Baibulo la pa intaneti

Dèd́è̆lî̄ 3 - Geba Roman New Testament

Dèithîhè̆ Sardîs Adèòplo

¹ “Hwenibò̄ Sardîs Adèòplo abwèzo aò kî d́òbò̄ cè: “Ajo ḿî Cè htè aphîglo Kib́ĭcè aSpirito Tcahtĭ thăthôdèmè̆ kî sè thăthôdèmè̆ dèbwè adèd́ò̆sa; jî thîhè̆ lŏ thĭ wî thĭ kè̆ htè thĭ mi hŏhtathèlai barasă thĭ dèòthôḿô̆ ḿî athĭgè dòkhò̆.

² Wè̄htobò̄ kha! Htowè̄htosò̆gebò̄ dè aòni we thĭ tîkîtòkò̆ nu; htè athĭ ahlè̆mè̄ plaplăgè akhoacè̆ nu. Manè̄ ja tcahtîgè nè dèmè aèaò̆ d́ŏ Kib́ĭcè ahlò̆mò̄ nu, te pĕhtazòhta hnî̆ńò.

³ Gomohtanibò̄, thĭ dèthosôthasô hlĕ thĭ thîhè̆b́è dèthôdèthò̆ aŭsu tapla nu. Sòkhĕńebò̄ kî bajalagebò̄ thĭ ne. Thĭ gè̄ dè wè̄hto ma ńò d́ō, je gē lehtîkò̆ thĭ acab́ô̆ a ahudè dèbwè nu, kî thĭ gī di thîhè̆kò̆ akhînare b́ĕ je lela nu ńò.

⁴ D́ŏ Sardîs u bu nu, adè mèb́ò ascid́ŏdò̄dô ńò òwe tèpwè tîkîtòkò̆, kî cè tòcò mò tani tèpwè agē lekô ja kă òkî dèkô̆dèthò ab́ôthădisci nu.

⁵ Bija anoabè dèd́o tòcò nu kò thòb́èkô̆ scid́ŏ b́ôthă acab́ô̆ ajo tòcò nu; jô gô̄ dô htô̆b́ăkè̆kò̆ cè tòcò ami d́ŏ dèthôḿô̆ acèbu ńò, ḿî je gē selakò̆ zi mi d́ŏ ja Pa ahlò̆mò̄ kî Zè Mò̄khobwèzo tòcò ahlò̆mò̄ nu.

⁶ “Bija anigu ò tòcò sòkhĕńebò̄ htè Spirito Tcahtĭ d́ògè dèòplo tòcò cadè̄ nu.

Dèithîhè̆ Philadè̆lphia Adèòplo

⁷ “Hwenibò̄ Philadè̆lphia Adèòplo abwèzo aò kî d́òbò̄ cè: “Ajo ḿî Cè htè atcahtĭ kî adî̄ahma aòi Dăvid ahnèwî̄kă htè b́ĕ ca b́ăhta khaglè̄ nu bija dè glè̄b́i za dèbwè̆ ńò kî b́ĕ Zè glè̄b́i nu bija ta b́ăhta za dèbwè̆ ńò dèbwè adèd́ò̆sa,

⁸ “Jî thîhè̆ lŏ thĭ wî thĭ kè̆ kî khŏnujo d́ŏ thĭ hlò̆mò̄ nu ja b́ăhta htŏ khaglè̄ htè bija dè glè̄b́i kèhta dèbwè̆ ńò nu jî thîhè̆ tèpwè tè b́è thĭ kho thĭ ă ò zî̆ ńò nòthò̆ hnò̆nu, thĭ òigè jè dèhmèla kî thĭ da bāphlòḿĭgè ji mi ńò.

⁹ Khŏnujo jè gè̄ mèhlî̆htakò̆ Sătana asinagŏgāpho htè ad́òla ane Jŭdapho tòcò ḿî zî ḿî bwèplè, manè̄ cè tòcò dî ḿîgè gōnu ńò acè̆ nu, ja gā hnakò̆ cè tòcò le gò̄la thĭ hlò̆mò̄ kî d́òphlò̆hta d́ŏ thĭ ḿî bija htè jè b́èlò̄ tòcò nu.

