Hanpaku 1 - Vajtswv Txojlus - lus Hmoob Dawb - txhais tshiab xyoo 2004

Hanpaku yws tej uas ua tsis ncaj

¹ No yog Vajtswv tej lus uas Hanpaku uas yog xibhwb cev lus pom.

² Au Yawmsaub, kuv yuav quaj thov kev pab ntev li cas, los koj tsis hnov, lossis kuv yuav quaj thov koj hais tias, “Muaj kev limhiam ntais ntuj,” los koj tsis cawm?

³ Ua cas koj yuav cia kuv pom tej uas ua tsis ncaj thiab ntsia ntsoov tej kev ceeblaj? Txojkev puam tsuaj thiab kev ua limhiam ntais ntuj nyob ntawm kuv xubntiag, txojkev sib ceg thiab kev sib cam kuj tshwm tuaj.

⁴ Vim li no txoj kevcai thiaj tsis nruj thiab tsis muaj kev tu plaub ncaj kiag li. Cov neeg limhiam vij cov neeg ncaj ncees cia, thiaj tu plaub tsis ncaj.

Yawmsaub tej lus teb

⁵ “Cia li tsa muag ntsia pom ib tsoom tebchaws, cia li phimhwj thiab xav tsis thoob, rau qhov lub sijhawm uas nej nyob kuv tabtom ua tej uas yog kuv hais ua ntej los nej yuav tsis ntseeg.

⁶ Kuv tabtom tshoov cov Kheedia uas yog haiv neeg nyaum thiab siab kub heev, uas mus thoob lub ntiajteb txeeb kiag tej vaj tse uas tsis yog lawv li.

⁷ Lawv yog cov uas txaus ntshai siab puas tsus, lawv txojcai thiab lawv lub koob meej lawv rhawv lawv xwb.

⁸ Lawv tej nees nrawm dua tsov pom txwv, thiab nyaum dua tej hma uas tawm hmo ntuj. Lawv cov tub rog caij nees dhia huas ntej mus khav ntxhias. Lawv cov tub rog caij nees tuaj deb deb tuaj, lawv ya mus yam nkaus li tus dav qwv tis nkaus los tom.

⁹ Lawv sawvdaws tuaj ua limhiam ntais ntuj, luag ntshai rwg lawv rau ntawm lawv hauv ntej, lawv ntes tau neeg coob cuag li xuab zeb.

¹⁰ Lawv thuam luag tej vajntxwv thiab luag cov thawj kav. Lawv thuam luag txhua lub chaw ruaj khov, lawv tsub av nce txeeb tau tej chaw ntawd.

¹¹ Lawv hla dhau plaws mus yam li cua ntsawj, lawv yog neeg muaj txim, lawv lub hwjchim yog lawv tus timtswv.”

Hanpaku yws zaum ob

¹² Au kuv tus Vajtswv Yawmsaub, yog kuv tus Tswv uas Dawb Huv, koj tsis tau nyob ib txwm los lov? Peb yuav tsis tuag. Au Yawmsaub, koj tsa lawv ua cov txiav txim. Au txhib zeb, koj tsa lawv ua cov uas nplawm qhuab qhia.

¹³ Koj lub qhov muag dawb huv dhau uas yuav saib qhov phem, thiab koj tsis xav saib tej uas ua tsis ncaj. Ua cas koj yuav tsa muag ntsia cov uas fav xeeb, thiab nyob twjywm rau thaum cov neeg limhiam nqos tus uas ncaj ncees dua li lawv?

¹⁴ Koj muab neeg ua zoo li tej ntses hauv hiavtxwv, zoo yam li tej tsiaj nkag hauv av uas tsis muaj tus thawj.

¹⁵ Tus yeeb ncuab xuas nqe lauj nqe lawv txhua tus los, nws xuas tsig cab lawv los, nws xuas vas ntaus lawv los, nws thiaj xyiv fab thiab zoo siab kawg.

¹⁶ Vim li no nws thiaj xyeem qhov txhia chaw rau nws phob tsig, thiab hlawv hmoov xyab rau nws lub vas. Vim nws siv tej no nws thiaj muaj nplua mias thiab noj tej zaub mov uas zoo heev.

¹⁷ Nws tseem yuav nchos cov ntses hauv lub vas mus li, thiab tua ib tsoom tebchaws tsis khuvleej kiag li lov?