Yakobo 1 - Chinsenga New Testament

¹ Ni newo Yakobe, muzya wa Mulungu na wa Asikulu Yesu Kristu. Nukupani moni mwewo ŵanthu ŵa Mulungu, ŵa mikoka kumi na iŵili, ilumwazyikane ku vyalo vosiyana–siyana.

Cicetekelo na nzelu

² Mwenekwasu, muwotemwa cendi keno muyesewa na matamano wosiyana–siyana.

³ Pala muziŵa kuti keno muyesewa mu cicetekelo canu, muyaluka wokoselela.

⁴ Koma kukoselela uko kuwokata nchito yake yokwanilisha, kuti muŵe wozulikizya, wotwesha ngako na wosapeleŵela pa kanthu kalikonse.

⁵ Muyakine mwa mwewo akasoŵa nzelu, asenge kwa Mulungu, nipo akapokele, pakuti Mulungu otwala kwa wonse mu winji na mosawelela ku vuli.

⁶ Koma wosenga wala asenge mocetekela, na mosakayika konse. Pala munthu wokayika–kayika ali ngani matambazi ŵa pa cimmana, ŵamene ovunduka na kuŵinduka na mphepo.

⁷ Munthu woteti osati awolingilila kuti azeapokele kanthu kwa Asikulu yayi,

⁸ pakuti yeve ni wa mitima iŵili, ni wosankhazikika pa vocita vake vonse.

Uzingwi na cuma

⁹ Wala muyasu wolicefya atembezye Mulungu pawayimyiwa.

¹⁰ Nipo wala wolemela naye soti atembezye Mulungu pamene waselushiwa, pakuti azeasile ngani liluŵa.

¹¹ Zuŵa yufuma na kupya kwake, nipo yuyumisha uzu. Liluŵa yala yutondoka, kuwama kwake kusila. Motetyo, soti moyo wa olemela wala uzeusile ali pakati pa vocita vake.

Kuyesewa

¹² Ni woshukishiwa munthu okoselela pakuyezyewa, pakuti keno wacimfya, azeapokele cilambu ca moyo, Asikulu cecilayizya ŵanthu omutemwa.

¹³ Pakuyezyewa munthu, osati awolaŵila kuti, “Mulungu oniyika mu mayezyelo.” Pala Mulungu angayezyewelini na vinthu viyipa, nipo yeve yeka oyikalini munthu aliyense mu mayezyelo.

¹⁴ Koma munthu aliyense oyezyewa pakukopewa nokatiwa na cilako–lako cake.

¹⁵ Pamene apo cilako–lako cala cuvyala ucimo. Lomba ucimo wala ukakula msinkhu uvyala imfwa.

¹⁶ Osatalizyiwa wenye, mwenekwasu wotemweka.

¹⁷ Cawanzi ciliconse ciweme cufumila Kululu, kwa Atata, Mulungu Nyamalenga wa vonse vosanikila mululu. Ŵeve oyalukalini na patontho kumo, nipo kuŵala kwawo kuyalukalini.

¹⁸ Mu kupangwa kwake mwine, etipa moyo kupitila mu malizu ŵake ŵa vyendi, kuti pakati pa volengewa vake vonse, sewo tiŵe ngani vitwalo votatika.

Kumvwa nocita vakulaŵila Malizu ŵa Mulungu

¹⁹ Enekwasu wotemweka, katishani malizu aŵa: munthu aliyense awoyendesha kumvwa, koma kulaŵila awosisikanya, nipo kukalipa awosisikanya soti.

²⁰ Pala munthu wokalipa ofwikapolini pa cilungamo ca Mulungu.

²¹ Ni cikomo cake lekani kuyoŵelela ciliconse conyansa, na luyipilwa uliwonse. Muŵapokele molezya mtima malizu ŵecikomola Mulungu mwa mwewo, pakuti niye angakupulumusheni.

²² Osalitalizya wenye pakumvwa tyala Malizu ŵa Mulungu, koma muwocita vakulaŵila malizu awo.

²³ Pala munthu akumvwa tyala malizu, osacita vawamvwa, ali ngani munthu wololesha cinso cake mu cilola.

²⁴ Lomba enze kuti akaliwona, enzofumapo, posapita kansita enzoluŵa mwakuwonekela.

²⁵ Matetulo ŵa Mulungu ni aweme nipo soti akupa ŵanthu ufulu. Munthu opokela Matetulo ŵawo noŵakonkha luweme – munthu okumvwalini tyala malizu noŵaluŵa, koma ocita vakulaŵila malizu awo – wamene uyo Mulungu azeamushukishe pa vocita vake vonse.

²⁶ Keno muyakine osamala va Mulungu, koma okuŵa wosasunga pa kamwa, cilombelo cake cala ciliye nchito, nipo oyingolitalizya wenye.

²⁷ Cilombelo ca vyendi na ca ngwilyo pa menso pa Mulungu Atata ni ici: kusamala ŵana ŵa nchete na anyankufwilwa pa matamano ŵawo, nipo soti kulisunga luweme, kuyopa kuyifyiwa na viyipa va pa calo ca pansi.