Baibulo la pa intaneti

Mărko 14 - Geba Roman New Testament

Dèkŏhtakjala Agè̄ Mèthĭ Jezŭ
( Lŭka 24.50-53 ; Thodŏpho 1.9-11 )

¹ Păskwa kî dèa Toko Gimi Ta pa ńò Apwè̆do b́ôhtîgè. Ab́èwe gīthè̆ be lò. Mègōnu, Phŭgido kî Skrĭbāpho tòcò kŏhtakjalagè agô̄ pô Jezŭ kî mèthĭ Cè lò.

² Barasă cè tòcò d́ò ḿî adò mò mè pwè̆bu ńò. Manè̄, cè b́èhjŏ bija aboahò gè̄ wè̄hto htad́ĕd́ò cè.

Jezŭ B́èthôphrô Sihnŭẃi
( Mattĕo 26.6-13 ; Zowănnī 12.1-8 )

³ B́ĕ Jezŭ ò d́ŏ Bèthăniad́ŏ bu nu, Za sańă gò̄wè̄ cud́èkho tèb́è alò, aò d́ŏ Simŏnè akaĺaki dèbwè ahibu nu, amihmu leb́anīgè dèbwè. Ze lei dèhnŭẃi alīdobwîthè̆ sô htè bija mèi thohto nard́u aònī lob́ô̆ ahmwe tod́ŏ abu nu. Zè mèhtè̆pha hwă dèhnŭẃi akŏ d́ō, zò hlòlagè dèhnŭẃihnŭthòrò̆ d́ŏ Jezŭ akokho nu.

⁴ Bija tòcò cò thèhtègòrè kî d́ògè atha bu, “Zè mèkè̆lō ô lō ma sihnŭẃi gōjo nè?

⁵ Gè sè̆akè̆ cè dokhŏ d́ō, agī nid́olĭwe hô̆ denărio ab́e thŏgèjè d́ō ki i za bwè assègnè̆pho tòcò nu.” Cè tòcò gòwè̄gòsè̆ d́òdî̄d́òdègè amihmu anu dèbwè nu.

⁶ Jezŭ d́òhtagè, “D́ò ḿè cè dimĭ ḿè! Thĭ mèd́îd́ă ma cè gōnu nè? Zè mènigè Jè dè awîaè dimi lò.

⁷ Bija assègnè̆pho tòcò òkô thèjô̆ tèpwè thĭ kă d́ō akhî arră thĭ mèzo za tèpwè cè tòcò dòkhò̆. Ḿî Jè nu, Jò tò òkô thèjô̆ thĭ kă ńò.

⁸ Amihmu jo, mènigè Jè dè pwĕ zè mèkèhta nu htŏ. Zè mè hnŭẃihnŭthòrò̆ Je neb́î̆cè ḿî za pradòlò Jè dèb́èb́ŭlă alekă anikhĭ lò.

⁹ Jò d́ò̆sa thĭ dèdî̄dèhma, b́ĕ bija kò d́ò̆htôlani Vanzĕlō adèd́ò̆sa awîaè awîakè̆ d́ŏ lākho thèd́è̆b́è d́ŏ d́òlè̄ hwahwă nu, bija kò d́ò̆saikôkò̆ amihmu dèbwè jo adèmè aè ajo d́ŏ dègomohtani cè abu nu.”

Dèhŏlă
( Mattĕo 26.14-16 ; Lŭka 22.3-6 )

¹⁰ Bōhmubicè scigībwè aklè̆, ami ḿî Jŭdas Iskariŏta dèbwè nu le tcahtîgè Phŭgido tòcò cab́ô̆htè zô gô̄ hô̆lăbò̄ Jezŭ d́ŏ cè tòcò acukhòbu nu.

¹¹ Cè tòcò thîhè̆b́è dè ajo d́ō, ca thaganāigè kî co ŏlăgè lōwa agī icè hô̆. Cè dòkhò̆ za wācăhlègè akròabe agô̄ hô̆lă Jezŭ nu.

Dèa Toko Gimi Tapanò Apwè̆
( Mattĕo 26.17-25 ; Lŭka 22.7-14 , 21-23 ; Zowănnī 13.21-30 )

¹² Dèa Toko Gimi Ta pa ńò Apwè̆ aŭsu dini nu, htè anuad́ò̆ ò gè̄ mèthĭb́è Păskwa athŏpho akhî nu, bōhmubicè tòcò d́è̆gè Cè, “Na thaèni wa gā pradòlò Păskwa adèa d́òlè̄?”

