kososatiamu kon buíku. Bo aka ki Tuhan moyopúdon kon bayongan in musungmu,

¹⁶ dikabí bontowon in dodandian kon sigad natonda. Aka modapot in mobontow, yo ki Tuhandon in mohukum kon inimu.”

¹⁷ Dá kon induaneadon in ki Yonatan nopoigum kon i Daud modandi kon monotabibí kon inia, sin sia in motabi kon i Daud ná kotabinea kon awaknea tontaní.

¹⁸ Onda intua nogumandon in ki Yonatan kon inia, “Ikoḷom Rame Buḷan Mobagu. Yo notantúbí kon kotaauandon kon diá in iko, sin ḷoḻitúanmu diá in ḻimitú kon meja pongongaanan;

¹⁹ apapa doman toumá! Tuamai, bayádon kon tampat pogogadopanmu inta koḻipod, bo oḷatdon kon tumimai in guntuḷan batu kon tua.

²⁰ Toumá in akuoi mopopiot in piot toḷu podotá kon batu tatua, naonda bo oyúon in tanaan.

²¹ Bo potabáku in ataku mita mopuyut kon piot mita tatua, bo aka akuoi moguman kon inia, ‘Ei, piot tatua nodiugpabí magí; gamádon,’ tua in mangaḻenea kon iko in moaman bo motaaudon ḷumuai. Akuoi in mongibot podoyon kon i Tuhan inta nobiag kon iko in mosaḷamatbí bo diábí in mokobodito.

²² Tongá aka akuoi moguman kon ataku, ‘Ei piot tatua in noyayúpa mako kon tua,’ tua in mangaḻenea ki Tuhan nopotabá kon inimu mayá; dá bayádon.

²³ Poigumon mako ki Tuhan moḷukad sinbá kita in umuran kumadai kon dodandian natonda tua.”

²⁴ Dá nogadopdon in ki Daud kon dogami. Kon Rame Buḷan Mobagu, ki Datu Saul namangoi kon pinongaanan.

²⁵ Ná biasamai iḻimitú in sia kon diug in dinding; Ki Yonatan in nogamá kon ḷoḻitúan inta noyogintayowannea, ki Abner kon diugmai i Saul, táe diábí in iḻimitú kon ḷoḻitúan i Daud.

²⁶ Táe ki Saul in tongábí kibio-biómai in singgai tua, sin irainea, “Oyúon degá in nobaḻí kon inia, dá sia in diá notusi podudui in agama.”

²⁷ Kon singgai noiduduimai, inta singgai nogindua Buḷan Mobagu, ḷoḻitúan i Daud diápa doman in iḻimitú, bo noḻibódon in ki Saul kon i Yonatan, “Nongonu sin koḷabung bo singgai in naa diábí in ki Daud noiangoi kon pinongaanan noyotakin?”

²⁸ Ki Yonatan in notubag, “Sia ain nopoigum kon inakó sin mayápa in Betlehem.

²⁹ Kainia, ‘Ogoiaipa in akuoi in wakutu mayá, sin motoḷuadíku in yogot morame kon pobogoian kon kuruban kon Betlehem, bo akuoi in pinotabá i guya-guyangku mamangoi. Tuamai, aka ogoimu, dá biódon mako in akuoi mayá mokipodungkuḷ kon utatku mita.’ Manangka intua diá in sia namangoi kon pinongaanan noyotakin naa, Amá.”

³⁰ Nokodongogmai kon tua ki Saul sinumorú totok kon i Yonatan bo noguman kon inia, “Adí haram inta diá dinidik! Kinotaauankudon in tanaa kon iko in nomiḻídon kon i Daud bo nokopooyámaidon kon inimu bo kon inámu!

³¹ Diábí kinotaauanmu degá kon aka ki Daud in mobiagpa yo iko in diábí mobaḻí datu kon butá tanaa? Potabádon in tanaa in intau motayak kon inia bo diaan poangoi in naa, sin mustibí in sia matoi!”

³² Dá tubag i Yonatan, “Nongonu sin mustibí in sia matoi? Onu in dosanea?”

³³ Nokodongogmai kon tua in ki Saul noponakuḷ in pandongnea kon i Yonatan sin moḻimod kon inia. Dá kinotaauandon kon totu-totuu bidon in ki Saul moḷongasi moḻimod kon i Daud.

³⁴ Sinumorú totok in ki Yonatan bo nonaḷámai kon meja pongongaanan bo diá nokaan kon onu bo onu in kon singgai nogindua kon Rame Buḷan Mobagu tatua. Totok in moajar in ginanea moraimai kon i Daud inta ain pinopoompámai i Saul ki amánea tua.

³⁵ Nopoikoḷomai kon singgai ki Yonatan minayá in dogami sin mokipodungkuḷ kon i Daud ná inta ain iyosingog monia noyotakin. Nodia in sia kon adí ḷoḷaki tobatú, atanea,

³⁶ bo noguman kon inia, “Bayádon puyut in piot mita inta popopiotku.” Koyogot in adí tatua noribatuk, ki Yonatan nopopiot in piot tobatú pinoḻimpat kon adí tatua.

³⁷ Naonda in adí tatua nodapot kon tampat inta kinoḷabúan in piot tatua, ki Yonatan nomaḷú kon inia, “Ei, piot tatua in noyayúpabí mako natua!

³⁸ Koḷamemetpa topiḻik, dika tumongaw!” Adí tatua in nopuyut kon piot tatua bodongka nobui kon i tuangnea.

³⁹ Totokbí in diá kinotaauannea onu in makusud in tosingogon mita i Yonatan tatua, tongábí ki Yonatan bo ki Daud in nonotaau kon tua.

⁴⁰ Onda intua ki Yonatan nobogoi in pomomiotnea kon adí tatua bo nopotabá kon inia nobui kon kotá.

⁴¹ Naonda in adí tatua minayá, ki Daud iḻumuai nongkon tumimai in guntuḷan batu tatua, bodongka nosumba kotoḷu. Pinomayá sia andeka ki Yonatan, tumpaḷa nongombaḷ kon dodai in taya dua nongongayokan. Kuyang in gina i Daud in moḷobe-ḷoben nongkon kuyang in gina i Yonatan.

⁴² Onda inta nogumandon in ki Yonatan kon i Daud, “Poigumon mako ki Allah in motuḷung kon inimu. Ki Tuhan in moḷukadbí kon inaton bo buí naton in umuranbí mokadai kon dodandian natonda kon tayowon i Allah.” Nopaḷut mako kon tua minayádon in ki Daud, bo ki Yonatan in nobuidon kon kotá.