Baibulo la pa intaneti

Thodŏpho 24 - Geba Roman New Testament

Dèhmŭdèra d́ŏ Fĕlix Ahlò̆mò̄

¹ Alekă Jè̄thè̆ Phŭgima Ananĭa kî adoabwe tòcò ploplo kî alô dèhmŭ ami ḿî Tèrtŭllus dolegè, kî cè tèhtagè Păulu akho dèhmŭ d́ŏ Mādo Fĕlix ahlò̆mò̄ nu.

² Păulu b́èjogè kî Tèrtŭllus b́ăhtagè dèhmŭ, cò d́ò: “J́ab́è gudu Mādo Fĕlix! Nî ḿî khone adègomojò̄ dèbwè kî nè mènigè wa dècodèmò, dèdohtamuhta d́ŏ wi htĭ we ge adèèdèò̆ anikhĭ òè̆mo akhoacè̆ lò.

³ Dè ajo akhoacè̆ wî thîhè̆htage nè thèjô̆ kî gŏlālā lò.

⁴ Ja da thaè mèlō nè è̆ akhî ńò, ḿî ja dahta nè agò̄ sòkhĕńe laplă we dèdahta tîkî.

⁵ Athĕbwe ḿî bija ajo dèbwè ḿî wi nikhĭ dèwedèkra, ca thakăhta Jŭdapho tòcò akă d́ŏ Lākho thèd́è̆b́è akho kî zî ḿî Nazarè̆thpho tòcò akokhwi.

⁶ Ca thaè mè cîb́î̆còb́ò Zarādo nu d́ō, (wò phò cè cab́ô̆htè agī cirra cè acab́ô̆ wè è̆ anuad́ò̆ adèhmèla ò adĕ nu,

⁷ ḿî klĭbo Lî̆sias ăwū cè wu cukhò bu kî hmèlagè amè Păulu dèhmŭ tòcò gē le d́ŏ ńò hlò̆mò̄ nu.

⁸ Nò gô̄ htôtcad́è̆tca ma cè d́ō,) nî gî̄ thîhè̆ tèpwè wè mè bija ajo dèbwè dèhmŭ ḿî da acè̆ nè nu,” cò d́ò lōwa do.

⁹ Jŭdapho tòcò thô̆htô cè kî d́ògè dèwîdèkè̆ ajo ḿî ab́è lò nu.

Păulu Adèjî̄b́è d́ŏ Mādo Fĕlix ahlò̆mò̄ nu

¹⁰ B́ĕ mādo hna zî jî̄b́è akhè̆ nu, Păulu d́òscĭgegè cè gōjo: “Jî thîhè̆ tèpwè htè nu ŭicai htĭge ajo dege d́ŏ dèdî̄dèhma abu ad́eahlè̆ pwĕdimi hŏ, kî jò d́òhlô̆hta je ne d́ŏ dè thokhŭthakhŭ abu nu.

¹¹ Acab́ô̆ nè kèhtî atherĕ hlĕ ja hta Jerŭsalèm u bu agè̄ thèb́è̆htagè nu, ata b́a scigīthè̆ hnî̆ńò.

¹² Jŭdapho tòcò da pahtî tèpwè ja dara bija d́ŏ Zarādo abu, ja thakăhta bija d́ŏ sinagŏgā abu, kî mèsèsòwò̄hta dè d́ŏ u bu dimĭ ńò.

¹³ Cè tòcò sawè̄ jò lò dèkèḿè anikhĭ thè̆thî tò ògè dimĭ ńò.

¹⁴ Jò d́òphlò̆hta ńò hlò̆mò̄ ḿî dè ajo; jè thèb́è̆gè wi phĭ wu phŭ hlemo tòcò Ab́ĭcè d́ŏ dèlôkômèkô Klè anu tòb́ò̆ htè cè tòcò d́ò ḿî akèḿègè nu. Barasă d́ō, ju b́u lŏcăcè tèpwè htè aò hwela d́ŏ Mŏzè Adèhmèla abu, kî Prò̆fèt tòcò hwela dòlògè ô cè abu tòcò nu nu.

