Yaxaya 1 - Vajtswv Txojlus - lus Hmoob Dawb - txhais tshiab xyoo 2004

Lub tebchaws uas muaj txim loj

¹ No yog Yaxaya uas yog Amoj tus tub ua yog toog pom txog Yuda thiab Yeluxalees rau ncua sijhawm uas Uxiya thiab Yauthas thiab Aha thiab Hexekhiya ua vajntxwv kav Yuda tebchaws.

² Lub ntuj 'e, cia li mloog, lub ntiajteb 'e cia li tig ntsej mloog, rau qhov Yawmsaub tau hais lus tias, “Kuv tau tu menyuam thiab pub kom hlob, tiamsis lawv tau fav xeeb rau kuv lawm.

³ Nyuj kuj paub nyuj tus tswv, thiab nees luav kuj paub tus tswv lub dab zaub, tiamsis cov Yixayee tsis paub, kuv haiv neeg tsis nkag siab.”

⁴ Lub tebchaws uas muaj txim 'e, nej yog haiv neeg ris lub txim loj, yog cov neeg phem li noob, yog cov tub ki uas ua kev phem kev qias. Lawv twb tso Yawmsaub tseg, lawv saib tsis taus tus uas Dawb Huv hauv cov Yixayee, lawv tig nrob qaum rau nws lawm.

⁵ Ua cas nej tseem xav raug nplawm ntxiv thiab? Ua cas nej tseem fav xeeb mus li? Nej lub taubhau mob thoob tag, nej lub siab kuj qaug zog tag.

⁶ Txij ntua ntawm xib taws mus thoob plaws saum taubhau, tsis muaj ib qho zoo kiag li tsuas yog dhoog ntsuab tag thiab ua kiav txhab kua paug thiab ntshav txia txev, tsis tau muab tso kua paug tawm thiab tsis qhwv li lossis muab roj pleev kom nqeg.

⁷ Nej lub tebchaws raug muab tso tseg nyob do cuas, nej tej moos kuj raug hluavtaws kub, lwm haiv neeg muab nej lub tebchaws ua puam tsuaj tab meeg nej, thiaj li nyob do cuas yam li raug lwm haiv neeg muab ua piam tag.

⁸ Xi‑oo tus ntxhais kuj raug muab tso tseg ib yam lub tsev pheeb suab hauv lub vaj txiv hmab, thiab yam li lub tsev pheeb suab hauv daim teb dib, zoo li lub moos uas raug muab vij cia.

⁹ Yog Yawmsaub uas muaj hwjchim loj kawg tsis tseg peb ib txhia cia, ces peb kuj yuav zoo ib yam li lub moos Xaudoo thiab zoo li lub moos Kaumaula.

¹⁰ Nej cov uas kav lub moos Xaudoo, cia li mloog Yawmsaub tej lus. Nej cov neeg hauv lub moos Kaumaula, cia li tig ntsej mloog peb tus Vajtswv tej lus qhia.

¹¹ Yawmsaub hais tias, “Tej qhov txhia chaw uas nej xyeem ntau kawg ntawd muaj nuj nqes dabtsi rau kuv? Kuv dhuav tej txiv yaj uas muab ua kevcai hlawv xyeem, thiab tej hlab hluas roj ntawm tej tsiaj uas hwv rog rog lawm. Kuv tsis zoo siab rau tej txiv nyuj li ntshav thiab tej menyuam yaj thiab tej txiv tshis li ntshav.

¹² Thaum nej tuaj rau ntawm kuv xubntiag leejtwg kom nej tsuj mus tsuj los hauv kuv lub tuam tsev li no?

¹³ Tsis txhob coj tej uas tsis muaj qabhau tuaj xyeem dua li lawm, tej hmoov tshuaj tsw qab yog yam uas kuv ntxub kawg. Hnub hli xiab thiab hnub Xanpatau thiab qhov uas nej hu kom tuaj txoos ua ke, mas kuv thev tsis taus tej kev txhaum uas nej tuaj txoos ua ke caiv so ntawd.

¹⁴ Kuv lub siab ntxub tej kevcai hnub hli xiab thiab nej tej kevcai uas teem cia, tej ntawd ua lub nra hnyav rau kuv ris dhuav heev lawm.

