PINOGIAPAN 15 - Alkitab Singog In Mongondow Masa In Tanaa

Atorang pobobogoi kon kuruban

¹ Ki Tuhan nobogoi kon i Musa

² in atorang mita tanaa inta musti aidan in bangusa Israel kon butá inta bain ogoi i Tuhan kon i monia.

³ Pakéon kon kuruban payongon andeka kuruban poguboḻi kon dandi andeka kuruban ibog tontaní andeka kuruban kon porayaan inta biasa, motaaubí in moiko moposumba kon i Tuhan: sapi koḷakian, domba koḷakian, domba andeka bembé. Rongingi in kuruban tatua mokosanang kon gina i Tuhan.

^4-5 Ki ine in moposumba in domba andeka bembé sin baḻíon kuruban payongon kon i Tuhan, yo musti doman modia poyotakinon in batúan in bobiagon tatua in tumongo kilo in topong inta binauian in ḷana zaitun toliter sin pomiaan kuruban inta oḷudon, bo toliter doman in tubig in anggur.

⁶ Aka inta pokuruban tatua bo domba koḷakian tobatú, yo musti posumba doman in doyowa nokilo in topong inta binauian in toḷomboi in liter in ḷana zaitun sin baḻíon kuruban oḷudon,

⁷ bo toliter bo moiḷomboi in tubig in anggur. Rongingi in kuruban tatua mokosanang kon gina i Tuhan.

⁸ Aka inta pokuruban tatua sapi koḷakian tobatú sin baḻíon kuruban inta payongon andeka kuruban poguboḻi kon dandi andeka kuruban pondamean,

⁹ yo musti doman posumba in toḷu noliter in topong inta binauian in ḷana zaitun doyowa noliter sin baḻíon kuruban oḷudon,

¹⁰ bo doyowa doman noliter in anggur. Rongingi in kuruban tatua mokosanang kon gina i Tuhan.

¹¹ Tuata in posumba poyotakinon in batúan in sapi koḷakian, domba koḷakian, domba andeka bembé.

¹² Aka inta pinosumba tatua bo noiḻiu kon bobiagon tobatú, dá sosumba topong, ḷana bo tubig in anggur tua in musti dugangan podudui in paraḷu.

¹³ Tatua in musti aidan in bayongan intau in Israel kon dodai in sia moposumba in kuruban. Rongingi in kuruban tatua mokosanang kon gina i Tuhan.

¹⁴ Intau ango-angoi tobatú inta nogutun kon sigad monimu, pinomayá diápa motantú andeka inta motantúdon, musti dumudui kon bayongan atorang tatua aka moposumba in kuruban kaanon inta ronginginea mokosanang kon gina i Tuhan.

^15-16 Bayongan hukum bo atorang notongkaibí in kon i monimu bo kon intau mita ango-angoi inta nogutun kon sigad monimu, sin moiko bo mosia in notongkaibí kon tayowon i Tuhan. Bo tua in umuranbí pakéon.

¹⁷ Ki Tuhan nobogoi kon i Musa

¹⁸ in atorang mita tanaa inta musti aidan in bangusa Israel kon butá inta bain ogoi i Tuhan kon i monia.

¹⁹ Aka moiko momangkoidon mokaan kon bungai in boyómu kon butá tatua, dá moiko in musti mopotondí in tongosilai sin baḻíon sosumba tongá kon i Tuhan.

²⁰ Aka moiko motubá kon roti inta pomiaan nongkon gandum inta muna iratab, yo roti tatua musti poposumba mobaḻí kuruban inta sinondí kon i Tuhan. Moposumba intua in naonda bo moposumba in gandum dungkuḷ inta giniḻing monimu.

²¹ Roti inta pinomia nongkon gandum inta muna-munamai iratabmu tua mustibí umuran ogoi monimu mobaḻí sosumba inta tondíon kon i Tuhan modapot kon adí bo ompu.

