Baibulo la pa intaneti

Thodŏpho 14 - Geba Roman New Testament

Ikò̆nia u Nib́è Dèthôdèthò̆

¹ Cè tòcò htagè d́ŏ Jŭdapho asinagŏgā abu aò d́ŏ Ikò̆nia u nu, acab́ô̆ zè mègè d́ŏ Antiò̆ka abu nu, cè tòcò b́ènibònigè pwĕ Jŭdapho kî Grĭspho òèòò phî̆htagè ab́udè tòcò nu.

² Barasă Jŭdapho tòcò cò tu b́ugè ńò, ḿî zè mèpjă bwèthŭkupho tòcò adègomo agā htad́ĕd́ò thè̆buthè̆we tòcò nu.

³ Păulu kî Barnăbas òwe tod́odasa, cò d́ò̆htôd́ò̆dèlè khŭthakla Kib́ĭcè anikhĭ; kîd́ò̆ B́ĭcè thô̆htô tèpwè cè tòcò kî Zu hlu Za tă, agè̄ mè dèbòdèba acòklîcòhjè̆ amŏamo nu.

⁴ Bija aò d́ŏ u bu tòcò bēphagè ane gīkò̆lā, athô̆htô Jŭdapho ò tòcò, alewe tòcò ḿî athô̆htô bōhmubicè tòcò nu.

⁵ Òjî̄ tapla bwèthŭkupho kî Jŭdapho tòcò kŏhtakjala jīplogè akhoane tòcò agē mèhtîmèbo kî hwĕ thodŏpho tòcò kî lo.

⁶ B́ĕ thodŏpho tòcò thîhè̆ dè ajo d́ō, cè tòcò cwèle òkhogè d́ŏ Likò̆niage, Lĭstra kî Dè̆rbe u kî d́ŏphă aòb́ôhtîb́ôwa tòcò nu.

⁷ D́ŏnu cè tòcò d́òŭd́ò̆sagè Vanzĕlō.

B́ĕ Lĭstra u

⁸ B́ĕ Lĭstra u nu bija akhakhò ze kî adè khè̆ thî ńò hlĕ aòladēthè̆ nu ògè dèbwè.

⁹ Za sańăla ò kî sòkhĕńegè Păulu d́ò̆htô dè kî Păulu tcahtîgè cè. Păulu tca ladîlase hwă cè, za tcahtîgè lōwa adèb́u agè̄ mèhmage cè nu d́ō, cè kèwohta kî d́ò lōwa,

¹⁰ “Wè̄hto kî sò̆hto òbò̄,” cò d́ò lōwa do kî anu dèbwè khè̆lekhè̆gegè.

¹¹ B́ĕ bija tòcò tcahtî Păulu mè dè ajo d́ō, cè tòcò kèwohta d́ŏ Likò̆nia alē gōjo, “Bija ajo tòcò ḿî B́ĭcè athô̆blôhta ane bija kî alahtî wa tòcò nu,” cò d́ò do.

¹² Zo jogè Barnăbas Zĕus, Păulu ḿî ajî̄b́èi dèbwè nu d́ō, zo jo lōwa Hè̆rmès.

¹³ Zĕus aphŭgi, akjò̆ ò d́ŏ u akhaglèkhlŏ tòcò leigè bophè̆ kî phò̆thagwă d́ŏ khaglè̄htî, ploplo kî bija aboahò cab́ô̆htè cè tòcò gū hluhtai bōhmubicè tòcò anikhĭ nu.

¹⁴ B́ĕ Barnăbas kî Păulu thîhè̆b́è dèphî̆hta gōnu d́ō, zo htohtèlè zi scid́ŏ, cwèle d́ŏ bija aboklè̆ kî haphuhta,

¹⁵ “Athò tòcò, thĭ gomo ḿî thĭ mègè danè̄? Wî ḿî bija acab́ô̆ thĭ lò. We lei thĭ Vanzĕlō agè̄ mèni thĭ agā bāphlòmĭ dèjòdèja ahnahnă tòcò kî agò̄ dohtî Kib́ĭcè ab́òla Mò̄kho, Lākho, pèllè kî dèò abu lŏcăcè dèbwè nu.

