Baibulo la pa intaneti

2 Kòrĭn 3 - Geba Roman New Testament

Dèŏlăphlala Athè̆ Azôabwè tòcò

¹ Dè ajo ḿî acab́ô̆ wa thaè mè kòd́ò̆ wu mūkă nu ā? Wè da thaè mè tèpwè thĭ mūkă kî bija lewe amūkă dèbwè̆ ńò.

² Manè̄, thĭ thè̆ne thĭ ḿîgè ô cè aò hwela d́ŏ wa tha abu nu, htè bija gŏ abwè kèhtî kî pha za,

³ d́ŏ Krĭstu acèborŏ ade hwelai kî hmîhtĭ ńò, ḿî ab́èhwelai kî Dèò Ab́ĭcè aSpirito, tè b́è aò hwela d́ŏ lob́e akho ńò, ḿî d́ŏ thĭ tha aòthôḿô̆ alò akhoacè̆ nu.

⁴ D́ŏ Kib́ĭcè ahlò̆mò̄ wè dèsascĭi ò d́ŏ Krĭstu ò nu.

⁵ Tè b́è d́ŏ wo kho wa ă kî we ne, wè kèhtakèhtò̆ dèmè akhoacè̆ ńò. Wè kèhtakèhtò̆ ḿî lŏ d́ŏ Kib́ĭcè ò lò.

⁶ Cè dèbwè lò, Ci igè wa dèkhodèă agā tcaikhwèi Thè̆thî Athè̆ jo nu, htè atè b́è hwelai cèd́ŭ ńò, ḿî ab́è hwelaigè Spirito Tcahtĭ nu, ab́èhwelai cèd́ŭphlo ḿî amèni wa dè thĭ, ḿî Spirito Tcahtĭ i dèòthôḿô̆ lò.

⁷ Dèthôdèthò̆ ab́èhtala kî cèd́ŭphlo d́ŏ lob́e tòcò alò kî Kib́ĭcè adòathe lî̄hta b́ĕ abèila akhî nu. Dè agè̄gòbrò d́ŏ Mŏzè amūkă labî̄gè nòthò̆ hnò̆nu, agè̄gòbròwe acè̆ Israè̆lpho tòcò da tcawè̄ kèhta zu mūkă ńò. Dèthôdèthò̆ htè alei dèthĭ nu, b́ĕ akhob́ăădo akhî nu, ḿî òkî dèhĭdèhtè̆ pwĕ gōnu d́ō,

⁸ dèhlî̆ htè aò khwè̆b́a Spirito Tcahtĭ nu, agè̄ gè̄gòbrò d́okhlŏkò̆ pwedè̄ lò.

⁹ Dèkhazô htè amèni wa dècirra gî̄ hlî̆segòdrò ma pwĕ gōnu d́ō, dèkhazô dè htè amèni wa dèhlô̆htage nu agî̄ hlî̆segòdròkò̆ pwedè̄ lò.

¹⁰ Kô d́ôthò̆drò ma dèhlî̆segòdrò ajo nu d́ō, aŭsu dèdè̆ mè acab́ô̆ ahnahnă lò.

¹¹ Dè tod́odasapho adèhlî̆dèplă gî̄ ḿî ma gōnu d́ō, dè alahtŭlablo adèhlî̆dèplă gè̄ mè d́okhlŏkò̆ cadè̄ lò?

¹² Wò òi dèsascĭi ajo d́ō, wu khŭ zî̄gè.

¹³ Wè tèb́è ḿî acab́ô̆ Mŏzè, htè ab́ò̆b́i amūkă cab́ô̆htè Israè̆lpho tòcò gè̄ tè kèhtî alabî̄ nu ńò.

¹⁴ Athĕbwe ḿî, cè tòcò adègomo khila htô̆ dola khŏdini d́ŏ za pha Cè Tcahtĭ Thè̆thî Ali nu, tîkî̆jā òwe ab́ò̆b́i zu mūkă nu, manè̄ d́ō, aphîkè̆ kèhta tîkî̆jā ḿî Krĭstu lò akhoacè̆ nu.

¹⁵ Khŏnujo, bija tòcò pha nòthò̆ Mŏzè adèhtulahmèla acè hnò̆nu, tîkî̆jā ò ab́ò̆b́i we zè dègomo.

¹⁶ Ze de geb́ahtî Kib́ĭcè ńò athŭtherĕ, dè gî̄ dî phîkè̆nikò̆ cè tòcò ńò.

¹⁷ Khŏnujo Dèado ḿî Spirito Tcahtĭ kî b́ĕ Dèado Aspirito ò nu, dèòhlô̆òla ò lò.

¹⁸ Kîd́ò̆ wa lŏcăcè hlî̆b́agei Dèado adèhlî̆segòdrò kîd́ò̆ wu mūkă ò atab́ăgè. Kî dèhlî̆segòdrò dò mŏ lò̆ ajo, htè Spirito Tcahtĭ nu, b́ăkhlège wa agā lă kî Cè htè aòi dèhlî̆segòdrò d́okhlŏ dèbwè nu.

« Zam'mbuyo

Ena »

Bible Society of Myanmar

Titsatireni:

Maulalo othandizidwa

Zotsatsa