PINOGIAPAN 4 - Alkitab Singog In Mongondow Masa In Tanaa

Oaidan intau in Lewi nongkon inanakan i Kehat

¹ Ki Tuhan nopotabá kon i Musa bo kon i Harun

² mogiap kon intau in Lewi nongkon inanakan i Kehat podudui in koluarga monia tontaní,

³ bo momais kon tangoi in bayongan ḷoḷaki inta umur toḷu nopuḷú notaong dapot in ḻima nopuḷú notaong, inta motaaudon mogaid kon Ḷoḷaigan i Tuhan.

⁴ Oaidan monia tua in monoinut bo monompia kon pakakat mita inta totok motusi.

⁵ Ki Tuhan nobogoi in atorang tanaa kon i Musa: Aka wakutuneadon mongokai kon ḷoḷaigan, yo ki Harun bo ki adínea mita in musti tumuot kon Ḷoḷaigan i Tuhan, moḻitod kon toḷipoi inta kon tayowon in Poti Dodandian, bo pongoḷob kon poti tatua.

⁶ Onda intua dugangan monia guntuḷan in kuḻit moaḷus tobatú, bo koḷoban bui in kaeng nobidu tobatú kon tudunea, bo poḷutudandon in tombuḻigan in Poti tatua.

⁷ Mosia in musti mopoaip in kaeng nobidu tobatú kon meja pogogukatan kon roti inta oḷudon kon i Tuhan, bo kon tudu in meja tatua musti ukatan doman monia in pindan moḷoben, baki tampat in dupa, baki tampat in sosumba, bo kendi inta pobonuan kon tubig in anggur inta posumba. Roti oḷudon musti umuran oyúon kon meja tatua.

⁸ Musti daiton monia koḷoban in kuḻit nopuya tobatú, bodongka guntuḷan monia in kaeng moaḷus, bo poḷutudandon in kayu tombuḻigan in meja tatua.

⁹ Mosia in musti mogamá kon kaeng nobidu tobatú bo pongoḷob kon sioḷ in totuduan in togá takin togánea mita, pakakat inta ponondarit kon sumbu in togá bo totumboknea, bo bayongan tampat in ḷana zaitun.

¹⁰ Sioḷ totuduan in togá bo bayongan pakakatnea musti bakuton monia in kuḻit moaḷus bodongka ukaton monia kon tudu in buḻigan.

¹¹ Mopaḷut mako kon tua musti tondaton monia in kaeng nobidu tobatú kon tudu in mezbah inta nongkon buḷawan tatua, bo koḷoban bui in kuḻit moaḷus tobatú, bodongka ḷutudan in kayu tombuḻigan kon mezbah tatua.

¹² Bayongan pakakat inta pinaké kon bonu in Yuang Motusi musti gamáan monia bo bakuton in kaeng nobidu tobatú. Bo musti koḷoban monia in kuḻit moaḷus tobatú, bo ukaton monia kon tudu in pononombuḻigan.

¹³ Musti daritan monia in ḷobud kon mezbah tatua, bodongka songkaan monia kon ḻimonikannea in kaeng nokamumu.

¹⁴ Bo kon tudunea tatua in musti pogukatan monia kon bayongan pakakat inta pakéon kon poibadaan kon mezbah tatua: tampat in tuḷú, porok, leper bo baskom. Bo bayongan tua musti koḷoban monia in kuḻit moaḷus tobatú bo popoḷutudan in kayu tombuḻigannea.

^15-20 Ki Tuhan noguman kon i Musa bo kon i Harun, “Kon dodai in moiko mongokai kon ḷoḷaigan, ki Harun bo ki adínea mita musti tumuot kon bonu in ḷoḷaigan-Ku bo mongoḷob kon bayongan in pakakat bo touḷutnea mita inta kon tua. Bo mopaḷut mako kon tua, intau mita i Kehat motaaudon mamangoi bo mogamá kon tua. Táe mosia in diábí motaau moindoi, dimiug andeka moḻiai kon pakakat mita tatua, sin aindon sinondí kon i-Nakó. Aka aidan doman monia intua, yo matoi in mosia. Dá, bá intau mita in Kehat tatua diá moyopú nongkon sigad in suku Lewi, dá ki Harun bo ki adínea mita in musti monantú kon onu in motaau diaan monia kon batúannea. Tuata in oaidan intau in Kehat kon dodai in Ḷoḷaigan-Ku pampingon. Ki Eleazar, adí i Harun, in kitogi totaau kon bayongan Ḷoḷaigan-Ku, ḷana in togá, dupa, kuruban gandum inta baḻíon kuruban oḷudon, ḷana upacara bo bayongan inta kon bonu in Ḷoḷaigan-Ku tatua.”

