Baibulo la pa intaneti

Rŏma 16 - Geba Roman New Testament

Dèhnŭsè kî Dèthèb́è̆

¹ Wî ṕîkò̆ Phoĕbe htè Cĕkhrea adèòplo adeăkono nu ji ila cè thĭ cukhò bu agā tcaikhwèi cè.

² D́ŏ wî B́ĭcè ami abu phînibò̄ cè acab́ô̆ atani bija tcahtĭ tòcò nu kî mè pĕhtabò̄ zè dèthaèni tòcò. Za tcaikhwèi òèòògè bija htô̆ dola jè nu.

³ Ju hnŭsè tèpwè Priskĭlla kî Akwĭla, jò khò̆golō d́ŏ Jezŭ Krĭstu abu,

⁴ htè akhathĭ ane ja thathôḿô̆ anikhĭ tòcò nu. Agî̄ thîhè̆htage cè tòcò ḿî tè b́è htĕ jè dèbwè̆ lò ńò, ḿî dèòplo ò bwèthŭkupho adî̄aplè lŏcăcè papa.

⁵ Hnŭsè tèpwè dèòplo d́ŏ aladēplo d́ŏ cè tòcò ahibu nu nu. Jè thè̆le jè dèsŏwîsŏmò d́ŏ jò khò̆golō jè b́èlò̄ Epĕnetus, htè aḿî bija ab́u Krĭstu aŭsugudŭ d́ŏ Asĭage abu dèbwè aò nu.

⁶ Ju hnŭsè tèpwè Marĭa htè amèsòẃèb́è̆tha thĭ nikhĭ dè dèbwè nu.

⁷ Hnŭsè d́ò bōhmubicè Andrŏnikus kî Jŭnia, jò thò kî jò khò̆ htè dèkî̆dî̄pho aphî̆hta ŭsugè jè Krĭstupho tòcò nu.

⁸ Ju hnŭsè d́ò Amplĭatus, jò thò d́ŏ Kib́ĭcè ami abu dèbwè;

⁹ hnŭsè d́ò Urbănus amèplo jè dèmè d́ŏ Krĭstu ami abu, kî jò khò̆golō Stakhis papa.

¹⁰ Hnŭsè d́ò jò thò Apelles htè akhab́ègè Krĭstu anikhĭ pwĕdimi dèbwè, bija gŏ abwè aò Aristò̆bulus ahibu tòcò nu.

¹¹ Jò khò̆d́ŏpho Herŏdion, Narcissus ahibuphăbupho ab́èkja Kib́ĭcè tòcò nu.

¹² Hnŭsèbò̄ Triphè̆na kî Triphò̆za htè amègè B́ĭcè anikhĭ pwĕdimi tòcò nu; jò thò Pèrcis htè amèsô htŏ B́ĭcè anikhĭ dè dèbwè nu.

¹³ Rŭfas, ab́èrô Kib́ĭcè Abwèzo dèbwè nu kî zo mo htè aḿî jo mo dèbwè nu.

¹⁴ Ju hnŭsè tèpwè Asincrĭtus, Phlĕgon, Hè̆rmès, Patrŏbas, Hèrmas kî thè̆buwe aòkô ca kă lŏcăcè;

¹⁵ Philŏlogus, Jŭlia kî Nerĕus kî ci ṕîkò̆, Olĭmpas kî bija tcahtĭ aòkô ca kă lŏcăcè.

¹⁶ Hnŭẃi hlèbò̄ lōwa d́ŏ dèhnŭẃi atcahtĭ abu nu. Krĭstu Adèòplo lŏcăcè hnŭsè le tèpwè thĭ gŏ abwè nu.

Păulu Adèhnŭsè Agudulă

¹⁷ Ja damò thĭ, thè̆buthè̆we tòcò. Woibò̄ thĭ ne d́ŏ agè̄ mè gòthò̆gòrò dè, amèbamèsè̆ thĭ d́ŏ thĭ dèthôdèthò̆ tòcò ò nu. Sòkhĕńebò̄ ze lē.

¹⁸ Bija ajo tòcò tè b́è Jezŭ Krĭstu azôabwè ńò, ḿî zè dè thaèni azôabwè gè̄ mè htèniwĭniwa bija ab́îajū tòcò adègomo d́ŏ jè dèdara aklè̆ nu.

¹⁹ Thĭ dèb́udènè Krĭstu akho nu bija thîhè̆ gŏlālā lò, kî amè thalōthalaigè jè thĭ kho thĭ cè̆. Ja sascĭi thĭ gā za gā bla ab́èkja dè aè kî dèòhlô̆òlakî dèkî̆kkè nu.

²⁰ Tò òjî̄òkja ńò, Kib́ĭcè gò̄ dòprîkò̆ Sătana d́ŏ thĭ khaî̆thalè̄ nu. B́ĭcè Jezŭ Krĭstu adèjīdèd́wă kò òkô d́ò̆è thĭ kă.

²¹ Timò̆theo htè amèplo jè dèmè dèbwè hnŭsè le thĭ, kîd́ò̆ jò khò̆ jè khè Lŭcio, Jăsòn, kî Sosipătèr papa.

²² Jè, Tèrtius htè Skrĭbāpho ajo dèbwè hnŭsè thĭ d́ŏ B́ĭcè ami abu.

²³ Kăjō htè aigetcage jè dèbwè kî dèòplo aladēplo lōwa d́ŏ zi hibu tòcò hnŭsè le thĭ Èrastus htè atcai hô̆mubwe dèbwè hnŭsè le thĭ kî wè thè̆buwe Kuartus ḿî ḿî gōnu lò lò.

²⁴ (B́ĭcè Jezŭ Krĭstu adèhludètă kò òkô thĭ kă gŏ abwè nu.)

Dèhtăhtai

²⁵ Dèdòdèthe kè̄ b́è d́ò̆è Kib́ĭcè! Zî ḿî ai kèhta thĭ agò̄ sò̆hto ò d́ŏ dèb́udènè ahmeaglo abu, acab́ô̆ jò d́ò̆htôd́ò̆dèlè nigè thĭ Jezŭ Krĭstu a Vanzĕlō kî acab́ô̆ dèd́è̆lî̄hta dèòhu aòhugè hlĕ azôakhè̆ pwĕdimi dèdè̆ nu.

²⁶ ḿî khŏnujo, ahlî̆htaphlò̆hta htŏ d́ŏ Prò̆fèt adèd́òthîhè̆ acè kî acab́ô̆ Kib́ĭcè aò lahtŭlablo adèhmèla ò nu, akè b́è d́òŭd́ò̆sa b́èkò̆ bwèthŭkupho tòcò ku b́u kî gò̄ sòkhĕńebò̄ nu.

²⁷ Kib́ĭcè htè aòkî dèzadèbla lŏcăcè nu kè̄ b́è d́ò̆è dèdòdèthe thèjô̆ lahtŭlablo! Amèn.

« Zam'mbuyo

Ena »

Bible Society of Myanmar

Titsatireni:

Maulalo othandizidwa

Zotsatsa