¹⁶ Hlĕ akăhtî nu Ci i bija lŏcăcè agē le aklè kî ane lò.

¹⁷ Mè nòthò̆ dō hnò̆nu, Zè dè lè̄ladò̆ thĭ agî̄ thîhè̆ Zè mènigè thĭ nikhĭ tòcò nu ńò. Ci ilani thĭ hwè d́ŏ Mò̄kho nu, Zè mèni thĭ b́uhŭ gè̄ kèhta, Ci i thĭ dèadèò̆ kî Zè mèni thĭ dèmò,” cò d́ò lōwa do.

¹⁸ Cè tòcò d́ò jājā nòthò̆ dèjî̄b́è gōjo hnò̆nu, zè dè mèd́îd́ă kèhta hjŏkakî tèpwè bija aboahò ale hluhtai cè tòcò ńò.

¹⁹ Jŭdapho aò d́ŏ Antiò̆ka aò dŏ Picĭdia kî Ikò̆nia tòcò dole kî thakăhtagè bija bija aboahò tòcò nu. Cè tòcò hwĕ hwă Păulu kî lo, zo gomo ḿî lōwa thĭ htŏ d́ō, zi cwidôhôhta lōwa d́ŏ u akhlŏ nu.

²⁰ Barasă b́ĕ ab́udè tòcò ledo ò khwè̆b́agè cè nu, Păulu wè̄hto kî geb́agè d́ŏ u bu nu. Alekă dini Cè kî Barnăbas legè d́ŏ Dè̆rbe u nu.

Dègeb́a d́ŏ Sĭriage

²¹ Cò d́ò̆htôd́ò̆dèlè hwă dè d́ŏ u anu tu u abu kî mèphî̆hta hwă bija pwĕdimi bōhmubicè d́ō, cè tòcò geb́agè d́ŏ Lĭstra kî Ikò̆nia udo d́ŏ Pisĭdiage, Antiò̆ka u nu.

²² Zè mèthè̆htage hwă ab́udè tòcò atha, ci ikhoiă lōwa akò òhmeòglo dèb́udènè abu. “Wa gā pahtîb́è dèbadèsè̆ pwĕdimi dukhlŭkî we gē lenī Mò̄kho ahtĭage hnî̆ńò nu,” cò d́ò̆sa lōwa tòcò do.

²³ D́ŏ Dèòplo gŏ aplo akho nu ze lè̄htagè adoabwe tòcò, cè thèb́è̆hta kî d́u dèadèò̆ hwă ci ilagè lōwa tòcò B́ĭcè htè cu b́ugè dèbwè acukhòbu nu.

²⁴ Păulu kî Barnăbas lenīkô hwă Pisĭdiage abu d́ō dolegè d́ŏ Pamphĭliage nu.

²⁵ Cò d́òŭd́ò̆sa hwă dè d́ŏ Pèrga u nu d́ō, ze gelagè d́ŏ Attălia u nu,

²⁶ kî d́ŏnu cò d́ògè thè̆bò htô̆do Antiò̆ka u, htè cè b́è thodŏgè kîd́ò̆ Kib́ĭcè adèhludètă akhoacè̆ zè mèpĕhtagè khŏnujo nu.

²⁷ B́ĕ zo doge nu, zo jo ladēplogè Dèòplo kî d́ò̆salagè htè Kib́ĭcè mènigè cè tòcò danè̄ kî b́ăhtanigè bwèthŭkupho tòcò dèb́u akhaglè̄ cadè̄ nu.

²⁸ D́ŏnu cò òkôgè bōhmubicè tòcò akă òjî̄òkja d́o.

« Zam'mbuyo

Ena »

Bible Society of Myanmar

Titsatireni:

Maulalo othandizidwa

Zotsatsa