Oaidan intau in Lewi nongkon inanakan i Gerson

²¹ Ki Tuhan nopotabá kon i Musa

²² mogiap kon intau in Lewi nongkon inanakan i Gerson podudui in koluarga monia.

²³ Musti paison i Musa in bayongan tangoi in intau mita ḷoḷaki inta umur toḷu nopuḷú modapot in ḻima nopuḷú notaong inta motaaudon mogaid kon Ḷoḷaigan i Tuhan.

²⁴ Mosia pokiakutan in barang mita tanaa:

²⁵ Kaeng tenda in Ḷoḷaigan tatua takin taḷobnea dotá in bonu bo ḷuai nongkon kuḻit moaḷus, toḷipoi in ngara in Ḷoḷaigan,

²⁶ ḻeag mita bo tontogot mita kon bosínea inta kon ḻibumai in Ḷoḷaigan bo mezbah, toḷipoi ngara in bosínea, bo bayongan pakakat inta pakéon popoguḻitan in barang mita tatua. Mosia in kitogi totaau kon bayongan oaidan tatua inta noyoguput in pakakat mita tatua.

²⁷ Ki Musa bo ki Harun musti umuran moindoi sinbá oaidan inta pinoki aid i Harun bo i adínea mita kon intau mita i Gerson tatua aidan, bo bayongan pakakat inta musti diaan, yo musti diaan.

²⁸ Tuata in oaidan in intau mita i Gerson kon bonu in Ḷoḷaigan; oaidan mita tatua musti aidan monia podudui in totundú i Itamar, adí i Imang Harun.

Oaidan intau in Lewi inta nongkon inanakan i Merari

²⁹ Ki Tuhan nopotabá kon i Musa mogiap kon intau mita in Lewi inta nongkon inanakan i Merari podudui in batúan in koluarga monia.

³⁰ Musti paison i Musa in tangoi in bayongan intau ḷoḷaki inta umur toḷu nopuḷú notaong dapot in ḻima nopuḷú notaong inta motaaudon mogaid kon Ḷoḷaigan i Tuhan.

³¹ Mosia pinoki akutan in tombaḷoi mita in Ḷoḷaigan tatua, balaknea mita, oiginea mita bo datoḷannea.

³² Bo oigi doman mita inta kon ḻibu mita in Ḷoḷaigan takin datoḷannea, patoknea mita bo tontogot mita takin bayongan pakakat inta pakéon poposindogan kon tua. Batúan in intau pokidiaan in pakakat mita inta ain sinantú.

³³ Tuata in aidan in inanakan i Merari; bayongan oaidan monia kon Ḷoḷaigan i Tuhan musti aidan kon bonu in tongganut i Itamar, adí i Imang Harun.

Pinogiapan kon intau mita in Lewi

^34-48 Podudui in parenta i Tuhan, ki Musa, ki Harun bo itoi mita in umat nogiap kon toḷu noinanakan inta noituot kon suku i Lewi, inta ki Kehat, ki Gerson bo ki Merari. Mosia nogiap kon intau mita tatua podudui in batúan koluarga. Pinais monia in tangoi in bayongan intau ḷoḷaki inta umur toḷu nopuḷú notaong dapot in ḻima nopuḷú notaong inta motaaudon mogaid kon oaidan kon Ḷoḷaigan i Tuhan. Naa in kobayong monia:: Inanakan Kobayong intau Kehat 2.750 Gerson 2.630 Merari 3.200 Kobayongnea: 8.580

Inanakan Kobayong intau

⁴⁹ Podudui in parenta i Tuhan kon i Musa, bayongan intau inta ain pinais in tangoi monia musti ogoian in oaidan inta totaauon monia kon batúan podudui kon onu inta pinoki aid kon i monia.