M. Marko 1 - Chinsenga New Testament

Uŵilizyi wa Yohane Mbatizi

¹ Kutatika kwa Malizu Aweme ŵa Yesu Kristu, Mwana wa Mulungu.

² Ngani Malembo ŵa Mneneli Yesaya olaŵila kuti, “Nutuma mtumiki wangu pa nthangu pako, kuti akawamyiletu njila yakuzopitilamo wewo.

³ Lizu ya oŵilikizya mu cipululu, kuti, ‘Wamyani njila yakuti akapitemo Leza. Lungamikani njila yakuti azepitemo.’”

⁴ Ivi vecitika cendi pecifwika Yohane Mbatizi mu cipululu, notatika kuŵilizya. Enzowuzya ŵanthu kuti, “Lekani viyipa vanu, mubatiziwe, na kuti Mulungu akulekeleleni ku macimo ŵanu.”

⁵ Ŵanthu ofumila mu calo ca Yudeya na ŵa ku Yelusalemu enzokuya kwake. Ŵeve enzolaŵila kuti akawulula macimo ŵawo, yeve enzoŵabatiza mu mmana wa Yolodani.

⁶ Yohane enzovwala vovwala va usako wa ngamila, nomangila mu luwunda bande wa cikumba, nipo enzokulya zombe na uci wa mu sanga.

⁷ Mu kuŵilizya kwake enze kuti, “Pa vuli pangu alipo akuza wa mphamvu wopula newo, mwakuti newo nine wosawamila kuŵelama nomangulula myando za nkhwaŵilo zake.

⁸ Newo nukubatizani na manzi, koma yeve azekubatizeni na Mzimu Mtuŵa.”

Kubatiziwa na kuyezyewa kwa Yesu

⁹ Paliyopite nsita ikulu Yesu ewela kufumila ku Nazaleti, ku munzi wa ku Galileya, nipo ebatiziwa na Yohane mu mmana wa Yolodani.

¹⁰ Penzofuma mu manzi Yesu ewona Kululu kwekezuka, na Mzimu Mtuŵa eseluka pa yeve owoneka ngani nkhunda.

¹¹ Tetyo, kwimvwika lizu yofumila Kululu yolaŵila kuti, “Wewo niwe Mwana wangu wotemweka. Nukondwela nawe ngako.”

¹² Nsita yamene iyo Mzimu Mtuŵa etwala Yesu ku cipululu.

¹³ Kwecinkhala masiku makumi anayi, penzoyezyewa na Satana. Kwenze nyama za mu sanga, koma angelo enzomutumikila.

Yesu otatika nchito yake ku Galileya

¹⁴ Yohane pecipozewa mu jele, Yesu eluta ku Galileya kuyoŵilizya Malizu Aweme ŵa Mulungu.

¹⁵ Enze kuti, “Nsita yakwana; Ufumu wa Mulungu uli pafupi. Lekani viyipa vanu nocetekela Malizu Aweme aŵa.”

Yesu oyita okata masaŵi anayi

¹⁶ Yesu penzoyenda mu mbali mwa Cimmana ca Galileya, ewona ŵanthu aŵili, Simoni na mkwawo Andeleya, enzopoza makombe pa manzi, pakuti enze okata masaŵi.

¹⁷ Yesu eŵawuzya kuti, “Mwewo munikonkhe, nikakusambizyeni kuŵa okata ŵanthu noŵaleta mu Ufumu wa Mulungu.”

¹⁸ Nipo pamene apo esiya makombe ŵawo nomukonkha.

¹⁹ Peciyenda patontho Yesu ewona Yakobe na Yohane ŵana ŵa Zebedayo, aŵa enze mu wato, enzowamya makombe ŵawo.

²⁰ Nsita yamene iyo yeve eŵayita. Pamene apo esiya wato na awusu wawo ŵa Zebedayo pamo na ŵanthu aganyu, nokonkha Yesu.

Yesu opozya munthu wokatiwa na ciŵanda

²¹ Wonse aŵa eluta ku Kapilinamu. Peyifwika nsiku ya Sabata, Yesu eloŵa mu kacisi wa Ayuda notatika kusambizya.

