Baibulo la pa intaneti

Mărko 8 - Geba Roman New Testament

Jezŭ B́oa Bija Lwīhtò
( Mattĕo 15.32-39 )

¹ B́ĕ muni tòcò nu, bija ladēplo kòd́ò̆ òèòò, cè tòcò anikhĭ dèa tò ògè dimĭ ńò d́ō, Jezŭ jo ladēplo hwă Zo bōhmubicè tòcò kî Cò d́ògè lōwa,

² “Jò khòwè zî̄ bija aboahò. Manè̄, tcabò̄, cò òkô htŏ Ja kă thŏni thŏthè̆, kî dèmò atò ògè dimĭ ńò.

³ B́eḿĕ Ja gā hnage sò̆ ta a ma cè tòcò d́ŏ zi hi za phă d́ō, za gā laphlîda tèpwè klèlò. Manè̄, tòcò cò ḿî ad́ŏaphă òjîòzo.”

⁴ Zo bōhmubicè tòcò d́ògè cè, “D́ŏ hmîlè̄klè̆ acab́ô̆ khŏnujo alle nu, bò̄bwè ki i sô̆ a sô̆ ò̆ cè tòcò toko bwè?”

⁵ Jezŭ d́òge cè tòcò, “Thĭ toko ò bwīkhlo?” Kî cè tòcò d́ò, “Thăthô dokhlo.”

⁶ Mèhwă Za hna sańălăògè bija d́ŏ lākho nu, kî Zi phî hwă toko thăthô dokhlo, Za htăhtai dè ahluată, Cî b́îpha kî igè Zo bōhmubicè tòcò agē be abija.

⁷ Cè tòcò a dāpho ò d́ò̆ tîkî d́ō, Zô hôwî hwă Zè hmèla lōwa tòcò agè b́è̆lă d́ŏ cè tòcò ahlò̆mò̄.

⁸ Bija a sô̆ a hwă Zo bōhmubicè tòcò htuge akholakăsè pĕhta thăthô taṕahlu.

⁹ Bija a ab́è toko nu ògè bija abwè lwīhtò. Alekă za hnagekò̆ lōwa tòcò hi.

¹⁰ Hwă d́ō, taplakhă lò Ze lenīplo hwă Zo bōhmubicè tòcò khlĭ abu, Ze legè d́ŏ Dalmanŭthage bu nu.

Pharizè̆pho tòcò Da Dègèlè
( Mattĕo 16.1-4 )

¹¹ Pharizè̆pho tòcò lehtî Cè kî za daragè lōwa. Za dagè lōwa dègèlè còklî d́ŏ Mò̄kho nu.

¹² Cè thèhògè d́ŏ Ca thabu kî d́ò, “Thĭ ajo durū da ma dègèlè còklî nè? Jò d́ò̆sa thĭ adî̄ahma, dè gè̄ tè d́è̆lî̄ b́èkò̆ bija ajo durū dègèlè acòklî dimĭ ńò.”

¹³ Hwă d́ō, Zè khè̆htanī khlĭbu kî hwădūgè pèllè.

Pharizè̆pho Agimi
( Mattĕo 16.5-12 )

¹⁴ Zo bōhmubicè tòcò sòthô̆bô̄hnè hèigè toko, ḿî akăsè òda d́ŏ khlĭ abu to d́ŏ lò.

¹⁵ Jezŭ htulahmèla cè tòcò, cò d́ò, “sòiwāibò̄ thĭ ne Pharizè̆pho agimi kî Èrŏdè agimi.”

¹⁶ Cè tòcò d́òhlèsahlè lōwa kî d́ò, “Wo toko tò ò ńò akhoacè̆ lò.”

¹⁷ Jezŭ thîhè̆b́è d́o cò d́ò lōwa, “Thĭ toko tò ò ńò akhoacè̆ thĭ dara mă lōwa nè? Thĭ di thîhè̆ kî htî̆nigô̄nigè ńò ā? Thĭ thabu ḿî akhithurŭgè ā?

¹⁸ Thĭ gādŭ ò nòthò̆ thĭ tè kèhtî ńò, thĭ nigu ò nòthò̆ thĭ di thîhè̆ ńò ā? Thĭ do gomohtani be ńò ā?

¹⁹ Jî b́îpha toko jè̄khlo, d́ŏ bija jè̄htò ahlò̆mò̄ nu, thĭ htunige akîńîkôńô bwī ṕahlu?” Cò d́òge lōwa, “Scigīṕahlu.”

²⁰ “Kî b́ĕ jî b́îpha toko thăthô dokhlo, d́ŏ bija lwīhtò ahlò̆mò̄ nu, thĭ htunigè akholakăsè bwī ṕahlu?” Cè tòcò d́ò, “Thăthô taṕahlu.”

²¹ Mègōnu Jezŭ d́òge cè tòcò, “Amèd́ò̆ cadè̄? D́ō thĭ di thîhè̆ ma hnî̆ńò nè?”

Bèthsaĭda Upho Agādŭkhi Dèbwè

²² B́ĕ Jezŭ dole Bèthsaĭda U akhî nu, bija tòcò leigè agādŭkhi dèbwè d́ŏ cò ò kî damò Cè agò̄ tòwè̄ Zò lò.