^22-24 Aka moiko bo diábí sinumuod in nonaḷámai kon atorang tobatú inta kon sigad in atorang mita inta inogoi i Tuhan kon i Musa, pinangkoi kon singgai ki Tuhan nobogoi in atorang tatua nodapot kon buí inta moiduduimai, bo inta noitaḷá tatua inaidan popisí in umat diá nonotaau kon atorang, dá bayongan in umat musti moposumba in sapi koḷakian tobatú sin baḻíon kuruban payongon. Poyotakinon intua musti poposumba in kuruban oḷudon bo tubig in anggur ná inta ain sinantú. Rongingi in kuruban tatua mokosanang kon gina i Tuhan. Koḻikud intua musti doman popokuruban doman in domba koḷakian tobatú sin baḻíon kuruban potobut kon dosa.

²⁵ Bo imang musti mogaid kon upacara potobutan kon dosa in umat. Dá ampungan in taḷá monia inta diá sinuod inaidan monia, bo popisí in mosia ain nodia kon kuruban potobut kon dosa bo kuruban payongon kon i Tuhan.

²⁶ Bayongan intau in Israel bo intau ango-angoi inta nogutun kon sigad monia ampungandon, sin mosia ain noiḷaut noitaḷá takin diá sinumuod.

²⁷ Aka tongá tobatú in dinosa takin diá sinumuod, dá sia in musti mopokuruban in bembé kobaayan tobatú inta umurdon totaong sin baḻíon kuruban potobut kon dosa.

²⁸ Imang musti momia kon upacara potobutan kon dosa kon tayowon i Tuhan, sinbá intau tatua ampungan in dosanea.

²⁹ Atorang tatua moipakébí kon i inekabí inta diá sinumuod nomia kon dosa, pinomayá sia tua intau in Israel andeka intau ango-angoi inta nogutun notantú kon sigad monia.

³⁰ Táe aka intau in Israel tobatú andeka intau ango-angoi tobatú sinumuodon nogaid kon dosa, sia ain nopoompámai kon i Tuhan. Intau tatua musti hukumon dapot in matoi,

³¹ sin sia ain noḷawang kon i Tuhan bo sinumontuondon noḷawang kon parenta i Tuhan. Intau tatua minatoi sin popisí in taḷánea tontaní.

Intau inta noḷawang kon atorang singgai in Sabat

³² Kon tungkuḷ in intau Israel kon padang gurun, ḷoḷaki tobatú kinoumaan motayakmai kon kayu pondungú kon singgai in Sabat.

³³ Intau tatua musti diaan kon tayowon i Musa, i Harun bo in bayongan umat,

³⁴ bo sinahangpa popisí in diápa nosilangmai, yo onuon in sia?

³⁵ Ki Tuhan noguman kon i Musa, “Intau tatua in musti hukumon matoi. Sia in musti diaan poḷuai kon pinononḷoḷaigan kon tua bo bayongan umat in musti mogandur in batu kon inia dapot in sia matoi.”

³⁶ Dá bayongan umat modia kon inia poḷuai in ḷoḷaigan bo mogandur in batu kon inia dapot in matoi, ná inta pinarenta i Tuhan.

Atorang kon ḷambe-ḷambé mita

³⁷ Ki Tuhan nopotabá kon i Musa

³⁸ mopotaau kon bangusa Israel, “Pomia kon ḷambe-ḷambé mita kon ubung mita in pakeangmu bo popotogot in tontogot nobidu kon batúan in ḷambe-ḷambé. Tua in musti aidan monimu modapot kon adí bo ompu.

³⁹ Ḷambe-ḷambé mita in nobaḻí tompoingat: Pomuḷoi in moiko mokoontong kon tua, kotoropan monimu in bayongan parenta-Ku bo dumudui. Bo popisí intua diábí in moiko mokoḻiong kon i-Nakó sin dumudui kon ibogmu tontaní.

⁴⁰ Ḷambe-ḷambé mita tatua in moponoropdon kon i monimu kon dumudui kon bayongan parenta-Ku, dá moiko in totu-totuu mobaḻí umat-Ku.

⁴¹ Akuoi in ki Tuhan Allahmu; Akuoi nodia kon i monimu iḻumuai nongkon Mesir sinbá Akuoi mobaḻí ki Allahmu, Akuoi in ki Tuhan.”