Baibulo la pa intaneti

Hebrè̆u 10 - Geba Roman New Testament

¹ Dèhmèla ḿî dèathĕbwe ahô̆agèlè lò acè̆, ade pĕhtazòhta ńò d́ō adèmè pĕhtazòhta kèhta athub́uthèb́è̆ tòcò ńò, ted́e hwă ted́e adèhluhtai ḿî ḿî gōnu lò lò.

² Agî̄ dî ḿî ma ńò d́ō, dèhlu kò tò òb́è tèpwè ńò, manè̄ d́ō, ale thub́uthèb́è̆ tòcò kè̄ b́è mèwîmètcă hwă zo gō do gomohtani tèpwè dèkhòwè òzòlò ńò acè̆ nu.

³ Barasă ted́e hwă ted́e adèhluhtai mè gomohtani cè tòcò adèkhòwè nu.

⁴ Bo athwi kî bègôlè athwi dè mèkè̆ kèhta pĭpi dèkhòwè ńò.

⁵ Hlĕ Krĭstu lela lākho nu, Cò d́ògè gōjo; “Nè htè ada thaèni dèhlu ńò kî dèhluhtai ńò dèbwè, pradòlògè ji nikhĭ dèneb́î̆cè dèdè̆.

⁶ Na da thaganāikô dèsôb́ô̆ athè̆d́ĕd́ò ńò, kî dèhlu dèkhòwè anikhĭ ńò.

⁷ Kî jò d́ògè acab́ô̆ jè b́èhtulahmèla d́ŏ Cè Tcahtĭ bu atherĕ nu, ‘Ŏ B́ĭcè! Jò ò jo! Je le sòkhĕńe Nè dèthaèni.’”

⁸ Cò d́ò ŭsugè gōjo, “Na da thaènigè dèhlu kî dèhluhtai tòcò ńò, na da thaènigè dèhlusôb́ô̆ thèd́è̆d́ŏ kî Dèhmèla d́ò̆sa htè dèkhòwè adèplehlô̆ anikhĭ nu ńò.”

⁹ Mèhwă Cò d́òwe ahlò̆mò̄, “Ŏ B́ĭcè! Jò ò jo! Je le sòkhĕńe Nè dèthaèni.” Zè mèkè̆ hwă Dèhmèla aŭsu dèdè̆ d́ō, Cè b́è̆blôgè alekă dèdè̆.

¹⁰ Kîd́ò̆ d́ŏ Jezŭ Krĭstu mè dè ajo acè̆, wè b́è mèwîmètcăgè d́ŏ Zè dèhluhtaigè Ze ne htĕ tapla lò nu.

¹¹ Gŏ amuni phŭgi tòcò hluhtai dèhlu htè adî phîkè̆ za dèkhòwè ńò tòcò nu.

¹² Agî̄ ḿî Krĭstu nu, Cu hluhtai hwă Ze ne dèkhòwè adèplehlô̆ge tapla lò kî gehta ògè d́ŏ Kib́ĭcè acudèhtwè dòkhò̆.

¹³ D́ŏnu Cò òsô̆wô̄ htô̆ Ce d́ĕd́òròkhè tòcò gî̄ phî̆hta Za khajāla nu.

¹⁴ D́ŏ Zè dèhlu tapla lò abu nu, Zè mènigè bija Zè mèwîmètcă tòcò anikhĭ dèò alahtŭlablo.

¹⁵ Spirito Tcahtĭ aḿăkhai ladîlase wa lò. Aŭsu Cò d́ò,

¹⁶ “D́ŏ muni tòcò abu nu, jè gè̄ mènikò̆ cè tòcò thè̆thî, kîd́ò̆ Dèado d́òwe ahlò̆mò̄; Jè kè̄ b́è̆nīkò̆ ca thabu jè dèhmèla, kî hwelakò̆ d́ŏ ca tha abu.”

¹⁷ Cò d́òwe; “Ja gā da hmăikò̆ zè dèkhòwè tòcò ńò, kî zè dèmèkèḿè tòcò ńò ńò.”

¹⁸ B́ĕ dèkhòwè tòcò b́è b́ahlô̆ hwă nu, dèhlu dèkhòwè tòcò anikhĭ tò ò za be ńò.

Gē Leb́ôhtîbò̄ Kib́ĭcè

¹⁹ Mègōnu d́ō, thè̆buwe tòcò, we lenīb́è Dètcahtĭ Ahtajîgudŭ Alle ḿî d́ŏ Jezŭ athwi akhoacè̆ lò.