¹³ Ca b́ăhlôlegè bōhmubicè gībwè kî hmèlagè cè tòcò, “Lenībò̄ d́ŏ u bu nu, kîd́ò̆ thĭ gā tcahtîkò̆ bija ahèj́ai htĭgobo dèbwè d́ō, lôkô ze le.

¹⁴ Ze lenī bò̄bwè ahi hwahwă, d́òbò̄ hi ab́icè, ‘Hid́obu htè Ja kā akô Jo bōhmubicè tòcò akă Păskwa adèa ale ò d́òlè̄? Sara d́è̆tca d́o.’

¹⁵ Cè gè̄ d́è̆lî̄ thĭ hid́o agò̄hta dò dò htè apradòlò htŏ nu. Ale anu, ḿî tèpwè thĭ gā prahnè dòlòb́è gi nikhĭ dokhlo nu.”

¹⁶ Bōhmubicè tòcò legè kî b́ĕ zo dole u bu nu, za tcahtîgè lŏcăcè acab́ô̆ Jezŭ hmèla adĕ nu, kîd́ò̆ cè tòcò pragè Păskwa adèa.

¹⁷ B́ĕ dèkhilagè nu, Jezŭ kî bōhmubicè scigībwè dolegè.

¹⁸ Cè tòcò sańă khwè̆b́a cud́èkho kî b́ĕ ca a thebĕ dèa akhî nu, Jezŭ d́ògè, “Jò d́ò thĭ adî̄ahma, d́ŏ thĭ a ajīò̆jī Jè aklè̆ dèbwè nu gô̄ hô̆lăkò̆ Jè.”

¹⁹ D́ŏ dèothootha abu, d́è̆tcagè cè dèbwè hwă dèbwè, “Ḿî Na thaè d́ò jè ā?”

²⁰ Cò d́ògè lōwa tòcò, “Aḿî thĭ scigībwè aklè̆ dèbwè, ḿî cè htè atrŭnīkô atoko Jò còĺòbu dèbwè nu.

²¹ Bija Apho nu, Ze lekô cè klè acab́ô̆ Cè Tcahtĭ d́ò̆sa Zî wî Cè kè̆ nu. Ab́èhôkî̆kkè ḿî bija ahô̆lă Bija Apho dèbwè nu, cò tò òla ma ńò d́ō, agè̄ è d́okhlŏ lò.”

Eukaristĭa Tcahtĭ
( Mattĕo 26.26-30 ; Lŭka 22.14-20 ; 1 Kòrĭn 11.23-25 )

²² B́ĕ dèa akhî nu, Zî phî toko, Za htăhtai dè ahluată, Ca b́apha kî Ci i Zo bōhmubicè tòcò, Cò d́ò, “Phî kî abò̄. Ajo ḿî Je neb́î̆cè.”

²³ Acab́ô̆ gōnu, Zî phî Phală, Za htăhtai dè ahluată, Ci i zo bōhmubicè tòcò kî cè lŏcăcè ò̆gè.

²⁴ Cò d́ògè lōwa tòcò, “Ajo ḿî Ji thwi, dèlagla athwi, htè akè b́è hlòlakè̆ bija lŏcăcè anikhĭ.”

²⁵ Jò d́ò̆sa thĭ adî̄ahma, Jò kò̄ tò ò̆ pĭpi bekò̆ thobiscihtĭ ńò, htô̆do aniathè̆ kèb́è khaĺè Jò kò ò̆kò̆ d́ŏ Kib́ĭcè Ahtĭage bu nu.

²⁶ Cè tòcò thăbô̄ hwă dèhtăhtai adèthăbô̄ d́ō, Ze leb́agè d́ŏ Òlĭvo khòlò̆ ò nu.

Dèd́ò̆sadòlò Petru Adèjab́i
( Mattĕo 26.31-35 ; Lŭka 22.31-34 ; Zowănnī 13.36-38 )

²⁷ Mèhwă d́ō, Jezŭ d́ògè cè tòcò, “Thĭ lŏcăcè gè̄ cwèthĭwī kî bāladēkò̆ Jè, manè̄, dèhwelagè d́ŏ Cè Tcahtĭ abu gōjo; ‘Jè gè plè̆thĭkò̆ atcai thŏ dèbwè nu, kî thŏpho tòcò gè̄ cwèphrucwèphrî̆ lōkò̆.’

