Mavundululiwe 1 - Chinsenga New Testament

¹ Cokundululiwa ca Yesu Kristu, cecimupa Mulungu kuti awoneshe ku nthumi zake vinthu vupangwika kucitika kwa lombapano. Eviziŵisha potuma mngelo wake ku muzya wake Yohane,

² ocitila umboni vilivonse veciwona: Malizu ŵa Mulungu na umboni wa Yesu Kristu.

³ Ni woshukishiwa oŵelenga malizu ŵa vonenela ivi, nipo ni woshukishiwa ŵala ovimvwa noyika mu mtima vilulembewe mwamene umo, pakuti nsita yakuti vicitike ili pafupi.

Moni ku mipingo isanu na iŵili

⁴ Ni newo Yohane, nulembela mipingo isanu na iŵili ya ku citwa ca Asiya. Cisomo kwa mwewo na mtendele kufumila kwa yeve alipo na enzepo nipo watiazeŵepo, na ku mizimu isanu na iŵili ili pafupi na mpando wake wa cifumu,

⁵ na kwa Yesu Kristu mboni yocetekeleka ali wotatika kuwuka kwa akufwa, ali soti mfumu yolamulila mafumu wonse ŵa pa calo ca pansi. Yeve otitemwa, nipo na milopa yake etimangulula ku macimo ŵasu.

⁶ Yeve etiyalusha ŵa ufumu na ŵansembe kuti awomutumikila Mulungu Atata. Tetyo, Yesu Kristu wapokela ulemelelo na mphamvu zolamulila mpaka nsita zosasila. Amen.

⁷ Lolesheshani! Akuza mu mikumbi! Aliyense akamuwone, cukanga ŵala emulasa, na mitundu yonse ya pa calo akalile cikomo ca yeve. Viŵe tetyo. Amen.

⁸ Asikulu Mulungu olaŵila kuti, “Newo nine Alefa na Omega wotatikila na wosilizyila, wamene alipo na wamene enzepo nipo watiazaŵepo wa mphamvu zonse.”

Yohane owona Yesu menso na menso

⁹ Newo, Yohane munekwanu na muyanu mu Ufumu, na mu matamano na kupilila kotangʼa kwa enekwasu mwa Yesu, eniyika pa cilumba ca Patimosi, cikomo ca kuŵilizya Malizu ŵa Mulungu nocitila Yesu umboni.

¹⁰ Pa Sabata nekatiwa na Mzimu Mtuŵa, na kumvwa ku vuli kwangu lizu ya mphamvu ngani kulila kwa lupenga.

¹¹ Lizu iyo yelaŵila kuti, “Ivi vauwona uvilembe mu buku nipo utumizye kwa mipingo isanu na iŵili iyi: wa ku Aifeso, wa ku Similina, wa ku Pelegamo, wa ku Tiyatila, wa ku Salidi, wa ku Filadelofiya na wa ku Lawodikeya.”

¹² Penecewuka kuti niwone enzonilaŵizya, newona ndodo za golide zoikapo nyale zisanu na ziŵili.

¹³ Pakati pake pa ndodo za nyale izo newona muyakine owoneka ngani “ Mwana wa Munthu.” Enze evwala mkhanjo utali, nomanga bande wa golide pa nganga.

¹⁴ Sisi yake yenze mbee ngani thonje utuŵa ngako; menso ŵake ngani mulilo woyaka.

¹⁵ Mendo ŵake enze ngani mkuwa wotuŵishiwa mu ngʼanjo ya mulilo; lizu yake yenzoŵilikizya na zungo ngani mulilimo wa manzi anyinji.

¹⁶ Ku kwanja kwake kwendi enzotakule nthandala zisanu na ziŵili, nipo mu kamwa mwake mwenze ngwandali yonola konse–konse yofumilila kunja. Cinso cake cenze cowala ngani zuŵa ya mzuŵa.

¹⁷ Penemuwona, nepona pa mendo ŵake ngani munthu wakufwa. Koma yeve eniyika kwanja kwake kwendi nolaŵila kuti, “Osayopa. Wotatika nipo wosilizya ni newo.

¹⁸ Wa moyo wala ni newo. Necifwa, koma lomba nili moyo mpaka nsita zosasila. Imfwa na Gehena mfungulo yake ili na newo.

¹⁹ Lemba lomba vawawona, niye kuti vucitika lomba niye vativikacitike ku nthangu.

²⁰ Cisinsi ca nthandala zisanu na ziŵili zawawona ku kwanja kwangu kwendi, na ciyakine cala ndodo za golide za nyale zisanu na ziŵili, tanthauzo yake ni iyi: Nthandala zisanu na ziŵili ni angelo ŵa mipingo isanu na iŵili; ndodo za golide zisanu na ziŵili zala ni mipingo isanu na iŵili yala.”