²² Vosambizya vake veŵakata ngako mtima ŵanthu, cikomo cakuti enzosambizya mowonesha ulamulilo, kusiyana na mwenzocitila Asambizyi ŵa Matetulo.

²³ Mu kacisi wa Ayuda mwala mwenze munthu wokatiwa na ciŵanda. Elaŵila moŵilikizya kuti,

²⁴ “Kansi takuyifyilani cinji Yesu wa ku Nazaleti? Kansi mwewela kuzoticeneka? Nakuziŵani, nimwe Mtuŵa wala wa Mulungu.”

²⁵ Koma Yesu ecimula ciŵanda kuti, “Nkhala celele, fuma mwa uyu munthu.”

²⁶ Apo ciŵanda cala cemusungʼuzya ngako wala munthu, nipo ceŵilikizya koyofya, nofuma.

²⁷ Ŵanthu wonse ŵala etatika kulaŵila, nokonshana kuti, “Kansi ici ni cinji? Kansi ni masambizyo ŵa lomba! Uyu munthu ali na ulamulilo pa viŵanda nipo vumumvwa cendi.”

²⁸ Mmangu mbili yake yeŵilikila paliponse ku citwa conse ca ku Galileya.

Yesu opozya ŵanthu anyinji

²⁹ Pa vuli pake Yesu, pamo na Yakobe na Yohane, efuma mu kacisi wa Ayuda nakuyoloŵa mu ngʼanda ya Simoni na Andeleya.

³⁰ Anyavyala ŵake wa Simoni enze lele, enzolwala malungo. Yesu pecifwika ŵanthu emuwuzya va ulwele wawo.

³¹ Yesu eluta noŵakata pa kwanja nowawusha, nipo malungo ŵala esila. Pamene apo ŵeve etatika kuŵawamyila cakulya.

³² Mcingulo mwamene umo, zuŵa peyiloŵa ŵanthu wonse na ayawo otamana, na okatiwa na viŵanda ewela kwa Yesu.

³³ Ŵanthu ŵa mu munzi wonse ewunjikana panja pa ngʼanda.

³⁴ Yesu epozya anyinji enzotamana na malwele wosiyana–siyana, nipo efumya viŵanda vinyinji. Koma viŵanda vala evilesha kuwulula, cikomo cakuti venzomuziŵa.

Yesu akuyoŵilizya ku Galileya

³⁵ Mmamawa, kukaliye kuca, Yesu ewuka noluta kwa yeka kusapita–pita ŵanthu, kwamene uko elomba.

³⁶ Simoni na ayakine eciyomusakila.

³⁷ Pecimufwana emuwuzya kuti, “Ŵanthu wonse okusakilani.”

³⁸ Koma yeve eŵawuzya kuti, “Tiyeni tilute ku minzi iyakine kufupi na kuno, nikaŵilizye malizu nako, pakuti niye cenizila.”

³⁹ Tetyo, eluta noŵilizya mu makacisi ŵa Ayuda ku Galileya konse, nipo enzofumya viŵanda.

Yesu opozya munthu wa mambombo

⁴⁰ Munthu muyakine wa mambombo ewela kwa Yesu. Emufukamila nomusenga. Elaŵila kuti, “Mukapangwa munganisuke.”

⁴¹ Yesu emucitila citinthi. Eyimya kwanja nomukumya nolaŵila kuti, “Nupangwa, sukiwa!”

⁴² Pamene apo mambombo ŵala esila, nipo esukiwa cendi.

⁴³ Lomba Yesu emuwuzya kuti alute, nipo na malizu ŵa mphamvu

⁴⁴ elaŵila kuti, “Cenjela, usawuzye aliyense va ici, ingoluta kwa wansembe akakuwone, nipo ukatwale nsembe yecilamula Mose. Yamene iyo iŵe mboni yosimikizya kuti wapola cendi.”

⁴⁵ Koma wala munthu pecifuma pala eluta notatika kuŵilizya paliponse va nkhani yala, ni cikomo cake Yesu aliyewonekele soti ku ŵanthu ŵa mu minzi iliyonse. Enzonkhala kuyakine, ku malo kosapita–pita ŵanthu, koma ŵanthu enzokuza mphela kwa yeve kufumila ku vitwa vinyinji.