LUKAS 5 - Alkitab Singog In Mongondow Masa In Tanaa

Ki Yesus nomiḻí kon murí-Nea inta muna

¹ Kon singgai tobatú ki Yesus sinimindog mako kon pintad in Danow Genesaret. Nobayong intau in namangoi kon i-Nia sin mokidongog kon Habar Mopia nongkon i Allah.

² Kon tua, ki Yesus nokoontong doman kon uangga doyowa. Kitogi uangga tatua in noponagdon nongkon uangga tatua bo koyogot nondaritmai kon landará monia.

³ Ki Yesus in sinumakoi kon uangga tobatú kon tua, sinakoian-Nea tua in uangga i Simon. Pinoki undud-Nea kon i Simon pinoyayú topí kon pintad bo iḻimitú in Sia kon bonu in uangga tatua bo nopoyaput in Habar Mopia kon intau moanto inta kon tua.

⁴ Nopaḷut mako in Sia nobogoi in totundú, Sia in noguman kon i Simon nanaa, “Pobotoy bo bayádon in tampat inta moḻinow bo buká bui in landarámu sin podomok kon toyá.”

⁵ Dá ki Simon in noguman, “Pak Guru, tonggobiidon naa in pinoramujian nami nodomok kon toyá, táe diá tobatúmai in noaḷap nami! Tongá naa bo ki Pak Guru in nopotabá dá duduiankudon. Bayáanku bui bukáan in landará.”

⁶ Naonda in dinuduian monia in onu inta pinoguman i Yesus, dá nokouḻí in mosia kon toyá totok in nobarong, dá aindon mobisí in landará monia tua.

⁷ Mosia in dongkadon nokituḷung kon yobayat monia inta kon uangga ibanea. Dá namangoi in yobayat mita monia tatua bo noduḷu nopobonu in toyá inta noaḷap monia tua kon bonu in uangga doyowa nodapot ain tumaḷom in uangga mita tatua.

⁸ Nokoontongmai kon natua in ki Simon inta dinonoi ki Petrus, sinumungkud in Sia kon tayowonmai i Yesus bo noguman, “Taḷaaidon in akuoi naa Tuhan! Sin akuoi naa intaubí baradosa!”

⁹ Sin ki Simon bo intau mita inta noyotakinnea in nongoherang in nokoontong kon kobarong in toyá inta noaḷap monia tua.

¹⁰ Natua doman in yobayatnea, ki Yakobus bo ki Yohanes inta ki Adí mita i Zebedeus. Dá ki Yesus in noguman kon i Simon, “Dika moondok, sin nongkon tanaa mako, iko in baḻíon-Kudon mololandará kon intau.”

¹¹ Dá ki Simon takin yobayatnea mita in nogugutdon kon uangga tatua pinobayá in toba, onda intua sinaḷaandon monia intua komintan bo dinumudui kon i Yesus.

Ki Yesus nongundam kon tobatú intau inta pinanyaki kuḻit inta mokorongó

¹² Kon singgai doman tobatú, wakutu in ki Yesus minayá in tobatú kotá. Sia noyodungkuḷ in tobatú ḷoḷaki inta pinanyaki kuḻit inta mokorongó. Naonda in sia nokoontong kon i Yesus, sinumungkud in sia kon tayowonmai i Yesus bo noguman, “Pak Guru, aka ki Pak Guru moibog mongundam, yo akuoi naa in mopiabí i Pak Guru!”

¹³ Dá kinadaian i Yesus in intau tatua poḷat noguman, “Akuoi in moibog, kopiadon!” Kon dodaipa doman intua bo nopia in takitnea.

¹⁴ Tongá diá inogoi Yesus in intau tatua moguma-guman mako kon intau ibanea kon onu inta ain inaidan-Nea tua. Táe pinotabá-Nea in intau tatua, “Bayádon in iko kon i imang bo ḻibó poḷat pokitantú kon inia kon iko in totu-totuu bidon nopia. Mopaḷut mako kon tua bayá in iko pobogoi kon kuruban ná inta pinarenta i Musa, sin tua in mobaḻí bukti kon intau mita kon iko in totu-totuu bidon nopia.”

¹⁵ Táe habar soaḷ ki Yesus totokdon noisiar kon ḻipu-ḻipúannea, sahingga in nobayongdon intau in namangoi sin mokidongog kon onu in poguman-Nea bo mokiundam doman kon bayongan takit monia.

¹⁶ Nopaḷut mako kon tua ki Yesus minayá nosambayang kon tampat inta noingongow.

Ki Yesus nongundam kon intau ḻempeng

¹⁷ Kon singgai tobatú, wakutu in ki Yesus koyogot motundúmai, oyúon in tongonumai in intau in Parisi bo mototundú kon agama iḻimitú kon tua mokidongog kon onu in poguman-Nea. Mosia tua in namangoi nongkon Yerusalem bo nongkon kotá mita kon Galilea bo Yudea. Kawasa i Tuhan umuran kotaki-takin-Nea sahingga in Sia mokopia kon intau mita inta notakit.

¹⁸ Kon dodai intua oyúon in intau mita nobuḻig mangoi kon intau ḻempeng inta dongkadon noitosiug mako kon tosiugannea. Mosia noramuji mopotuot in intau tatua kon bonu in baḷoi sinbá motaau popoukat monia in intau ḻempeng tatua kon tayowonmai Yesus.

