DATU MITA IMITÁNEA 21 - Alkitab Singog In Mongondow Masa In Tanaa

Gobá in anggur i Nabot

¹ Kon diug in komaḻig i Ahab kon Yizreel oyúon in gobá in anggur totampat inta ki Nabot in kitogi.

² Kon singgai tobatú ki Ahab in noguman kon i Nabot, “Ogoidon kon inakó in gobá in anggurmu tatua, sin gobámu tatua in nodiug kon komaḻigku. Moibog in akuoi momuḷa kon kuyat mita kon tua. Bain toḻiuanku in gobá in anggur inta mopia-pia nongkon tua, andeka aka moibog in iko, yo taḷuionkudon podudui kon boḻinea inta mopia.”

³ Ki Nabot in notubag, “Gobá in anggur tanaa in budelbí in mogoguyangku. Podoyon kon i Allah, diábí motaauku ogoi kon i Tuang!”

⁴ Takin norobonoḷ in gina bo torú sin nokodongog kon onu inta siningog i Nabot kon inia, ki Ahab nobui bo inumuḻid kon tosiugannea poḷat sinumongkob bo doí nongaan.

⁵ Ki Izebel ki buḷoinea in minayá kon inia bo noḻibó, “Nongonu sin morobonoḷbí in ginamu? Nongonu sin doíbí mongaan?”

⁶ Ki Ahab in notubag, “Diábí mosanang in ginaku kon i Nabot. Inigumku sinbá potaḷuineadon kon inakó in gobá in anggurnea, andeka toḻiuandon in gobá in anggur ibanea, aka tua in koibognea, táe doíbí in sia!”

⁷ “Iko nion in datu kon Israel!” tubag i Izebel. “Pobangondon bo pongaandon in tanaa. Kosanangdon in ginamu, sin ogoikubí in gobá in anggur i Nabot tatua kon inimu!”

⁸ Dá ki Izebel in nomais kon surat pinodoyon kon tangoi i Ahab bo cinapan in cap i datu. Surat tatua in pinoki atodnea kon itoi mita bo intau mita inta duduianmai kon ḻipú in Yizreel.

⁹ Naa in bonu in surat tatua, “Pobaḷúdon kon bá mopuasapa in rayat bo pokiposipunaidon in mosia! Kon pinoyodungkuḷan tatua ogoiaidon in ki Nabot in ḷoḻitúan in intau moḷoben.

¹⁰ Potabádon in intau moraat doyowa ḻimitú tumayow kon inia bo ponapud kon sia in nogodi-godimaidon kon i Allah bo kon i datu. Bodongka diá in sia poḷuai in kotá, bo andur in batu dapot in matoi!”

¹¹ Parenta i Izebel tatua inaidan in itoi mita bo intau mita inta duduianmai kon bonu in butá in Yizreel.

¹² Mosia in nopobaḷú sinbá rayat in mopuasa. Onda intua nopotabá in mosia kon intau mita noyosipun bo ki Nabot in pinoki ḻitúan kon ḷoḻitúan in intau moḷoben.

¹³ Intau moraat doyowa iḻimitú noyogintayow i Nabot, bo kon tayowon in intau mobayong noponapud in mosia in tosingogon kon sia in nogodi-godimaidon kon i Allah bo kon i datu. Tuamai in sia dinia pinoḷuai in kotá bo inarab in batu nodapot in minatoi.

¹⁴ Habar pinoḻimodan kon i Nabot pinotaaudon kon Izebel.

¹⁵ Naonda in ki Izebel nokouḻí kon habar tatua nogumandon in sia kon i Ahab, “Ki Nabot in minatoidon. Yo bayádon gamá in gobá in anggur inta diá potaḷuinea tua kon inimu.”

¹⁶ Ḷagidon minayá in ki Ahab bo nogamá kon gobá in anggur tatua nobaḻí gobánea.

¹⁷ Bo ki Tuhan in noguman kon i Elia, nabi nongkon Tisbe tatua,

¹⁸ “Ki Ahab, datu in Samaria tua tanaa in kon gobá in anggur i Nabot sin mogamá kon gobá tatua baḻíon gobánea. Dá bayádon intua,

¹⁹ bo potaaudon kon inia kon Akuoi, ki Tuhan, in noguman nanaa, ‘Ain noḻimod, mogagowpa doman! Tuamai in dugúmu in diláan in ungkú kon tampat in pinodilaan in ungkú mita kon dugú i Nabot!’ ”

²⁰ Naonda in ki Ahab nokoontong kon i Elia, sia in noguman, “Ei musung, imbuitnea nouḻímudon in akuoi!” “Totuu,” tubag i Elia. “Sin ki Tuang in takin ḻimbatú in gina nogaid kon inta moraat kon tayowon i Tuhan,

²¹ dá naa in pinoguman i Tuhan kon i Tuang, ‘Akuoi in mopoangoibí in bodito kon inimu. Iko in pogambat-Kudon bo bayongan in intau ḷoḷaki kon motoḷuadímu, noguyang andeka mobagupa, in yopúon-Kubí.

²² Motoḷuadímu in mobaḻíbí naonda bo motoḷuadí i Datu Yerobeam adí i Nebat bo naonda bo motoḷuadí i Datu Baesa adí Ahia, sin iko in nokopopisídon kon intau in Israel nomia kon dosa dá nokopomukádon kon torú-Ku.’

²³ Bo kon i Izebel, ki Tuhan in noguman kon awaknea in kaanonbí in ungkú kon bonu in kotá in Yizreel.

²⁴ Ki inekabí in nongkon motoḷuadímu in matoi kon kotá yo kaanonbí in ungkú, bo inta matoi kon ḷuai in kotá in kaanonbí in ḷagapan.”

²⁵ Diábí kon dodai in onda in intau inta takin ḻimbatú in gina mogaid kon inta moraat kon tayowon i Tuhan ná inta pinomia i Ahab. Bayongan in aid moraat tatua in inaidannea sin umuran tundúdanmai i Izebel ki buḷoinea.

²⁶ Ki Ahab nogaid kon dosa mita inta totok in mokooyá: Nosumba in sia kon berhala ná inta pinomia in intau in Amori, intau mita inta ain pinoguntun i Tuhan iḻumuai nongkon butá in Kanaan kon dodai in intau in Israel tumuotdon kon butá tatua.

²⁷ Naonda in ki Elia nopaḷut nosingog, ki Ahab nomerak kon ḷambungnea bo nomaké in sosapi nobaḻí tomponuot kon nomanasaḷ, bodongka nopuasa. Kon mosiugkabí in sia yo momakébí doman in sia in sosapi, bo aka mayá, pogotnea in umurandon molamurú.

²⁸ Ki Tuhan in noguman kon i Nabi Elia,

²⁹ “Inontongmudon degá in ki Ahab nopoompá in dodia kon tayowon-Ku? Tuamai, diá-Kubí popoangoi in bodito kon bonu in sia mobiagpa. Bain kon dodai in ki adínea bo popoangoian-Ku in bodito tatua kon motoḷuadínea.”