²⁸ Barasă b́ĕ Ja htaboge hwă nu, Je gē leŭsukò̆ thĭ d́ŏ Galilĕage nu.”

²⁹ Petru d́ògè cè, “Bija adèb́u gē gleglā nòthò̆ gŏ abwè hnò̆nu, jè è̆ di ḿî tèpwè gōnu ńò.”

³⁰ Jezŭ d́ògè cè, “Jò d́ò nè adî̄ahma, khŏdèhè dèsè̆kî scî̆phè̆ ô gīpla hnî̆ńò nu, na gā jab́ikò̆ Jè thŏpla.”

³¹ Barasă, Petru d́òwe d́ŏ dèthasô abu, “Ji gī thĭ b́èkô na kă hnò̆nu, ja da jab́i pĭpi nè ńò.” Alewe tòcò ḿî ḿî d́ògè gōnu lò lò.

Jezŭ Adèssègnè̆bòdò kî Dèthĭ
( Mattĕo 26.36-46 ; Lŭka 22.39-46 )

³² Mèhwă cè tòcò leb́agè dè ale dokhlo htè bija jo ami Gèthsè̆mani nu, Cò d́ògè Zo bōhmubicè tòcò, “Sańălăòbò̄ b́ĕjo b́ĕ jè thèb́è̆hta thebĕ nu.”

³³ Kî zo jolegè Petru, Zăkomo kî Zowănnī lekô ca kă. B́ĕnu, zo othotha kî thogothagè̄sôgè.

³⁴ Cò d́ògè lōwa tòcò, “Jo ohmŭorasô htô̆kî Jò kòmò̆ thĭgè nu. Ò b́ĕjo kî dôibò̄.”

³⁵ Zè khè̆le ahlò̆mò̄ tîkî, Hwă d́ō, agî̄ phî̆hta za b́eḿĕ d́ō, nare akhîagla gò̄ phlòtôlô d́ò̆bò̄è Cè anikhĭ nu, Za phlatokola Ze ne lākho kî thèb́è̆htagè.

³⁶ Cò d́ò, “Ŏ Apa, dèlŏcăcè ò Nu cukhò bu lò. Phîkè̆ phlòḿĭbò̄ phală ajo. Barasă, dî ḿîbò̄ htĕ ab́è Ja tha ńò. Ḿî dè gè̄ mè d́ò̆è ane htĕ ab́è Na tha lò.”

³⁷ Mèhwă Ze geb́ahtî Zo bōhmubicè tòcò nu. Anu tòcò sòḿĭlōgè. Cò d́ògè Petru, “Simŏnè, ńò sòḿĭgè ā? Nô dô dôikèhta thagò̆ danare ńò ā?

³⁸ Dôi kî thèb́è̆htabò̄ cab́ô̆htè na da ladēnī dèhnakă aklè̆ ńò nu. Atha dèmè̆ thaè mè tèpwè dè aè, ḿî anebî̆cè akhoaă tò ò ńò.”

³⁹ Ze geb́a thèb́è̆gè acab́ô̆ Zè thèb́è̆hta aŭsu tapla nu.

⁴⁰ Mèhwă d́ō, Ze geb́ahtî lōwa tòcò tapla be kî tcahtîgè lōwa tòcò sòḿĭthebĕ, cè tòcò ta b́ăhta kèhta agādŭ ńò akhoacè̆, cò tò d́òzage Jezŭ alī dimĭ ńò.

⁴¹ Ze geb́ahtî lōwa thŏpla tapla kî cò d́ògè lōwa tòcò, “Thĭ sòḿĭ thebĕwe ā? Thĭ òcoòmò tèpwè thĭ è̆ lò ā? Tahŏ kha! Akhîb́è htŏ! Tcabò̄, thĭ gā tcahtîgè Bija Apho b́è hô̆lă d́ŏ bija akî̆kkè tòcò acukhòbu nu.

⁴² Wè̄hto kha! Gē legè! Tcabò̄, ahô̆lă Jè dèbwè dole htŏ!”