¹⁹ Táe popisí in intau mobarong totok in kon tua, dá diá kinopotuotan monia in sia. Tuamai in dinia monia in sia pinoponik kon tudu atop in baḷoi. Bodongka iḷokatan monia in atop in baḷoi tatua bo sinuntun monia monag takin in tosiugannea noitongkaná doman kon tayowonmai i Yesus inta kon yua-yuak in intau mobarong tatua.

²⁰ Naonda in ki Yesus nokoontong kon námai tua in pirisaya monia, dá Sia in noguman kon intau tatua, “Utat, taḷámu inampungandon.”

²¹ Mototundú mita kon agama bo intau mita in Parisi nomangkoidon moḻibó kon bonu in gina monia, “Ki inebí intau tanaa sin mobaranibí in moningkuḻe kon i Allah? Eta ki inebí in motaau mongampung kon taḷá koḻikudbí in ki Allah tontaní?”

²² Táe kinotaauan i Yesus in raian monia tatua, tuamai noḻibó in Sia, “Nongonu sin moiko in moraibí kon natua kon bonu in gina monimu?

²³ Onda degá in mogampa-gampang, moguman, ‘Taḷámu aindon inampungan’, andeka moguman, ‘Pobangondon bo bayádon!’?

²⁴ Táe tanaa mako in poniata-Kudon kon i monimu kon ki Adí Intau oyúonbí in kawasa-Nea mongampung kon taḷá kon dunia naa.” Onda intua Sia in noguman kon intau ḻempeng tatua, “Pobangondon, bo buatdon in tosiuganmu, bo pobuidon!”

²⁵ Bango-bangon in intau tatua kon tayowon monia komintan, bo nobingkat kon tosiugannea, bodongka nobui sindaḷan nodayow kon i Allah.

²⁶ Mosia komintan totok in nongoherang bo nodayow kon i Allah. Bo takin porasaan noondok in mosia noguman, “Mokoherang totok in onu inta nobaḻí inta inontong naton singgai in naa!”

Ki Yesus nogoiní kon i Lewi

²⁷ Onda intua ki Yesus iḷumuai bo nokoontong kon intau mononagi kon pajak, tangoinea in ki Lewi, inta ḻimitú mako kon kantornea. Ki Yesus in nogoiní kon inia, “Duduidon kon i-Nakó”.

²⁸ Dá sinimindog in ki Lewi bo nonaḷámai kon bayongan tua bo dinumudui kon i Yesus.

²⁹ Naonda intua ki Lewi nomia kon bobutungan kon baḷoinea sin pinotomuannea kon i Yesus. Kon tua noantó doman in mononagi kon pajak bo intau doman baradosa ibanea nongaan noyotakin monia.

³⁰ Tongonumai degá intau in Parisi bo mototundú mita kon agama noyaat in gina in nokoontongmai kon natua, dá mosia in noḻibó kon murí-Nea mita, “Nongonu in moiko sin nongaanbí noyotakin in mononagi kon pajak bo intau mita inta diá mopia?”

³¹ Dá kain tubag doman i Yesus kon i monia, “Deemanbí intau mosehat in moparaḷu kon dokter; táe intaubí inta notakit.

³² Akuoi naa in mamangoi deemanbí mogoiní kon intau inta norai kon mosia intau mobanar, táe mogoiníbí kon intau mita baradosa sinbá mosia in moibog monaḷámai kon oaid monia inta diá mopia.”

Popopuasa

³³ Intau mita in Parisi noguman doman nanaa kon i Yesus, “Murí i Yohanes bo murí mita intau in Parisi mokakitbí in mopuasa bo mosambayang. Táe murí-Mu mita in umuranbí mongaan bo monginum.”

³⁴ Tubag i Yesus kon i monia, “Degá mokobaḻí in moiko moguman kon undangan mita kon mopuasa kon wakutu in rame pinonikaan. Wakutu in nonikaan ḷoḷaki koyota-yotakinpa monia? Tantú diábí kobaḻí!

³⁵ Tongá oyúonbí in wakutunea kon nonikaan ḷoḷaki tatua gamáan nongkon i monia. Bambí kon dodai in tuata bo mopuasa in mosia.”

³⁶ Nopaḷut mako kon tua, ki Yesus in nongonguman kon poumpamaan tanaa kon i monia, “Diábí in intau inta moduḷampong kon ḷambung nokoyongan takin didit inta berakon nongkon ḷambung mobagu. Sin tantú ḷambung mobagu tatua in moberakbí domandon. Bo didit in ḷambung nobagu tatua in diá bidon moyokaan in ḷambung inta nokoyongandon.

³⁷ Ná doman tua, diábí in intau mogaḻin kon anggur nobagu kon bonu in botutu kuḻit inta nokoyongandon, sin aka natua yo anggur nobagu tatua in mokopopisíbí kon kobotakan in botutu koyongan tatua, dá anggurnea in moibutak bo botutu in mogoguyaat.

³⁸ Aka anggur nobagu yo bonuonbí kon botutu inta mobagu doman.

³⁹ Natua doman, diábí intau in moibog monginum kon anggur nobagu, aka sia nonginumdon muna kon anggur inta ain sinagú noonggot, ‘Sin anggur inta ain sinagú noonggot tuabí in mopira-pira in nanamnea,’ gumannea.”