¹⁵ Jò òi tèpwè dèsascĭi Kib́ĭcè htè ajāthô cè ajo tòcò nu, htè bija lŏcăcè, awî wî, akî̆kkè kè, gī nib́è dèhtaboge dèthĭklè̆ nu.

¹⁶ Mègōnu d́ō, ju htukhohtuă òi lŏ tèpwè dèthohlî̆thahlî̆ ajo thèjô̆ d́ŏ Kib́ĭcè kî bija ahlò̆mò̄ nu.

¹⁷ “Jè hèhta hwă Jerŭsalèm u ad́eahlè̆ pwĕdimi d́ō, je legè d́ŏnu kî leigè jò khò̆dî̄khò̆d́ŏ anikhĭ dèmèzo kî ila dèhlu lò.

¹⁸ B́ĕ jò ò Zarādo abu kî mèplî̆mètcă hwă je ne akhî nu, bija aò d́ŏ Asĭa tòcò tcahtîkò̆ jè d́ŏnu kî bija aboahò tò ògè ńò, kîd́ò̆ dèbogalā tò ògè dimĭ ńò ńò.

¹⁹ Jŭdapho htè aò Asĭage tòcò nu, za gā thaè htakhokă jè dimimi d́ō, zò mò le d́ŏ ńò hlò̆mò̄ jo kî zò mò mè jè dèhmŭ lò.

²⁰ Ḿî̆dîḿî ńò bija aò b́ĕjo tòcò mò d́òphlò̆hta jè dèkèḿè, htè cè tòcò tcahtîb́ègè b́ĕ jò sò̆hto òwe acirradè tòcò ahlò̆mò̄ jo nu.

²¹ Jè mègè dimi ḿî b́ĕ jò sò̆hto ò bija tòcò ahlò̆mò̄ nu, jè kèwohta kî d́ò, ‘Thĭ cirra jè khŏdini ḿî ju b́ugè bija athĭ tòcò gē wè̄htoge akhoacè̆ lò.’”

²² Mègōnu d́ō, Fĕlix htè athîhè̆ thuŭthèègè KLÈ ajo awîakè̆ dèbwè nu, sò̆tab́agè dèhtôdèd́è̆ kî cò d́ò, “Jò kò cirrakò̆ thĭ dèwîdèkè̆ b́ĕ Klĭbodo Lĭcios dole nu,” cò d́ògè lōwa do.

²³ Zè hmèla klĭbo atcai Păulu dèbwè nu cab́ô̆htè zô gô̄ dôi thuŭthèè lōwa, ibò̄ lōwa òhlô̆òlabò̄ cè tîkîtòkò̆ kî i zò khò̆ zè khè mèni cè dè aloba tòcò nu.

Păulu d́ŏ Fĕlix kî Drusĭlla Ahlò̆mò̄

²⁴ Munimuthè̆ tò òjî̄ ńò, Fĕlix kî ahmè̆ htè Jŭdamo Drusĭlla legè. Za hna bija jole Păulu d́ŏ cò ò kî sòkhĕńegè lōwa adèd́ò̆sa ab́èkja dèb́u d́ŏ Jezŭ Krĭstu abu awîakè̆.

²⁵ Barasă d́ō, b́ĕ Păulu d́ò̆sagè cè tòcò ab́èkja dè è dè ò̆, dèkŏikhòi ane kî Dècirra Amuni gē ledo awîakè̆ nu, Fĕlix scisăthabogè kî cò d́ò, “Ne ge za htŏ tèpwè. Jè è̆ akhî kò òwe d́ō, jo gō jokò̆ nè tapla be,” cò d́ò lōwa do.

²⁶ Fĕlix sascĭigè Păulu gî̄ icè hô̆ tîkîtòkò̆ d́ō, zo jo jòjòjaja kî dòdò̄htî tèpwè lōwa.

²⁷ Gīd́e pĕhta hwă d́ō, Pòrcius Fèstus htagegè mādo d́ŏ Fĕlix ale, kî ḿî d́ŏ Fĕlix thaèni Jŭdapho tòcò adètcamūkă acè̆ d́ō, zè lè̄lada we Păulu d́ŏ dèkî̆dî̄ abu nu.

« Zam'mbuyo

Ena »

Bible Society of Myanmar

Titsatireni:

Maulalo othandizidwa

Zotsatsa