¹⁵ Thaum nej tsa tes thov, kuv yuav fee plhu ntawm nej, txawm yog nej yuav thov ntau ntau, kuv yuav tsis mloog. Nej txhais tes lo ntshav tag.

¹⁶ Cia li ntxuav nej lub cev, cia li tu nej lub cev kom huv, cia li rho nej tej kev phem tawm mus dhau kuv lub qhov muag, cia li tseg tsis txhob ua phem,

¹⁷ cia li kawm paub ua zoo, cia li txiav txim ncaj, cia li tso tus uas raug quab yuam dim, cia li tuav cov menyuam ntsuag tsis muaj txiv txojcai, thiab pab tus poj ntsuam hais plaub.”

¹⁸ Yawmsaub hais tias, “Cia li tuaj, peb sib cam txog tej no. Txawm yog nej lub txim liab ploog los yuav dawb li daus xib daus npu, txawm yog liab ploog li ntshav, los yuav dawb li plaub yaj.

¹⁹ Yog nej kam thiab mloog lus, nej yuav tau noj tej yam zoo hauv lub tebchaws.

²⁰ Tiamsis yog nej tsis kam thiab fav xeeb, nej yuav raug hniav ntaj puam tsuaj tag, rau qhov Yawmsaub lub qhov ncauj twb hais cia lawm.”

²¹ Lub nroog uas txeev xib rau Vajtswv ntxeev ua poj muag cev lawm lauj! Nws txeev tu plaub ncaj xwb xwb li. Txojkev ncaj ncees txeev nyob hauv nws, tiamsis nimno tsuas muaj cov uas tua neeg nyob xwb.

²² Koj tej nyiaj ntxeev ua quav nyiaj tag lawm, koj tej cawv txiv hmab xyaw dej lawm.

²³ Koj cov thawj ua cov uas fav xeeb thiab nrog tub sab ua phoojywg lawm. Txhua tus nyiam nyiaj xiab thiab nrhiav nrhw tej uas luag pub. Lawv tsis tuav tej menyuam ntsuag tsis muaj txiv txojcai, thiab lawv tsis txais tej poj ntsuam tshaj plaub hais.

²⁴ Vim li no, tug Tswv uas yog Yawmsaub muaj hwjchim loj kawg, yog Yixayee tus Vajtswv uas loj dua ntais, thiaj hais tias, “Saib maj, kuv yuav nchuav kuv txojkev npau taws rau saum kuv cov yeeb ncuab, thiab ua pauj rau kuv cov tshawj chim.

²⁵ Kuv yuav tig kuv txhais tes tawm tsam koj, thiab kuv yuav muab koj nchuav hauv lub yeej vub kom cov quav nyiaj tawm mus, thiab rho tej uas txuam hauv nej tawm mus.

²⁶ Kuv yuav pub koj muaj cov uas tu plaub zoo li yav thaum ub, thiab pub tus uas ua chaw sablaj zoo yam li qub rau nej. Dhau ntawd mus luag yuav hu koj tias l ub nroog ncaj ncees, thiab lub nroog uas xib rau Vajtswv.”

²⁷ Vajtswv txiav txim ncaj thiaj li txhiv Xi‑oo, thiab nws txojkev ncaj ncee txhiv cov neeg hauv Xi‑oo uas ntxeev dua siab.

²⁸ Tiamsis cov uas fav xeeb thiab cov uas muaj txim yuav raug puam tsuaj huvsi, thiab cov uas tso Yawmsaub tseg yuav raug muab ntxuav pov tseg.

²⁹ “Nej yuav txaj muag rau tsob ntoo xeeb uas nej nyiam ntawd, thiab nej plhu yuav liab rau lub vaj uas nej xaiv cia.

³⁰ Nej yuav zoo yam li tsob ntoo qheb uas nplooj qhuav tag, thiab zoo li lub vaj uas tsis muaj dej.

³¹ Tus uas muaj zog yuav zoo li qhov nyuag ntoo zes taws, thiab nws tej haujlwm zoo li lub nyuag txim taws, ob yam no puavleej yuav kub hnyiab tag huvsi, tsis muaj leejtwg tua tau li.”