DANIEL 6 - Alkitab Singog In Mongondow Masa In Tanaa

Ki Daniel binonu kon bubú in singa

¹ Naonda in ki Belsyazar kinoḻimodan, ki Darius intau in Media nogagow kon dodatuan. Kon dodai intua sia umurdon onom nopuḷú bodoyowá notaong.

² Ki Darius nosilai kon dodatuannea nobaḻí mogatut bo doyowa nopuḷú nopropinsi inta kon batúannea pinarenta in gubernur.

³ Ki Daniel bo intau doyowa ibanea in dinuínea sin moindoi kon oaidan in gubernur mita tatua sinbá ki datu diá porugionmai.

⁴ Bo noniata magí oaidan i Daniel in mopia-pia nongkon pogogaid in gubernur mita bo pongawas mita ibanea. Tuamai in ibogon i datu sia duíon mobaḻí pongawasa kon sinangkub in dodatuan.

⁵ Táe gubernur mita bo pongawas mita tatua in moḷongasi motayak kon taḷá mita i Daniel kon bonu in mopobayá in oaidan kon pomarentaan, táe diábí kinouḻían monia, sin ki Daniel in mosatia bo mojujur bo diá nogaid kon inta diá mopia andeka inta noitaḷá onuka.

⁶ Bo mosia in noguman, “Kita in tongábí mokouḻí kon taḷá i Daniel kon soaḷ agamanea.”

⁷ Onda intua minayádon in mosia noyotakin kon tayowon i datu bo noguman, “Oo Tuangku Datu Darius, mobiagdon in ki Tuangku modapot in mononoi!

⁸ Kami komintan in nonompia kon dodatuan i Tuangku, pinomayá pongawas mita, gubernur mita, oḻit mita in gubernur bo pojabat mita inta ain notobatú kon gina kon bá ki Tuangku mopoḷuaidon in surat parenta inta musti duduian totu-totuu. Ki Tuangku in musti momarenta sinbá kon bonu in toḷu nopuḷú nosinggai diábí tobatúmai in intau in ogoi mopoyaput in oigum kon dewa andeka intau, koḻikudbí in kon i Tuangku tontaní. Ki ine in ḻimimpat kon parenta tatua yo pogonag kon bubú in singa.

⁹ Poigumon nami sinbá ki Tuangku in motekeng kon surat parenta tatua sinbá mobaḻí undang-undang in Media bo Persia inta diádon motaau inggamáan bui.”

¹⁰ Dá ki Datu Darius in notekengdon kon surat parenta tatua.

¹¹ Naonda in dinongog i Daniel intua, nobuidon in sia kon baḷoinea. Gopotnea inta kon ḷundukan kon ḻimonik oyúon in jandelanea mita inta noitayow kon Yerusalem. Bo ná biasamai, sia mosambayang kon i Allahnea bo modayow kon i-Nia kotoḷu in tosinggai poḷat tumungkud kon tayowon in jandelanea mita inta binukatan tatua.

¹² Naonda in musung mita i Daniel nokoontong kon inia koyogot in nosambayang kon i Allahnea,

¹³ minayádon in mosia komintan kon i datu sin mopongadu kon i Daniel. Mosia in noguman, “Ki Tuangku in notekengdon kon surat parenta inta moguman kon diápa ogoi in bayongan intau kon bonu in toḷu nopuḷú nosinggai naa in mopoyaput in oigum kon i dewanea andeka kon intau koḻikudbí in kon i Tuangku! Bo noguman doman, kon ki ine in ḻimimpat kon parenta tatua yo pogambatbí kon bubú in singa?” Ki Datu in notubag, “Totuu, bo parenta tatua in nobaḻídon undang-undang in Media bo Persia inta diábí motaau inggamáan bui.”

¹⁴ Bo mosia in noguman kon i datu, “Ki Daniel, intau tobatú inta iḷumbú nongkon Yohuda, diábí nopandungmai kon i Tuangku bo nopoompábímai kon parenta i Tuangku. Sia in nosambayang notompod kotoḷu in tosinggai.”