Jezŭ B́èphòb́ècŏ
( Mattĕo 26.47-56 ; Lŭka 22.47-53 ; Zowănnī 18.3-12 )

⁴³ B́ĕ cò d́òhta gōnu akhè̆ nu, bōhmubicè scigībwè aklè̆ dèbwè, htè Jŭdas nu, pòhta ploplogè bija aboahò ahèi d́asĕ, thab́ă, hnèmūhnèhta. Ab́ăhlôle bija ajo tòcò ḿîgè Phŭgido, Skrĭbāpho kî Anedothabwe tòcò nu.

⁴⁴ Ahô̆lă Cè dèbwè nu d́ò̆sagè zò khò̆ tòcò dèhmăi dèdè̆ gōjo, “Bija htè jò gō phòb́a hnŭẃi dèbwè nu, ḿî Cè lò. Pô kî hèphlòḿĭi Cè d́ŏ dè sòiwāi abu nu.”

⁴⁵ Mèhwă d́ō, ze lewè̄ danāgè Jezŭ alò kî d́ògè Cè, “Sara! Sara!” kî zò phòhnŭẃigè lōwa.

⁴⁶ B́ĕnu lò, bija pôwè̄gè Zò lò kî phògè Cè.

⁴⁷ Asò̆hto ò bija klè̆ dèbwè b́ehtagè ad́asĕ kî bēladēgè Phŭgima azôpho dèbwè anigu.

⁴⁸ Jezŭ d́ògè cè tòcò, “Thĭ lei d́asĕ kî hnèmūhnèhta d́ŏ thĭ gô̄ pôgè Jè ḿî, thĭ bè̄ Jè acab́ô̆ bija a ahumèkè̆dè nu ā?

⁴⁹ Hlĕ Jò òkôwe thĭ kă, gô̆ lumuni Jô thôithò̆idè d́ŏ Zarādo abu nu, thĭ tô pô to cŏ tèpwè Jè ńò. Barasă ḿî acab́ô̆ Cè Tcahtĭ gē pĕhtazòhta anikhĭ nu.”

⁵⁰ B́ĕnu akhè̆ bōhmubicè tòcò bāladēkè̆ Cè kî cwèphlòḿĭlōgè.

⁵¹ Ab́òĺòpho, akô̆htani tîkî̆jāpho tèb́è lò alò dèbwè lôkô Ze le. Bija hlò̆wè̄ pô cè d́ō,

⁵² za bāphlòmĭ tîkî̆jāpho kî cwè tuklŭhtugè.

Jezŭ d́ŏ Phŭgimā Ajŭkho
( Mattĕo 26.57-68 ; Lŭka 22.54 , 55 , 63-71 ; Zowănnī 18.13 , 14 , 19-24 )

⁵³ Mèhwă d́ō cè tòcò leigè Jezŭ d́ŏ Phŭgima aò kî phŭgido alewe tòcò, anedothabwe tòcò kî Skrĭbāpho tòcò ledo lōgè.

⁵⁴ Petru lôkô Ze le d́ŏ adòbò nu, htô̆ zo do d́ŏ Phŭgima ahi awebu nu. B́ĕnu za sańălăòkôgè dèkhî̆dèbwè tòcò akă kî sŭwūgè hmî.

⁵⁵ Phŭgido kî Sanhedrîn lūkho Anedothabwe lŏcăcè tòcò thakăhta bija akă gā kha ane thè̆thî, agā sawè̄ Jezŭ alò dèkèḿè cab́ô̆htè zè gè̄ mèthĭ zabò̄ lōwa anikhĭ, nòthò̆ hnò̆nu, cè tè kèhtî ńò.

⁵⁶ Manè̄, bija òè̆bwè kha thè̆thî ane d́ŏ dè dîdî̄dahma ńò abu, barasă adèjî̄b́è di nirāhlè lōwa ńò.

⁵⁷ Bija tòcò cò khagè thè̆thî adîdî̄dahma ńò kî d́ògè,

⁵⁸ “Wa thîhè̆b́è Cò d́ò, ‘Jè gè̄ mèlaphra Zarādo htè bija prai acukhò jo, kî thŏni adābu Ja gā prahtagekò̆ Zarādo alewe dawa, htè bija da praib́è acukhò ńò nu.’”

⁵⁹ Barasă cè tòcò ḿî ḿî za kha thè̆thî ada jāthô hlè lōwa ńò ńò.

