Baibulo la pa intaneti

1 Kòrĭn 3 - Geba Roman New Testament

Kib́ĭcè Akhî̆abwè tòcò

¹ Thè̆buwe tòcò, jè thè̆ne jî dî jî̄b́èhtî kèhtagè thĭ acab́ô̆ Spirito Tcahtĭ abija tòcò nu ńò, jo gomogè thĭ acab́ô̆ phehî abija, abĭsèpho d́ŏ Krĭstu ahlò̆mò̄ nu.

² Jo b́oò̆gè thĭ nuhtĭ lò, tè b́è d́î̆ asa ńò, manè̄ thĭ ta aza hnî̆ńò acè̆ nu.

³ Thĭ òwe tèpwè acab́ô̆ bija ab́èkja lākho tòcò adèò adò lò. Atè b́èbò̄ d́ŏ dèthakla kî dèmèhtîmèbo acè̆ ńò ā? Htè thĭ ḿîgè acab́ô̆ bija ab́èkja lākho tòcò akhò̆ nu ńò ā?

⁴ Atè b́èbò̄ d́ŏ thĭ dèhtakjălarā i “Jî ḿî Păulu abija,” kî “Jî ḿî Apò̆llòs abija,” abu nu ńò ā?

⁵ Ahnèhnè nu, Păulu ḿî bò̄bwè? Kî Apò̆llòs ḿî bò̄bwè? Zî ḿî Kib́ĭcè azôpho alei thĭ dèb́u tòcò nu lò. Wa mè wè dèmè htè B́ĭcè ilani wa dèbwè dèbwè ladū lò.

⁶ Jo solagè amu, Apò̆llòs hlòi htĭ, barasă Kib́ĭcè mèkèhta cè.

⁷ Asola dèbwè kî ahlòi htĭ dèbwè dî ḿî ajwīdomodo ńò, ḿî Kib́ĭcè amèkèhta amu dèbwè lò.

⁸ Aso dèmu dèbwè kî ahlòi htĭ dèbwè, dèbwè dèbwè ladū gī nib́èkò̆ asôahlè̆ acab́ô̆ atani ze dèmè tòcò nu.

⁹ Wî ḿî Kib́ĭcè adèmèplo apho, thĭ ḿî Kib́ĭcè ahudephaklè̆. Thĭ ḿîkô Kib́ĭcè ahiaphă.

¹⁰ D́ŏ ahluată Kib́ĭcè ilani jè akhoacè̆, jî ḿîgè azaabla htè ab́òhta kèhtagè hi akăd́ò̆, kî bija alewe prahtaigè hiphă d́ŏ akho nu. Barasă bija aprahta hi akăd́ò̆ ajo akho dèbwèbwè nu kè̄ b́è thidĭikò̆ htè agā prab́èbò̄ cadè̄ nu.

¹¹ D́ŏ hi akăd́ò̆ nu akò tò d́ò̆la ma Jezŭ Krĭstu akho ńò nu, bija ta prahta za hiphă dèbwè̆ ńò.

¹² D́ŏ hikăd́ò̆ dèmè̆ jo akho nu, thĭ htai za htè̆, hô̆, lo mòrra, ḿî̆dîḿî ńò tho, mihnè kî b́ulakhwa,

¹³ barasă zî gî̄ ḿî da ahiphă nè nu agî̄ hlî̆htaphlò̆htakò̆ d́ŏ muni dini nu. D́ŏnu dini gō gohtaikò̆ kî hmî, kî hmî gî̄ dî̄tcakò̆ bija dèbwè dèbwè ladū adèmè.

¹⁴ Zi hi za phă gò̄ sò̆hto hme ma d́ō, zi gī nib́è zô sô zè hlè̆,

¹⁵ agè̄ kè̆ ma dō, zu gū su gā pakò̆, kî zî neb́î̆cè gô̄ hlô̆hta nòthò̆ hnò̆nu, zî gî̄ ḿîkò̆ bija acab́ô̆ hmîgè̄ dèbwè nu.

¹⁶ Thĭ ḿîgè Kib́ĭcè aZarādo kî Kib́ĭcè Atha Tcahtĭ ò thĭ bu nu thĭ dî thîhè̆gè ńò ā?

¹⁷ Bija dèbwèbwè gā phrakè̆ ma Kib́ĭcè aZarādo d́ō, Kib́ĭcè gā phrakè̆ kò̆ cè. Manè̄, Kib́ĭcè Azarā ḿî atcahtĭ, kî thĭ ḿî Zarādo anu dawa nu.

¹⁸ Bija tò d́òplèlage dò̆ b́è ane ńò. Gomo kèḿè ḿè; d́ŏ thĭ klè̆ dèbwèbwè gō gomola ane abla, acab́ô̆ Lākho adètcahtî nu d́ō, cè kè̄ b́è gomolage ze ne acab́ô̆ bija agudu nu dukhlŭkî za gā bla thĕbwe nu.

¹⁹ Manè̄ kòd́òdo dō, Lākho ajo tè b́è adèzadèbla ḿî Kib́ĭcè anikhĭ agudunapă lò acè̆ nu. Acab́ô̆ Cè Tcahtĭ d́ò, “B́ĭcè pôni bija azaabla tòcò d́ŏ zè dèthîhè̆ kî ze ne,” nu.

²⁰ Kî alewe dôhmô̆ d́òwe, “D́ŏ Kib́ĭcè ahlò̆mò̄ nu, bija adèthîhè̆ ḿî ahnahnă lò nu Kib́ĭcè thîhè̆ lò,” nu.

²¹ Mègōnu d́ō, bija dèbwè̆ dò mò d́ò ane d́ŏ adèzadèbla acè̆ dèbwè̆ ńò. Ahnèhnè nu, dèlŏcăcè ḿî thĭ è̆ lò.

²² Păulu, Apò̆llòs, Kĕphas, Lākho, dèò kî dèthĭ, khŏnujo kî alekă ḿî lŏ thĭ zô thĭ bwè lò,

²³ thĭ ḿî Krĭstu è̆, kî Krĭstu ḿî Kib́ĭcè è̆.

« Zam'mbuyo

Ena »

Bible Society of Myanmar

Titsatireni:

Maulalo othandizidwa

Zotsatsa