Baibulo la pa intaneti

Mattĕo 2 - Geba Roman New Testament

Saphra Magū

¹ B́ĕ Jezŭ òla d́ŏ Bèthlèhèm U bu, Judĕage, Saphra Èrŏdè azôkhè̆ nu, tcabò̄, bija azaabla, aò dŏ Lumuhta dòkhò̆, dolegè d́ŏ Jerŭsalèm u nu.

² Cò d́ò, “Jŭdapho Asaphra aòlathè̆ dèbwè ògè d́òlè̄? Manè̄ wa tcahtîgè zè sè d́ŏ Lumuhta nu, kî we le ḿî agē le thèb́è̆ Cè wò d́ò do.”

³ Saphra Èrŏdè thîhè̆b́è dè awîakè̆ ajo dō, cò tò òmòòma ńò, kîd́ò̆ Jerŭsalèm thèd́è̆ u ḿîgè acab́ô̆ cè nu.

⁴ Zo jo ladēplo phŭgido tòcò kî skrĭbāpho tòcò, cè d́è̆tca lōwa Krĭstu kò òlab́è d́òlè̄ nu.

⁵ Ḿî cè tòcò d́ò lōwa, “D́ŏ Bèthlèhèm u, Judĕage nu. Manè̄ kòd́òdo dō Prò̆fèt hwelagè gōjo;

⁶ ‘Nè, Bèthlèhèm U, Judĕage, d́ŏ Jŭda Asaphrapho tòcò aklè̆, nî dî ḿî asciphogudu ńò; manè̄ kòd́òdo dō, akhoane ad́è̆lî̄ klè aku ŭib́è ji bija Israè̆l dèbwè nu, gò̄ pòhtakò̆ dŏ ńò ò nu.’”

⁷ B́ĕnu Èrŏdè johuzògè Magū tòcò kî d́è̆tca ladīlasegè lōwa sè apòhtahtî cè dèmè̆ akhîagla.

⁸ Kîd́ò̆ za hna le lōwa tòcò d́ŏ Bèthlèhèm U nu d́ō, cò d́ò, “Le kî htôca d́è̆tca ladîlase abĭsèpho ò d́òlè̄ nu. Thĭ gā pahtî Cè d́ō, ge d́ò̆sabò̄ jè, cab́ô̆htè jè ḿî ḿî je gē le thèb́è̆bò̄ Cè nu.”

⁹ Zî thîhè̆b́è hwă Saphra adèjî̄b́è dō, ze legè cè klè tòcò; kîd́ò̆, tcabò̄, sè htè za tcahtîgè d́ŏ Lumuhta dèmè̆ nu le zò hlò̆mò̄ htô̆ ado kî asò̆hto ògè d́ŏ abĭsèpho ò ale akho nu.

¹⁰ Cè tòcò tcahtî sè dō, za thaganāigè azî̄azô̄ d́o.

¹¹ Kîd́ò̆ ze lenī hibu d́ō, za tcahtî abĭsèpho kî zo Mo Marĭa, zò gò̄la thèb́è̆htagè lōwa. Mèhwă ca b́ăhtagè dèlīdobwîthè̆ akŏ kî zè hluhtaigè lōwa htè̆, hlòba kî mĭrrah.

¹² Dèd́ò̆sa cè dèsòḿĭb́a abu, cab́ô̆htè cè tòcò de geb́a ze lekă d́ŏ Saphra Èrŏdè ńò nu d́ō, ze gekôgè klè alewe tòb́ò̆.

Dèsèphlòḿĭ D́ŏ Izî̆tge Nu

¹³ Magū tòcò ge hwă d́ō, Kib́ĭcè Abwèzo pòhtahtî Zŏzè dèsòḿĭb́a abu, cò d́ò, “Wè̄hto, phî abĭsèpho kî Zo mo kî sèphlòḿĭbò̄ d́ŏ Izî̆tge nu, kî òbò̄ d́ŏnu htô̆ jò d́ò̆sa nè nu. Manè̄ kòd́òdo dō, Èrŏdè gā wāhlèkò̆ abĭsèpho cab́ô̆htè zè gè mèkè̆ mèhlè̆mè̄ lōwa nu.”

¹⁴ Zè wè̄hto phîthă abĭsèpho kî zo mo kî ze le òhuòzò tèpwè d́ŏ Izî̆tge nu,

¹⁵ kîd́ò̆ cò ògè d́ŏ nu htô̆ Èrŏdè thĭ nu. Cab́ô̆htè dèjî̄b́è htè Kib́ĭcè d́ògè Prò̆fèt alòmò bu dôhmô̆ gē pĕhtabò̄ nu, htè ad́ò, “Jo johèhtagè jo pho d́ŏ Izî̆tge bu nu.”

Dèmèthĭ Abĭsèpho Tòcò

¹⁶ B́ĕ Èrŏdè thîhè̆b́è Magū tòcò blagè zo kho d́ō, cè thèhtèsô kîd́ò̆ za hna le mèthĭ lŏ abĭsèpho aò gīd́e kî akălè̄ tòcò d́ŏ Bèthlèhèm U bu kî u azokhozawa tòcò, acab́ô̆ Magū tòcò d́ò̆sa ladîlase cè sè pòhta akhîagla nu.

¹⁷ B́ĕnu, Prò̆fèt Jeremĭah adèd́òdòlò pĕhtagè htè ad́ò,

¹⁸ “Dè alē thègè d́ŏ Ramă U bu hŏtòthò̆hta, dèhaphuhaciri kî dèjodèha azî̄azô̄; Rakĕlè hai aphoali kî za da thaèni bija d́òkhŭd́òmòge cè ńò, manè̄ cè tòcò tò ò be ńò.”

Dègeb́a D́ŏ Nazarè̆th U

¹⁹ Èrŏdè thĭ hwă nu, tcabò̄, Kib́ĭcè Abwèzo dèbwè pòhtahtî Zŏzè dèsòḿĭb́a abu d́ŏ Izî̆tge nu, cò d́ò,

²⁰ “Wè̄hto, phî Abĭsèpho kî Zo mo kîd́ò̆ gebò̄ d́ŏ Israè̆l alākhobu nu. Manè̄ kòd́òdo dō, bija athaè mèthĭ Abĭsèpho tòcò thĭ htŏ.”

²¹ Zŏzè wè̄hto, zî phî Abĭsèpho kî Zo mo kîd́ò̆ ze ge tèpwè d́ŏ Israè̆l Alākhobu nu.

²² Barasă zî thîhè̆b́è kòd́ò̆ Arkhèlòs ŭi ca pa Èrŏdè ale d́ŏ Judĕage nu dō; ze de geb́u ńò. Kîd́ò̆ dèd́ò̆sa cè dèsòḿĭb́a abu dō, ze ge dòkhò̆b́î̆gè d́ŏ Galilĕage dòkhò̆b́è nu.

²³ Kîd́ò̆ zo doge d́ō, ze le ògè d́ŏ u ami ḿî Nazarè̆th tu u nu, acab́ô̆ prò̆fèt tòcò adèd́òdòlò htè, “Bija gō jokò̆ cè Nazarè̆thpho,” gē pĕhtabò̄ nu.

« Zam'mbuyo

Ena »

Bible Society of Myanmar

Titsatireni:

Maulalo othandizidwa

Zotsatsa