LUKAS 16 - Alkitab Singog In Mongondow Masa In Tanaa

Poumpamaan bendahara inta diá mojujur

¹ Ki Yesus in nongonguman doman kon poumpamaan tanaa kon murí-Nea mita kai-Nia, “Oyúon in tobatú intau nooyúon. Sia tua in nogamá kon intau nobaḻí bendaharanea mongolamai kon bayongan kapunyaannea. Intau nooyúon tatua in nokouḻí kon lapuran kon intaunea tatua in totokbí in monginibognea mopomaké in doitnea.

² Dá inoiníneadon in bendaharanea tatua bo pinoḻiboan nanaa, ‘Degá totuu in bayongan inta ain dinongogku soaḷ oaidmu? Aka totuu kon natua, yo tanaa mako posarakaidon modait kon inakó in lapuran in bayongan oaidanmu, sin pogogaionkudon in iko.’

³ Bo norai in bendahara tatua kon bonu in ginanea, ‘Onu degá in pomiaan tanaa? Akuoi aindon pinogogai i tuangku. Momasoḷ, diá mokomampu in akuoi; mobaḻí moigum magí-mako kon daḷan, mooyá in akuoi.

⁴ Oyúon in akaḷku; aka pogogaiondon in akuoi nongkon oaidanku tanaa, yo musti kobarongonku in yobayat inta moibog pogutunanku!’

⁵ Bo nodaitnea inoiní in bayongan intau inta koboḻi kon i tuangnea bo pinoḻibóan. Sia in noḻibó kon intau inta muna, ‘Degá tongonu in boḻimu kon i tuangku?’

⁶ Intau tatua noguman, ‘Ḷana zaitun mogatut notampayang.’ Dá bendahara tatua in noguman kon intau tatua, ‘Naa in surat boboḻianmu. Ḻitú bo baḷuiai in surat tanion. Pais ḻima nopuḷú notampayang.’

⁷ Onda intua sia in noḻibó kon intau induanea, ‘Tongonu in boḻimu?’ Intau tatua in noguman, ‘Gandum mogatut nokarong.’ Dá kaín bendahara doman tatua, ‘Naa in surat boboḻianmu. Baḷuiai in surat tanion bo pais waḷu nopuḷú nokarong.’

⁸ Dá pinuji i tuangnea in bendahara inta diá mojujur tatua popisí in mobayong in akaḷnea; sin intau mita inta modunia in mopando-pandoi monompira kon oaidan monia dika in intau mita inta nobiag kon nobayag.”

⁹ Bo ki Yesus in bui noguman, “Indongogai in naa! Pakédon in kapunyaan kon dunia potayakan kon yobayat, sinbá aka kapunyaan tatua bo diádon in mangaḻenea, yo moiko in tantúbí tarimaan kon tampat inta mononoi.

¹⁰ Intau inta motaau pirisayaan pokiaidan in oaidan mointok, yo sia in motaau doman pirisayaan pokiaidan in oaidan moḷoben. Táe intau inta diá motaau pirisayaan pokiaidan in oaidan mointok, yo sia in diá doman motaau pirisayaan pokiaidan in oaidan moḷoben.

¹¹ Dá aka bagupa soaḷ kapunyaan dunia naa bo diádon motaau pirisayaan in moiko, apapa doman kapunyaan inta kon soroga?

¹² Ná doman tua, aka moiko bo diádon motaau pokiḻukadan in kapunyaan intau, yo ki inebí in moibog mobogoi onu inta mobaḻí kapunyaanmu?

¹³ Simpaḷ tobatú in diábí motaau in monontuang kon doyowa. Sin aka natua, tobatú in saturuonnea yo tobatú in kotabinea. Andeka tongábí tobatú in duduiannea, yo tobatú in diábí indongogannea. Natua doman in moiko. Aka moiko bo mopirisayadon kon i Allah yo donaai bidon moibog mokidongog kon onu inta indunia naa.”

Singog mita i Yesus

¹⁴ Onu in siningog i Yesus tatua dinongog in intau mita in Parisi táe tongá kinosingan monia, sin mosia tua in dinoit.

¹⁵ Dá siningog i Yesus in mosia, “Moiko in ontongon ná intau mongobanar, táe kinotaauanbí i Allah in kon bonu in gina monimu. Sin onu inta kinoibog in intau, tuata inta kinodoí i Allah.

