ESTER 2 - Alkitab Singog In Mongondow Masa In Tanaa

Ki Ester nobaḻí bokí

¹ Diá noonggot nongkon tua, umpaka ki datu in diádon sinumorú, táe umuranpabí kon bonu in raiannea in aid i Bokí Wasti bontow in tosingogon inta ain pinoḷabú kon inia.

² Manangka intua monononggina mita inta modagin kon i datu in nopoyaput in tosingogon noiduduimai naa, “Maníka bo potayakandon kon mongodeaga inta moḷunat in ki Tuang.

³ Ki Tuang in musti moduídon kon pogawai mita kon bayongan in propinsi in dodatuan tanaa sin motayak kon mongodeaga mita inta mongoḷunat bo diaan monia komintan kon komaḻig in bobay kon Susan naa. Ki Hegai, pojabat inta ain sinantú nobaḻí tongguḷu in tombonu in komaḻig in bobay, in moindoi kon i monia bo monompia kon koḷoḷunat monia.

⁴ Nopaḷut mako kon tua, ki Tuang in mustidon momiḻí kon mongodeaga inta kinoibog totok i Tuang, bo mopobaḻí kon inia bokí nobaḻí toḻiu i Bokí Wasti.” Noibog in ki datu kon tonggina tatua bo inaidannea.

⁵ Kon kotá in Susan tatua oyúon in intau in Yahudi inta tangoinea in ki Mordekhai ki adí i Yeir. Sia in buí i Kis bo i Simei nongkon suku i Benyamin.

⁶ Ki Mordekhai in dinakopdon kon dodai in Yerusalem sinaḷow i Nebukadnezar, datu in Babel. Ki Mordekhai in dinia pinobayá in Babel noyotakin i Yoyakin, datu in Yohuda, bo nobayongpa doman in intau dinakop ibanea.

⁷ Oyúon in ki adí in doyowa mogutatnea bobay, mongodeaga moḷunat bo mopia in pongogawaknea, tangoinea in ki Ester, aka tangoi in Ibrani yo ki Hadasa. Guyanga i Ester naa in minatoidon bo sia in binaḻí i Mordekhai ki adínea bo biniag ná onda bo ki adínea tontaní.

⁸ Naonda in parenta i datu tua pinotaau, nobayong in mongodeaga in sinipun kon Susan bo ki Ester in oyúon doman kon sigad monia tua. Sia in dinia doman kon komaḻig i datu bo pinosarakan kon i Hegai tongguḷu in motoḷuadí in komaḻig in bobay.

⁹ Ki Hegai in noitongau totok in nokoontong kon i Ester bo noibog kon inia. Dá ḷagidon pinakéan in inta mokotaingkat bo inogoian in kaanon inta ain sinantú. Ki Ester in pinamping kon tampat inta totok in mopia kon komaḻig in bobay tatua bo mongodeaga pitu inta totok in mokaḻet kon komaḻig i datu in pinoki bantungan kon inia.

¹⁰ Podudui in tonggina i Mordekhai, dá ki Ester in diábí nopotaau kon intau in Yahudi in sia.

¹¹ Pomuḷoi in singgai ki Mordekhai modondaḷoi kon palas kon tayowon in komaḻig in bobay tatua sin moḻibó kon kaadaan i Ester bo onu in nobaḻí kon inia.

¹² Podudui in atorang, bobay mita in tompiaan kopiraan sinbá modugang motaingkat kon bonu in totaong: onom nobuḷan in pakéan in ḷana baukan in kamania, bo onom nobuḷan moiduduimai in pakéan ḷana baukan in mongo bo mongobondu ibanea. Nopaḷut mako kon tua, kon batúan in mongodeaga mokouḻí kon wakutu mayá kon tayowon i Datu Ahasyweros.

¹³ Kon dodai in mongodeaga tobatú tumayow kon i datu, motaaubí in sia momaké kon onu in koibognea.

¹⁴ Sia in dinia kon komaḻig i datu kon dodai in doḷom, bo nopoikoḷomai kon singgai sia in diaan kon komaḻig ibanea, bo tompiaan i Saasgas, pojabat tobatú inta moindoi kon pahang i datu. Mongodeaga tatua in diá bidon mayá kon tayowon i datu, koḻikudbí in aka moibog in ki datu bo mogoiní kon inia podudui in tangoinea.

¹⁵ Dá noidapotdon kon i Ester in wakutu mayá in tayowon i datu. – Ki Ester in ki adí i Abihail inta ki adí in doyowa mogutat i Mordekhai intau inta nomaḻí kon i Ester ki adínea tontaní; ki Ester in kinosanang in bayongan intau inta mokoontong kon inia. Naonda ain sia minayá kon tayowon i datu, ki Ester in nogiḷambung in ḷambung podudui in topotundú bo tonggina i Hegai, tongguḷu in komaḻig in bobay.

¹⁶ Natuata, kon taong impitunea kon pinomarentaan i Ahasyweros kon buḷan impuḷúnea, inta buḷan Tebet, ki Ester dinia kon tayowon i Datu Ahasyweros kon komaḻig in datu.

¹⁷ Siabí in kinosanang bo kinopia in gina i datu nongkon sigad in mongodeaga mita ibanea. Tuamai in kinotabi totok i datu in sia. Dá pinopoḷutudandon i datu in mahkota in dodatuan in uḷu i Ester bo binaḻí bokí in sia nomaḷui kon i Bokí Wasti.

¹⁸ Nopaḷut mako kon tua, ki datu in nomia kon rame moḷoben sin pohoromatan kon i Ester bo nogoiní kon bayongan in pogawainea bo intaunea mita moḷoben. Sia in nopotaau kon singgai pogogaian kon bayongan in dodatuan bo nosilai-silai mako kon tombuinag inta mobayong totok.

Ki Mordekhai noposaḷamat in kobiagan i datu

¹⁹ Kon dodai intua ki Mordekhai in dinuídon i datu nobaḻí pogawainea.

²⁰ Ki Ester in diápabí doman nopotaau kon sia in intau in Yahudi, sin diá ogoi i Mordekhai potaaunea. Ki Ester in dinumuduibí kon tonggina i Mordekhai ná kon dodaipa in sia nointokpa bo biniag in ki adí in doyowa mogutatnea tatua.

²¹ Kon singgai tobatú, kon tungkuḷ in ki Mordekhai mopobayámai in oaidannea kon komaḻig, intau doyowa pojabat i datu, ki Bigtan bo ki Teres, in noyopopog moibog moḻimod kon i Datu Ahasyweros, sin totok in moyaat in gina monia kon inia.

²² Tomayá tatua in kinotaauan i Mordekhai bo ḷaginea pinotaau kon i Ester. Bo bayá-bayá domandon inouman i Ester kon i datu onu inta pinotaau i Mordekhai tua.

²³ Pelekara tatua in sinarididon, dá noniata magí kon totuubí intua. Intau doyowa tatua ihukum ginantong. Podudui in parenta i datu, onu inta nobaḻí tatua pinais kon bonu in buk ouman in dodatuan.