Aroma 1 - Chinsenga New Testament

¹ Ni newo Paulo, muzya wa Kristu Yesu, woyitiwa kuŵa nthumi nopatuliwa kuŵa woŵilizya Malizu Aweme ŵa Mulungu.

² Malizu Aweme ŵecilayizya kale kupitila mu aneneli ŵake mu Malembo Atuŵa,

³ olaŵila va Mwana wake. Powona umunthu wake, kolo yake yenze Davide,

⁴ nipo ewoneshewa kuti ni Mwana wa Mulungu peciwukishiwa kwa akufwa na mphamvu ya Mzimu Mtuŵa. Ni Yesu Kristu Asikulu ŵasu.

⁵ Kupitila mwa yeve tepokela cawanzi na unthumi kuti tikoyita ŵanthu kufuma pakati pa ŵa mitundu yonse kuti akomvwila kufumila mu cicetekelo.

⁶ Na mwewo kumo muli pakati pa ŵala woyitiwa kuti aŵe ŵa Yesu Kristu.

⁷ Tetyo, nukulembelani mwewo monse ŵa ku Roma muli wotemweka na Mulungu noyitiwa kuti muŵe atuŵa mtima: Mulungu Awusu wasu na Asikulu ŵasu Yesu Kristu akucitileni cisomo nokupani mtendele.

Paulo opangwishisha kuyowona Akristu ŵa ku Roma

⁸ Cotatika, nutembezya Mulungu wangu kupitila mwa Yesu Kristu mu malo mwa mwewo monse, cikomo cicetekelo canu culaŵiliwa calo conse ca pansi.

⁹ Mulungu ni mboni yangu. Numtumikila na mtima wangu wonse, poŵilizya Malizu Aweme olaŵila va Mwana wake. Woziŵa mwanukulukanilani kanyinji–kanyinji mu malombelo ŵangu pa nsita zonse.

¹⁰ Nusenga kuti lomba mwa kupangwa kwa Mulungu njila ivulike yakuti niwele kwa mwewo.

¹¹ Nupangwishisha kuti nikuwoneni kuti ningayaŵane namwe cawanzi ca Mzimu kuti cikupangeni kuŵa wotangʼa.

¹² Canutanthauza ni cakuti tonse mwewo na newo tingakoseshane na cicetekelo yumo na muyake.

¹³ Mukokumbuka, mwayangu, kuti nsita zinyinji naŵa nukonzeka kuzokuyendelani, koma cinthu ciyakine caŵa cunilesha kucita tetyo mpaka lomba. Nupangwa soti kuŵa na vitwalo pakati pa mwewo ngani mwenecitila pakati pa ŵanthu ayakine asali Ayuda.

¹⁴ Nine nyanchito woŵilizya ku ŵanthu wonse, ku osambila na osasambila, ku wonse wocenjela na opusa.

¹⁵ Ni cikomo cake, nupangwishisha kuzoŵilizya Malizu Aweme na kwa mwewo soti muli ku Roma.

Mphamvu ya Malizu Aweme

¹⁶ Nikumvwalini nsoni na Malizu Aweme. Cikomo cakuti ni mphamvu ya Mulungu yopulumusha wonse wocetekela kutatikila Ayuda nokonkhapo asali Ayuda.

¹⁷ Malizu Aweme aŵa owonesha cilungamo cakutipa Mulungu. Ici cilungamo cuwela kufuma kotatikila mpaka kosilizyila na cicetekelo. Pala Malembo olaŵila kuti, “Ni munthu ofwaniwa kuŵa wolungama mwa cicetekelo cake, watiakaŵe na moyo cendi.”

Ukali wa Mulungu pa ŵanthu

¹⁸ Ukali wa Mulungu uwululika kufuma Kululu, cikomo ca ŵanthu asasamala va Mulungu na kusoŵa cilungamo. Kusoŵa cilungamo kwawo kuŵakangisha kuziŵa vyendi.

¹⁹ Mulungu oŵakalipila, cikomo cakuti vangaziŵe munthu pa va Mulungu vili patuŵa pakuti Mulungu mwine evipanga kuŵa patuŵa kwa ŵeve.

²⁰ Pakuti kufumila pecilengewa calo ca pansi ŵanthu aŵa woziŵa kusawoneka kwa Mulungu, niye kuti mphamvu zake zosasila na umulungu wake. Aŵa woziŵa powona vecilenga Mulungu tetyo aliye kolewela.

²¹ Pakuti cukanga kuti enzomuziŵa Mulungu, enzomutembezyalini keno kumupa mcinzi umuwamila, koma malingililo ŵawo enzonkhala aliye phindu na mitima yawo yopusa yenzonkhala yofifyiwa.

²² Cukanga kuti oliyezya ŵa nzelu, ni wopusa.

²³ Mu malo molambila Mulungu wa nsita zosasila, ŵeve olambila vinthu vupangiwa vulingana ngani ŵanthu akufwa, keno tunyoni keno vinyama, koma soti viyakine vukalaŵa.

²⁴ Tetyo, Mulungu eŵaleka kuti awocita vinthu viyipa vayupangwa mitima yawo, nipo ocitana vomvwisha nsoni pa miŵili yawo.

²⁵ Esinthisha vyendi va Mulungu na wenye, nolambila notumikila vinthu volengewa kupula Nyamalenga, opangwika kutembezyewa nsita zonse. Amen.

²⁶ Cikomo ca ici, Mulungu eŵaleka ku vokumbwila vomvwisha nsoni. Cukanga anakazi esiya civyaliko cawo nokumbwilana ŵeka–ŵeka, mwacisapangwikila kuŵa.

²⁷ Cimozi–mozi analume nawo eleka kukumbwila anakazi ngani mwa civyaliko, okumbwilana ŵeka–ŵeka. Enzocita vocitisha nsoni, tetyo oziyitila cilango cowamila molingana na vocita vawo vosakonkholoka.

²⁸ Pakuti enzolingilila kuti kukonkha Mulungu ni kupusa, Mulungu eŵalekelela kuti awocita vopusa vawo.

²⁹ Mitima yawo iluzule na vinthu vinyinji viyipa ngani kuyipa, utani, na wenye. Oyingolingilila va luyipilwa, vopaya ŵanthu, va ndewo, votalizya wenye, na va luyipilwa. Ocita unyaluwamya,

³⁰ woyikililapo, nipo otinkhana na Mulungu. Na msikila, ni wolikuzya nomeka. Osakila–sakila njila za lomba zocitilamo viyipa, omvwilalini avyazi ŵawo.

³¹ Ni wopusa, osacetekeleka, onkhala na moyo, aliye lusungu.

³² Oyiziŵa tetulo ya Mulungu yakuti ŵanthu ocita voteti owamila kufwa, koma ŵeve ocita vamene ivo, nipo ozomezya ŵanthu ayakine ovicita.