¹⁰ Thĭ òi jè dèhmèla kî kŏikhòigè dèbadèsè̆ akhoacè̆, ja gā b́ahlô̆htakò̆ thĭ d́ŏ dèbadèsè̆ agā lab́è Lākho thèd́è̆b́è akho akhî nu.

¹¹ Je gē lehtî plaplăgè thĭ. Òi hmehmececebò̄ dè htè thĭ nib́è htŏ tòcò nu, kî ibò̄ ḿè bija gî̄ phîkè̆ thĭwī thĭ thĭ dènodèbè akhocò̆ nu ḿè.

¹² Bija anoabè dèd́o tòcò nu jè gē mèphî̆htakò̆ cè hidu d́ŏ Kib́ĭcè aZarādo bu nu kî cò kò òb́èkò̆ d́ŏ nu lahtŭlablo; je gē hwelakò̆ jî B́ĭcè Ami, kî jî B́ĭcè au tcahtĭ ami htè Jerŭsalèm u Athè̆ aò d́ŏ Mò̄kho nu kî jî mi athè̆ papa.

¹³ “Bija anigu ò tòcò sòkhĕńebò̄ htè Spirito Tcahtĭ d́ògè dèòplo tòcò cadè̄ nu.

Dèithîhè̆ Laodĭsea Adèòplo

¹⁴ “Hwenibò̄ Laodĭsea Adèòplo abwèzo aò kî d́òbò̄ cè: “Ajo ḿî Amèn, ahmeaglo, thè̆thî adî̄ahma kî Kib́ĭcè adèb́òla akhahtîkhab́ò̆ adèd́ò̆sa;

¹⁵ Jî thîhè̆ lŏ thĭ wî thĭ kè̆ thĭ do go ńò ńò, thĭ to co ńò ńò. Ja thaèni d́ŏ no gō co ḿîwî, no gō go ḿîwî dimimi lò.

¹⁶ Ḿî thĭ ôlè̆ lò d́ō, jî gî̄ ẃî̆ladē ni thĭ d́òbĕ.

¹⁷ Thĭ d́òlage thĭ ne, ‘Jî ḿî ajèdā, ja wāhlèni ŭcalèkhjă, ja thaèni dè arră nu ḿî aòni jè lò,’ ḿî thĭ ssègnè̆ laglè̄laglò̄gè dòkhò̆, thĭ khed́ekhi gādŭkhi kî òhlòthô̆ gè gè.

¹⁸ Jò d́ò̆sa thĭ, bwîbò̄ htè̆ d́ŏ jò ò jo, htè̆ atcă, htè agè̄ mè jèdā thĕbwekò̆ thĭ nu. Kî bwîkôbò̄ scid́ŏdò̄dô ab́ôthă akò b́ò̆b́i b́ò̆gāi thĭ dèòhlôthô̆ amò thăwāthablè̄, mèhwă bwîbò̄ dihwithôphrô kî thôphrô thĭ gādŭ cab́ô̆htè thĭ gā tcahtî zabò̄ dè nu.

¹⁹ Jî ḿî Cè htè ahò̆ kî aplè̆ bija cè b́èlò̄ tòcò dèbwè nu; mègōnu bajalage lŏtholŏthabò̄ thĭ ne.

²⁰ Tcabò̄, Jò sò̆hto ò d́ŏ khaglè̄htî kî tòklògè khaglè̄. D́ŏ thĭ klè̆ dèbwèbwè gî̄ thîhè̆ kî b́ăhta ma akhaglè̄ d́ō, je gē le sańăthò̆grò̄ hwă cè d́ō, ja kā a plo cè kî ca ka a plokò̆ jè.

²¹ Ji kî ikò̆ bija anoabè dèd́o dèbwè gā sańăplo jè d́ŏ ja na abu acab́ô̆ jè thè̆ne nobè hwă dèd́o d́ō, ja sańă ploplogè Ja Pa d́ŏ Za na abu akhò̆ nu.

²² “Bija anigu ò tòcò sòkhĕńebò̄ htè Spirito Tcahtĭ d́ògè dèòplo tòcò cadè̄ nu.”

« Zam'mbuyo

Ena »

Bible Society of Myanmar

Titsatireni:

Maulalo othandizidwa

Zotsatsa