²³ Cô pôglo hwă agādŭkhi dèbwè acukhò d́ō, hèhtaihŭgè cè d́ŏ d́ŏ akhlŏ nu. Zô htôrôgè lōwa agādŭ kî Cè pèèhtĭ, Zè htèla lōwa akho kî Cè d́è̆tca lōwa za tcahtîbò̄ dè dimimi ā?

²⁴ Za tcahta hwă, cò d́ò, “Ja tcahtî bija mè acab́ô̆ tho nu. Barasă ahèhtahèla.”

²⁵ Zè htèla Zu cukhò lōwa agādŭ kho tapla b́ĕ d́ō, za tcahtîgè dè, za gādŭ hlî̆htagegè d́ō za tcahtî thuŭthèègè dè gŏmimi.

²⁶ Za hnage lōwa hi kî d́ògè lōwa, “Gebò̄ ni hi. Genī thāgò̆ ḿè d́ŏbu ḿè,” Zè hmèlagè lōwa do.

Petru Adèd́òhlî̆hta
( Mattĕo 16.13-20 ; Lŭka 9.18-21 )

²⁷ Mèhwă Jezŭ kî Zo bōhmubicè lenīgè d́ŏphă htè aò Caesăria Philippiăno tòcò abu, d́ŏ klèlò nu, Cè d́è̆gè Zo bōhmubicè tòcò, Cò d́ò, “Bija tòcò d́ògè Jè ḿî bò̄bwè?”

²⁸ Cò d́òscĭge lōwa, cò d́ò, “Zowănnī Baptĭsta.” Alewe tòcò d́ò, “Elĭjah.” Alewe tòcò d́ò ḿî, “Prò̆fèt aklè̆ dèbwèbwè.”

²⁹ Mègonu dō, Cè d́è̆ge lōwa tòcò, “Thĭ d́ò d́ò̆ Jè ḿî bò̄bwè?” Petru d́òscĭge Cè kî cò d́ò lōwa, “Nè ḿî Krĭstu.”

³⁰ Zè hmèla dîgrî̄nî̄ lōwa tòcò cab́ô̆htè akò̄ tòd́òb́î̆sabò̄ bija alewe dèbwè̆ ńò htè Cè ḿî Krĭstu nu.

Jezŭ Dò̆sadòlò Adèthĭ kî Adèhtaboge
( Mattĕo 16.21-28 ; Lŭka 9.22-27 )

³¹ Mèhwă d́ō, Cò d́ò̆sagè lōwa tòcò htè Bija Apho nu Za gā khab́è dèmènomèzî̄ pwĕdimi. Anedothabwe tòcò, Phŭgido tòcò kî Skrĭbāpho tòcò kī ilakè̆ Cè kî mèthĭ Cè, kî thŏthè̆ adābu Za gā htabogekò̆ nu.

³² Cò d́ò̆sa hlî̆htaphlò̆htagè lōwa tòcò. Petru jokè̆ dòbò hwă Cè d́ō, za htadohtaragè.

³³ Barasă Cu d́uphlòḿĭ hwă Zu mūkă d́ŏ lōwa ò d́ō, Ca tcab́a bōhmubicè tòcò ò, kî Zò hò̆gè Petru. Cò d́ò, “Sè dòbò Jè, Sătana! No do gomo dè ab́èkja Kib́ĭcè ńò, ḿî ab́èkja bija lò.”

Krusu Adèthôdèthò̆

³⁴ Jezŭ jo ladēplo hwă bija aboahò kî Zo bōhmubicè tòcò d́ō, cò d́ògè lōwa, “Bija dèbwèbwè gā thaè lôkô b́eḿĕ Je le d́ō, zè gè lè̄ladakè̆ d́ò̆è zè dèthaèni, phî zu Krusu kî lôkô d́ò̆è Je le

³⁵ Manè̄, bija athamèhlô̆hta atha dèbwè nu gū sub́èkò̆ aè̆. Bija htè asuapa athathôḿô̆ Jo kho Jè cè̆ kî Vanzĕlō akhoacè̆ dèbwè nu gè̄ mèhlô̆htagekò̆ aè̆.

³⁶ Manè̄, bija dèbwè gī nib́è nòthò̆ lākho thèd́è̆b́è hnò̆nu, ca thathôḿô̆ gū su gā pa ma d́ō, akhlŏhtamame zi nikhĭ ḿî danè̄?

³⁷ Ḿî̆dîḿî ńò bija dèbwè nu, ca b́ăkhlèi kèhta za tha kî danè̄?

³⁸ D́ŏ dèlathulakèḿè kî dèkî̆kkèmèhlò̆ akhwĭ athara ahlò̆mò̄ nu athăwāi Jè kî Jè lē Jè hwè dèbwè nu, Bija Apho gā thăwāikò̆ cè b́ĕ Ze lela d́ŏ Ca Pa adòathe abu kî d́ŏ Mò̄khobwèzo Tcahtĭ tòcò aklè̆ nu.”

« Zam'mbuyo

Ena »

Bible Society of Myanmar

Titsatireni:

Maulalo othandizidwa

Zotsatsa