⁶⁰ Phŭgima wè̄hto d́ŏ jŭkho nu, ze d́ògè Jezŭ, “Ńò tò d́òge za bija akha ane thè̆thî tòcò da dimĭ ńò ā?”

⁶¹ Ḿî tab́ab́a Jezŭ ò d́o lò. Cò tò d́òge dè alī dimĭ ńò. Phŭgima d́è̆ kòd́ò̆ Cè tapla be, “Nî ḿî Krĭstu Kib́ĭcè Ab́èhôwî dèbwè Apho ā?”

⁶² Jezŭ d́ògè cè, “Ji ḿî Cè hŏ. Thĭ gā tcahtîb́èkò̆ Bija apho asańălăò d́ò̆ Dèkhodèădo acudèhtwè dòkhò̆b́è ò nu kî ala Mò̄kho dè̄tob́o klè̆ dèbwè nu.”

⁶³ B́ĕnu Phŭgima htohtèĺègè ascid́ŏ kî cò d́ògè, “Alobawed́ò̆ thè̆thî tòcò d́òlè̄ b́ĕ?

⁶⁴ Thĭ thîhè̆b́è htŏ Zè dèhôd́ă adèjî̄b́è. Thĭ gomo cadè̄? Zè dèkèḿè ò ā? Ńò ā?” Cè lŏcăcè tòcò laglahlè lōwa d́ŏ Zè dèkèḿè ò, kî Cè gè̄ b́è thĭ lò.

⁶⁵ Tòcò cò htwîwè̄gè apèèhtĭ Zò lò. Tòcò cò b́ò̆b́i lōwa agādŭ tîkî̆jā, kî zò htògèlōwa. Kî cò d́òjod́òhnă lōwa, “Mèbò̄ Ne ne Prò̆fèt tîkî nā! Ahtò Nè ḿî bò̄bwè?” Dè akhî̆abwè tòcò ḿî ḿî hlò̆wè̄ Zò lò, d́ègè Cè.

Petru Adèjab́i Jezŭ
( Mattĕo 26.69-75 ; Lŭka 22.56-62 ; Zowănnī 18.15-18 , 25-27 )

⁶⁶ B́ĕ Petru ò Hid́o akhlŏb́a nu, Phŭgima zômo dèbwè le,

⁶⁷ cè kèhtî Petru galè ane hmî, za tca ladîlase hwă lōwa d́ō, cò d́ògè, “Nè ḿîthè̆ aòkô Jezŭ, Nazarè̆thpho akă dèbwè nu nî̄!”

⁶⁸ Petru jab́idè kî cò d́ò, “Ńò d́ò danè̄? Ji di thîhè̆kô nè ńò. Na thaè d́ò danè̄?” Mèhwă d́ō, zè hèhtakô khaglè̄do, b́ĕnu scî̆phè̆ ôhtagè.

⁶⁹ Zômo khŭnu dèbwè tcahtî kòd́ò̆ cè d́ō, cò d́ò̆sagè bija asò̆hto b́ôhtî cè tòcò, “Ajo dèbwè ḿîthè̆ bija aò Cè klè̆ dèbwè nu nî̄!”

⁷⁰ Barasă d́ō, Petru jab́i kòd́ò̆ tapla be. Ò tod́o b́ĕ, bija asò̆hto ò tòcò d́ògè Petru, “Nî ḿî ladŭ Cè klè̆ dèbwèbwè. Nî ḿîthè̆ Galilĕapho dèbwè tè b́è ńò ā?”

⁷¹ Petru hôkî̆kkè kî hôd́ălă ane, cò d́ò, “Ji di thîhè̆ mŭpla bija htè thĭ d́ò awîakè̆ dèbwè ńò.”

⁷² B́ĕnu, scî̆phè̆ ôhtagè gīpla tapla. Petru gomohtanigegè Jezŭ adèd́òdòlò htè Cò d́ògè lōwa, “Dukhlŭkî scî̆phè̆ ôhta gīpla hnî̆ńò nu, na gā jab́ikò̆ jè thŏpla,” nu. Petru atha dò mò be tîkî̆ ńò kî za hagrohagrāgè.

« Zam'mbuyo

Ena »

Bible Society of Myanmar

Titsatireni:

Maulalo othandizidwa

Zotsatsa