Hosea 1 - Hawa Naga Bible 2001

¹ Vruex kuex Yuda hokhvmx htenc rvtueq Uzia, Jotham, Ahaza nuiyc Hezekia hez rueq guimz tueq baunglaung Jehoash saz Jeroboam kuex Israel hokhvmx yaungx tueq nuex Beri saz Hosea muex kuq tueq Yehowa bomjungc rvtueq.

Hosea Taungnyuiuz nuiyc Vsaz hez

² Yehowa rueq Hosea maq raz tueq Israel muex vphaungc jungx tueq nuex, vpiq rueq Hosea muex, “Mnoz rueq miq kuex lvmz kaz kuiuz; mtaungx nyuiuz kuex tvmtuing vguez yaungx tuex, msahez muinz piq kvkhoc jvnc yaungx wuez tuex. Kvrulc rv-ngvlc ngvy miqsaz htenc muinz ngvy kox wawc dung wvnc vtueq tvmtuing vguez shex,” ngoz tueq jungx tueq.

³ Kvkhoc rvtueq Hosea rueq Diblaim saz yalxjuik saz Gomer muingc yaq nyuiuz kuex lvmz tueq. Tsuingnueyc rueq vphaungc miqwaz saz jawx yix maq,

⁴ Yehowa rueq Hosea muex ngoc, “Piq kuex ‘Jezreel,’ ngoz tueq muingc shuiuz, yvmx ruemc lac ngoz ruiux lec mtanc httax muq nuex piq jix vwaz Jehu rueq Jezreel nuex yaq tueq, miq thvy gay khac laung nuex Israel hokhvmx kuex ngaz rueq murx tvgurc shaungx. Ngaz rueq Jehu hokhvmx phvnx vmaq kuex taungsuimc nuex tvkaz shaungx.

⁵ Vkhing httuiuc wvnc ruiux yuq ngaz rueq Jezreel Warc tvnx nuex Israel nolaungx daungx luimc vkawc kuex tvbac gay shaungx,” ngoz tueq jungx phuex.

⁶ Gomer rueq vsaz vnueyc ngoc yaungc lvp tueq. Vruex lauk kuex yalxjuik saz rvtueq. Yehowa rueq Hosea muex, “Piq muingc kuex, ‘Lungwawx muq,’ ngoz tueq muingc shuiuz, yvmx khoc lac ngoz ruiux lec ngaz rueq Israel miqsaz muex lungwawc thuinz kuex taq mauk shex, tsuingshiq muex mvrax dawc kuq shaungx rvmuq.

⁷ Yuq muinz Yuda miqsaz muex kuex lungwawc thuinz tvkhic shaungx. Ngaz, Yehowa tsuingshiq Tishox rueq tsuingshiq kuex palc wvnc shaungx, yuq muinz ngaz rueq ralx lungc nuex yaung, laq, laqsvnz, mvre nuiyc mvre nuex ngaungc jix miq htenc kuex shuimc vtueq tsuingshiq kuex palc wvnc shaungx rvmuq.”

⁸ Gomer rueq vsaz yalxjuik saz muex puix puinc yix maq, piq nuex wvgvnz yaungx yek vtueq miqwaz saz vshiz hulawx lvp yek tueq.

⁹ Yehowa rueq Hosea muex, “Piq kuex ‘Ngvy miqsaz rvmuq,’ ngoz tueq muingc shuiuz, yvmx khoc lac ngoz ruiux lec Israel miqsaz kuex ngvy miqsaz rvmuq, ngaz muinz tsuingshiq Tishox rvmuq,” ngoz tueq jungx tueq.

Israel kuex Yungx Luz Rungwanx Yek tueq

¹⁰ Israel miqsaz kuex svmuktvrax wawc kumtsvy ikhoc vwvlc vhtaz lot miq laz juing paung wvnc tuex. Majuiuc Tishox rueq tsuingshiq muex jungx tueq, “Nuimshiq kuex ngvy miqsaz rvmuq,” yuq muinz kvruex raungnuiyq httuiuc wvnc tuex nuex vpiq rueq tsuingshiq muex jungx shuex, “Nuimshiq kuex vtvraungx httax yaq Tishox suiuz vsaz hez rvtuit!” ngoz tueq ngoz shuex.

¹¹ Yuda miqsaz nuiyc Israel miqsaz htenc kuex vdvmz nuex rvromc yek tuex. Tsuingshiq rueq tsuingshiq tvkoc walaungx vshiz dvyx thvl taq vtueq, tsuingshiq mungtan kuex yungx luz wvnc ruiux rungwanx wvnc tuex. Rvtueq, Jezreel raungnuiyq kuex vyungc vloayc raungnuiyq muex yaungx tuex!