Baibulo la pa intaneti

Thodŏpho 25 - Geba Roman New Testament

Păulu Tèhta Dèwîdèkè̆ d́ŏ Caĕsarè ò

¹ Fèstus dole zè dèŭi alākhobu ab́ahta thŏthè̆ d́ō, cò ò d́ŏ Caesăria u, za htagè d́ŏ Jerŭsalèm u bu nu.

² Phŭgido kî Jŭdapho akhoane tòcò d́ò̆sagè lōwa htè Păulu adèhmŭdèra ògè amŏamo nu. Za hnanohnabè Fèstus

³ gô̄ thô̆htô cè tòcò d́olĭ kî Păulu nu, kî agē geb́ai Păulu d́ŏ Jerŭsalèm u bu nu. Manè̄ ḿî cè tòcò ò dòlò agò̄ zòô kî mèthĭ lōwa d́ŏ klèlò nu.

⁴ Ḿî Fèstus d́òscĭge cè tòcò htè Păulu kè̄ b́è dôi d́ŏ Caesăria u bu nu kî cè thè̆ne gē geb́aplă tèpwè d́ŏnu nu.

⁵ Cò d́òwe lōwa, “Thĭ è̆ akhoane gā lakô d́ò̆è ja kă d́ŏ Caesăria u nu, kîd́ò̆ ja da pahtîgè bija anu dèbwè adèkèḿè htè thĭ sawè̄ Zò lò nu dimĭ ńò,” cò d́ògè lōwa tòcò do.

⁶ Fèstus òkôwe hwă ca kă athè̆ lwīthô, adogudu ḿî athè̆sci d́ō, ze gelagè d́ŏ Caesăria u kî athè̆ dini ze le sanălăò hwă d́ŏ dècirra ale d́ō, za hna bija lei Păulu d́ŏ cò hlò̆mò̄ nu.

⁷ Păulu pòhta lò, Jŭdapho aò d́ŏ Jerŭsalèm u kî ahtagè tòcò le ò khwè̆b́agè cè kî sawè̄gè zòlò dèkèḿè amŏamo akhahtîkhab́ò̆ tò ò ńò tòcò nu.

⁸ Ḿî Păulu nu zo htohlô̆gè ze ne gōjo, “Jè dè mègè dèkèḿè ahtad́ĕd́ò Jŭdapho Adèhmèla ḿîwî, Zarādo ḿîwî, kî Caĕsarè ḿîwî dimĭ ńò,” cò d́ò do.

⁹ Barasă Fèstus thaè mè Jŭdapho tòcò amūkă d́ō, cò d́ògè Păulu gōjo, “Na tha ò tèpwè agā hta d́ŏ Jerŭsalèm u kî kha dècirra jò hlò̆mò̄ nu ā?” cè d́è̆ lōwa do.

¹⁰ Păulu d́òscĭge cè, “Jò sò̆hto ò d́ŏ Caĕsarè adècirra alle nu akhoacè̆, b́èkî jè kè̄ b́è dècirra d́ŏnu lò. Acab́ô̆ nî thîhè̆ adĕ nu, jè dè mèkèḿègè Jŭdapho dimĭ ńò.

¹¹ B́eḿĕ jè gè̄ mènigè dèkèḿè dimimi d́ō, ja da da tèpwè dèhlô̆hta dèthĭ ńò. Barasă dèsajò jè awîakè̆ kò tò ò ma ńò d́ō, dèilaphlòḿĭ jè d́ŏ cè tòcò acukhòbu nu asè tò ò mè ńò. Ja da dècirra d́ŏ Caĕsarè acukhòbu nu,” cò d́ògè do.

¹² Anu d́ō, Fèstus da dèkŏdèkja d́ŏ cè è̆ akhoane tòcò ò kî d́òge cè, “Nè tèhtagè d́ŏ Caĕsarè aò htŏ. Mègōnu nè b́èle d́ŏ cò ò lò,” cò d́ò lōwa do.

Păulu d́ŏ Agrî̆ppa kî Bĕrnice Ahlò̆mò̄

¹³ Tò òjî̄òkja ńò, Saphra Agrî̆ppa kî Bĕrnice lepôd́ŏhtîgè Fèstus d́ŏ Caesăria u nu.