¹⁵ Nokodongogmai kon tua noajar bo nohawatir in gina i datu, dá notayak in sia kon daya sin moposaḷamat kon i Daniel. Nodapot in ḷoḷabungnea ki datu umuranpa doman moporai-raimai.

¹⁶ Onda intua intau mita tatua bui namangoi kon tayowon i datu bo noguman, “Tuangku, mustibí toropon i Tuangku kon podudui in undang-undang in Media bo Persia, parenta inta ain pinoḷuai i datu in diábí motaau baḷú-baḷuian.”

¹⁷ Dá imbuitnea pinarentaandon i datu sinbá ki Daniel in domokondon bo pogonag kon bubú in singa. Guman i datu kon i Daniel, “Poigumon mako ki Allahmu inta sinumbamu takin satia tua in moposaḷamat kon inimu.”

¹⁸ Nopaḷut mako kon tua batu moḷoben tobatú pinoḻingkop kon bibig in angob tatua, bo ki datu in nocap kon batu tatua nopomaké in cap in dodatuan bo cap in intau mita moḷoben, dá diádon tobatúmai in intau in mokopoḷuat kon i Daniel nongkon singa mita tatua.

¹⁹ Onda intua nobuidon in ki datu kon komaḻig. Sia in doíbí mongaan andeka ḻipoion. Bo kinoouput in doḷom tua diábí in sia nokosiug.

²⁰ Kon tungkuḷ in modiugpa mobayag nobangondon in ki datu bo iḻimikat minayá in angob in singa.

²¹ Noiyaputmai intua, nokuuk in sia táe takin ḻia-ḻiaw in gina, “Daniel, mogogundoi i Allah inta nobiag! Degá ki Allahmu inta sinumbamu totu-totuu tua in nokoposaḷamatdon kon inimu nongkon singa mita tatua?”

²² Bo kinodongogandon in tubag i Daniel, “Mobiagdon in ki Tuangku modapot in mononoi!

²³ Ki Allah in bobantung ain nopotabá in malaekatnea sin momompon kon bibig in singa mita tatua dá diábí in mosia nopoyagi-yagimai kon bobantung naa. Ki Allah in noposaḷamat kon bobantung sin kinotaauan-Nea kon bobantung naa in diábí nogaid kon noitaḷá kon i-Nia bo kon i Tuangku.”

²⁴ Totok in nopia in gina i datu bo pinarentaneadon sinbá ki Daniel in poḷuaiondon kon angob tatua. Naonda in inaidandon in parenta tatua, noniata magí yo diábí in kekeb topiḻikmai kon i Daniel, sin sia in nopirisaya kon i Allahnea.

²⁵ Onda intua ki datu nomarenta kon intau sinbá modomok kon intau mita inta ain nopongadu kon i Daniel. Bo mosia takin ki adí mita bo ki buḷoi mita monia pinogonag kon bonu in angob in singa tatua. Diápa nodapot in mosia kon apad in angob tatua, singa mita tatua ain nodomok kon i monia poḷat nomutuk kon tuḷan mita monia.

²⁶ Nopaḷut mako kon tua ki Datu Darius nokidia in surat kon intau mita nongkon bayongan in bangusa, inanakan bo bahasa kon sinangkub in dunia, “Salam kobiagan motompia!

²⁷ Pogumankudon kon bayongan in intau inta kon bonu in kawasa in dodatuanku sinbá motoguondok bo mohoromat kon i Allah inta sinumba i Daniel! Sia in ki Allah inta nobiag mononoi, modapot in singgai kopaḷutan in dunia Sia in momarenta. Dodatuan-Nea in diábí moyopú. Kawasa-Nea in diábí modai-dait.

²⁸ Sia in moposaḷamat bo mopoḷuat, mogaid kon mujizat bo inta mokoherang pinomayá kon ḷangit andeka kon butá. Ki Daniel in pinosaḷamat-Neadon, nongkon konuku in singa mita.”

²⁹ Natuatadon bo ki Daniel in umuranbí inogoian in ḷoḻitúan pomarentaan moḷantud kon tungkuḷ in ki Darius bo ki Koresh intau in Persia tatua nomarenta.