²⁰ Cè thè̆ne b́ăhtani wa klè athè̆, dèthôḿô̆ aklè ab́ăhtani wa dèthèd́od́îd́ă htè aḿî ze neb́î̆cè nu.

²¹ Kîd́ò̆ wi nib́è phŭgido atcai Kib́ĭcè ahi dèbwè nu.

²² Mègōnu we gē leb́ôhtî d́ò̆è Kib́ĭcè d́ŏ thotha danā kî aòpĕhta kî dèb́u, kî wè dègomo aŭsabăkè̆ dègomo akî̆kkè, kî neb́î̆cè htè ab́èŭsab́ă i htîbātcă nu.

²³ Wò kò òi hmehmecece d́ò̆è wè dèsascĭi, manè̄ d́ō, bija amè dèaḿăkhai dèbwè ḿî adî̄ahma akhoacè̆ nu.

²⁴ Wi ikhoiă hlè d́ò̆è lōwa d́ŏ dèphîdèmè awîaè abu nu.

²⁵ Sèkô̆bò̄ ḿè dèladēplo abu ḿè, ḿî ikhoiă hlèbò̄ lōwa dòkhò̆ d́ŏ thĭ tcahtîb́è Muni dini b́ôhtîhta htŏ nu.

²⁶ Wi nib́è hwă dèdî̄dèhma adèthîhè̆, wè gè̄ mèwe dèkhòwè d́ō, dèplehlô̆ adèhluhtai tò ò za be ńò.

²⁷ Akò ò ḿî dècirra a sô̆ htè hmî agè̄ ni bija ahtad́ĕd́òdè tòcò nu be lò.

²⁸ Gajă bija adò sòkhĕńe Mŏzè adèhmèla tòcò nu, d́ŏ thè̆thî gībwè kî thŏbwè alòmò bu lò dèthakhòwè tò ò zi nikhĭ ńò, za khab́è dèthĭ lò.

²⁹ Kî gajă bija akhè̆htajāhta Kib́ĭcè Apho akho tòcò, kî ad́ò dèlagla athwi dè mèplî̆mètcă cè ńò tòcò nu kî bija ahtèkè̆htèô Spirito Tcahtĭ adèhludètă tòcò nu, gā khab́è d́okhlŏkò̆ dècirra asôgudu.

³⁰ Wî thîhè̆ tèpwè Cè htè ad́ò, “Dèmège akholī ḿî jè è̆, kî ji kî igekò̆ cè.” Wî thîhè̆ tèpwè dèd́ò ò, “Dèado gī cirrakò̆ za bija nu.”

³¹ Dèladēnī Dèò Ab́ĭcè acukhòbu nu ḿî amò scisăthabo hŏ!

³² Gomohtanibò̄ munimuthè̆ aŭsu hlĕ thĭ khab́ègè dèssègnè̆ dukhlŭkî thĭ nib́è dèhlî̆ hnî̆ńò nu.

³³ Tapla tapla, thĭ b́è d́òkè̆d́òô, b́èmūb́èhta, tapla tapla, thĭ ḿî bija athè̆thò bija acab́ô̆ akhab́è gōjo tòcò nu.

³⁴ Thĭ khab́èplo bija aladēnī dèkî̆dî̄ bu tòcò, ḿî thĭ khòthad́ò̆i zòlò tèpwè bija ăwūăthèphlè thĭ tòcò nu d́ŏ thĭ thîhè̆ thĭ nib́è dè aè d́osè kî aò thèjô̆ tòcò acè̆ nu.

³⁵ Khŭhè̆bò̄ dakha, manè̄, thĭ sô thĭ hlè̆ ḿî ado.

³⁶ Thĭ loba dèkhòthad́ò̆ agè̄ mè Kib́ĭcè adèmè kî agî̄ phîni Zè dèaḿăkhai tòcò nu.

³⁷ Cè Tcahtĭ d́ò; Tod́opho be lò, tod́od́ŏ tha be lò, Agā lab́è dèbwè nu lela htŏ, Zè dè wèzè Ze ne ńò.

³⁸ Ji bija adî̄ahma tòcò nu, kò òikò̆ dèb́u, ḿî Ze gē geb́a ma Ze lekă d́ō, Ja tha adèb́èlò̄ kò tò òkò̆ Zo kho ńò.

³⁹ Thĭ kî jè gî̄ dî ḿî bija ageb́a alekă d́ŏ asuapa tòcò ńò. Wî ḿî athohmethaglo kî nib́è dèhlô̆htage htŏ.

« Zam'mbuyo

Ena »

Bible Society of Myanmar

Titsatireni:

Maulalo othandizidwa

Zotsatsa