¹⁴ Cò ògè d́ŏnu aniathè̆ pwĕdimi kî Fèstus d́ò̆sagè lōwa Păulu awîakè̆, cò d́ò, “Fĕlix b́è̆nī bija dèkî̆dî̄ bu ògè dèbwè,

¹⁵ kî b́ĕ jò òwe Jerŭsalèm u akhî nu, Jŭdapho Aphŭgido kî adoabwe tòcò le tèhta dèhmŭ d́ŏ jò ò nu kî dagè zè dèthĭ.

¹⁶ Ḿî jò d́ò̆sa cè tòcò Rŏmapho anuad́ò̆ htè ab́è sajò dèbwè gā da dara hwă asajò cè tòcò ńò athŭtherĕ ki di cirra cè ńò nu.

¹⁷ Mègōnu cè tòcò lakôgè ja kă kî alekă dini lò, je le sańălăògè d́ŏ dècirra alle nu kî mè alekă dini lò, ja hna cè tòcò agē lei bija khŏno dèbwè nu d́ŏ jò ò nu.

¹⁸ Bija asajò cè tòcò wè̄htogè, ḿî cò tò d́òhta dèkèḿè jo gomo tòcò nu dôhmô̆ ńò.

¹⁹ Ḿî za dara lōwa ab́èkja zè dèthub́uthèb́è̆ kî bija ami ḿî Jezŭ, htè athĭgè dèbwè, ḿî Păulu d́ò cò ò thôḿô̆we nu lò.

²⁰ Ji di cirraphame kèhta dèhmŭ ajo ńò d́ō, jè d́è̆tcagè cè htè za gā hta zabò̄ Jerŭsalèm u kî kha dècirra nu ā? nu.

²¹ Ḿî Păulu thaèni Saphrado thè̆ne gī cirra ni cè dèhmŭ ajo nu d́ō, jè hmèlagè cè akò òsô̆wô̄ htô̆ jè thè̆le cè d́ŏ Caĕsarè ò nu.”

²² Agrî̆ppa d́ògè Fèstus, “Ja thaè sòkhĕńe thè̆ne tèpwè bija ajo dèbwè adèhmŭ,” cò d́ò lōwa do. “Mòbĕ dini, sòkhĕńe d́ò̆è cè,” cò d́òscĭgegè lōwa do.

²³ Alekă dini Agrî̆ppa kî Bĕrnice lenīgè dècirra ahid́o bu, ploplo kî mādo kî anedothabwe tòcò nu, kî Fèstus hnagè bija lei Păulu.

²⁴ B́ĕnu Fèstus d́ògè, “Ŏ Saphra Agrî̆ppa kî bija aòkô wa kă b́ĕjo lŏcăcè, thĭ tcahtî tèpwè d́ŏ thĭ hlò̆mò̄ jo bija htè Jŭdapho tòcò dagè jè d́ŏ Jerŭsalèm u kî b́ĕjo jo, thĭ tra bogalāgè htè cò kò tò òb́è bija ńò nu.

²⁵ D́ŏ jè dòkhò̆b́è nu ab́ètha tèpwè jè d́ŏ zè dèkèḿèdo htô̆kî akè b́è thĭ tò ò dimĭ ńò acè̆ nu, barasă za dagè agē le d́ŏ Saphrado ahlò̆mò̄ nu akhoacè̆, jè bè̄la htŏ ja tha agē thè̆le cè.

²⁶ Barasă je de hwe d́ò̆sa za Saphrado zî wî cè kè̆ ladîlase dimĭ ńò. Gōnu akhoacè̆ jo jolekò̆ cè d́ŏ thĭ lŏcăcè ahlò̆mò̄ jo, d́okhlŏ d́ŏ Saphra Agrî̆ppa ahlò̆mò̄ jo cab́ô̆htè d́ŏ dèhtôcadè̆ca aklè̆ jò mò hwe kò òkò̆bò̄ dimimi nu.

²⁷ Jo gomo d́ŏ jè kè tè d́è̆lî̄hta dè amò cirra kò tò ò ma dimĭ ńò ḿî gè thè̆le dèkî̆dî̄pho dèbwè ahtabohtab́ă tò ò ńò acè̆ nu,” cò d́ògè do.

« Zam'mbuyo

Ena »

Bible Society of Myanmar

Titsatireni:

Maulalo othandizidwa

Zotsatsa