Baibulo la pa intaneti

Tĭto 3 - Geba Roman New Testament

Krĭstupho Adègemeelô

¹ Igomohtanibò̄ cè tòcò agā sala ane d́ŏ aŭidè kî dèkhodène tòcò alè̄, sòkhĕńelēthèhô̆ cè tòcò alē, kî ò prahnè ane d́ŏ dèmè awîaè anikhĭ d́ŏ klè gŏ ab́ò̆ abu nu.

² D́ò̆sabò̄ cè tòcò akò tò d́òkè̆d́òô bija dèbwè̆ ńò, ḿî cè tòcò kèb́è òjīòd́wă, mèb́èlò̄thòklè̆ anekî bija gŏ abwè nu.

³ Manè̄ kòd́òdo dō, tapla nu wa thè̆ne wî ḿîgè bija anigudĭ, bija adò sòkhĕńelēthèhô̆ dè ńò kî mèphrògè dè lò. Wa khazôgè wa tha adèthaènisô, dèlô dèmòdèma amŏmoanè̆nè nu. Wè mèlō wo sŏ wè khè̆ d́ŏ dèthèhtèd́òd́è̆, dèthaklathasè̆, dè dè wè̄ dè sè̆ hlè lōwa ńò tòcò nu lò.

⁴ Htô̆ ḿîgè Kib́ĭcè amèhlô̆htage wa adèthakhòwè kî adèb́èlò̄ b́è d́è̆lî̄htagè nu,

⁵ Zè mèhlô̆htage wa lò. Tè b́è d́ŏ wè è̆ kî we ne wè mè dèwî akhoacè̆ ńò, ḿî Zè dèthakhòwèhmòb́è htè amèhlô̆htage wa, kî ŭsab́ă wa d́ŏ Spirito Tcahtĭ abu, Ci ila wa dèòla athè̆ kî dèthôḿô̆ athè̆,

⁶ htè Kib́ĭcè hlòla òèòò wò lò d́ŏ amèhlô̆htage wa Jezŭ Krĭstu,

⁷ cab́ô̆htè wi gī nib́è dèbè̄dî̄bè̄hma d́ŏ Zu hlu Ca tă, kî nib́èbò̄ dèthôḿô̆ lahtŭlablo htè wa sascĭi nu.

⁸ Ajo ḿî dèjî̄b́è adî̄ahma lò. Ja thaèni d́ŏ nè gè̄ bè̄hta na tha lasădè̆è dèwîdèkè̆ ajo cab́ô̆htè bija ab́ugenège Kib́ĭcè tòcò gè̄ bè̄thobè̄tha b́èkjakî dèila ane d́ŏ dèmè awîaè htè akèhlukètă bija gŏ abwè nu.

⁹ Barasă hèkô̆bò̄ dèd́òhlèsahlè hnahnă lōwa, dèbahta dèlarūlazèbrè tòcò htô̆dò̄jwè, dèmèhtîmèbohlè lōwa, dèhtad́ĕd́ò hlè lōwa d́ŏ dèthôdèthò̆ acè̆ nu. Dè gōjo tòcò da wanè da dimĭ ńò.

¹⁰ Bija amèlamulapha dè tòcò nu igomohtanibò̄ cè tapla kî gīpla, Hwă d́ō, sòkhĕńekô be ḿè cè ḿè.

¹¹ Nî thîhè̆ tèpwè bija gōnu tòcò hèkèḿè klè, kî zè dèkhòwè d́è̆lî̄hta cè d́ŏ zî ḿî bija amè dèkèḿè lò.

Dèhtulahmèla Agudulă

¹² B́ĕ jo thodŏle Artemăs ḿî̆dîḿî ńò Tikĭkus d́ŏ ńò ò nu, lehtîplă hmăhmabò̄ jè d́ŏ Nikopolis u nu. Manè̄ jè bè̄la ja tha jò kò̄ ò b́ĕnu dèhòkhè̆ thèd́è̆khè̆ d́o lò.

¹³ B́ĕ nî thî na za nu, mèzobò̄ alô dèhmŭ Zenas kî Apò̆llòs adèledège anikhĭ, kî cakôôkôbò̄ zè dèloba lŏcăcè nu.

¹⁴ Wa bija tòcò b́è mèhlô̆ni agè̄ mèi adèsŏdèkhè̆ d́ŏ dè awîaè, cab́ô̆htè ci ki ila mèzobò̄ dèloba hnèhnè tòcò anikhĭ nu. Cè tòcò tè b́è ò hnahnă ńò.

¹⁵ Bija aòkô ja kă lŏcăcè sŏwîsŏmò b́è nè lò. D́ò̆sabò̄ wò khò̆ aò d́ŏ dèb́udènè abu tòcò htè wo sŏwîsŏmò tèpwè thĭ gŏ abwè nu. Kib́ĭcè adèhludètă kè̄ b́è d́ò̆è thĭ gŏ abwè nu.

« Zam'mbuyo

Ena »

Bible Society of Myanmar

Titsatireni:

Maulalo othandizidwa

Zotsatsa