¹⁶ Hukum i Musa bo buk in nabi mita umuranpabí pinaké nodapot kon masa i Yohanes Mobobaptis. Bo pinangkoidon nongkon wakutu intua Habar Mopia kon naonda in ki Allah mamangoi momarenta saḷaku datu tantúdon pinotaau. Bo intau mita umuran moramuji totok sinbá mobaḻí umat i Allah.

¹⁷ Mogampa-gampangbí kon koyoyangan in ḷangit bo butá dika in tobatú hurup kon bonu in hukum i Allah in moinggamá.

¹⁸ Pomuḷoi in intau inta mogaat kon i buḷoinea bobay bo bui mobuḷoi kon bobay ibanea, yo sia in nonuaḻing; bo ki ine in motonibuḷoi takin bobay tatua inta ain ginaat i buḷoinea ḷoḷaki, yo sia in nonuaḻingbí doman.”

Intau nooyúon bo ki Lazarus inta bogá

¹⁹ “Oyúon intau nooyúon inta umuran mogiḷambung in ḷambung inta totok in momahaḷ, bo pomuḷoi in singgai sia in umuran mokaan kon kaanon inta mongopia.

²⁰ Kon tayowon baḷoinea pinoḻitúdon mako in tobatú intau inta nobiag nobogá totok, tangoinea in ki Lazarus. Awak i Lazarus naa totok in pinaḻi-paḻímai.

²¹ Lantaran totokdon in ginogoy dá Popuyutdon in sia kon onukadon in moḷabú nongkon meja in intau inta nooyúon tatua. Bo ungkú mita in mamangoi bo modeḻemut kon paḻínea.

²² Diá noonggot kon tua minatoi in intau bogá tatua bo dinia in malaekat mita pinobayá in tampat inta mopia kon diug i Abraham kon soroga. Natua doman in intau inta nooyúon tatua, minatoidon doman bo iḷobong.

²³ Kon dunia in intau minatoi sia mororiga totok. Bo wakutu in sia iḷumangag nongkon tampatnea tatua, inontongnea in ki Abraham, bo ki Lazarus in iḻimitú doman mako kon diugneamai.

²⁴ Dá intau nooyúon tatua in nomaḷú, ‘Amá Abraham! Kotabipa in akuoi naa. Tuḷungaipa potabá in ki Lazarus mopoḷodok in tononuyúnea kon tubig bo mamangoi momuntad kon diláku. Akuoi in totok in mororiga kon bonu in tuḷu tanaa!’

²⁵ Táe ki Abraham in notubag, ‘Uḻe, toropdon adíku: iko aindon nokorasa kon bayongan inta mopira wakutu iko nobiagpa kon dunia, táe ki Lazarus naa in tongábí nokorasa kon bayongan inta diá mopia. Manangka intua tanaa mako sia in mokouḻí kon inta mopia kon naa. Yo iko in mokouḻí kon roriga.

²⁶ Apapa doman kon sigad nami bo inimu oyúondon irang inta diá motaau bayáan. Tua in mangaḻenea sinbá intau inta nongkon naa diá motaau mayá in nion bo intau inta nongkon nion diá motaau mamangoi in naa!’

²⁷ Intau nooyúon tatua in noguman nanaa, ‘Aka natua, dá nanaadon in poigumonku kon i amá: tuḷungaipa bo potabá in ki Lazarus mayá in baḷoi i amáku.

²⁸ Sin taya ḻimapa in ki utatku kon tua. Potabápa in ki Lazarus mayá mobogoi in tompoingat kon i monia sinbá mosia in diá mobaḻí ná akuoi moiukat kon tampat inta mororiga nanaa.’

²⁹ Dá ki Abraham in notubag, ‘Kon i monia tua in oyúondon in buk i Musa bo buk in nabi mita! Pomayádon mako mosia in dumudui kon onu inta ain pinais kon bonu in buk mita tatua!’

³⁰ Táe intau nooyúon tatua in noguman, ‘Diápabí tugat intua, Amá Abraham. Táe aka oyúon in intau minatoi in mobiag bui bo mamangoi kon i monia, yo mogogai bidon in mosia in mogaid kon dosa mita monia.’

³¹ Táe ki Abraham in bui doman noguman kon inia nanaa, ‘Aka mosia tua bo diá mokidongog kon onu inta pinoguman i Musa bo i nabi mita, yo mangaḻenea mosia tua in diábí doman mopirisaya, umpakabí oyúon intau minatoi in bui mobiag bo mamangoi mobogoi in tompoingat kon i monia.’ ”