Akolose 1 - Chinsenga New Testament

¹ Ni newo Paulo, nthumi ya Kristu Yesu mu kupangwa kwa Mulungu, na Timoteyo mkwasu.

² Tulembela mwewo wosaluliwa na Mulungu onkhala kwa Akolose, akwasu wocetekeleka mwa Kristu. Mulungu Awusu wasu akucitileni cisomo nokupani mtendele.

Paulo otembezya Mulungu cikomo ca Akolose

³ Tutembezya Mulungu, Awisi wa Asikulu ŵasu Yesu Kristu nsita zonse patumulombelani.

⁴ Tutembezya cikomo cakuti tamvwa kuti mucetekela Kristu Yesu, nipo mutemwa atuŵa mtima wonse.

⁵ Musangalala cikomo cakuti muziŵa kuti muli na cicetekelo cikulu. Mwecimvwa kale va cicetekelo mu malizu ŵa vyendi, ali Malizu Aweme.

⁶ Malizu Aweme awela kwanu, otwala vitwalo pa calo conse ca pansi, ngani mwakucitila soti pakati panu, kutatikila nsiku yemwecimvwa nomvwisha cisomo ca Mulungu mu vyendi.

⁷ Mwecimvwa ivi kufuma kwa Epaflasi, nthumi muyasu wotemweka. Yeve oseŵenzela Kristu mocetekeleka mu malo mwanu.

⁸ Etiziŵisha va cinthemwa canu mu Mzimu.

⁹ Ni cikomo cake, kutatikila pa nsiku yeticimvwa va mwewo tikaliyoleka kumulombelani kuti Mulungu amuzuzyeni na nzelu na malingililo kuti mumvwishishe vakupangwa yeve.

¹⁰ Motetyo, muyezye kuyenda mu njila zakupangwa Asikulu, noŵatemwesha pa vonse, pa kukata luweme nchito zosiyana–siyana, moyo wanu uzeuwoneshe vitwalo, nokula mu nzelu za Mulungu.

¹¹ Tulomba kuti Mulungu akutangʼisheni na mphamvu yake ya mcinzi na mitima yofewa na yosangalala.

¹² Nipo tulomba kuti totembezya Atata, ekupangani mwewo kuti muzemupokele nawo mashukisho wonse ŵakusungila ŵanthu ŵawo mu Ufumu woŵala.

¹³ Etizyosha ku mphamvu ziyipa za mu mfinzi notileta mu Ufumu wa Mwana wake wakutemwa.

¹⁴ Mwa yeve, Mulungu etinunula, niye kuti etilekelela macimo ŵasu.

Unkhalo na nchito za Kristu

¹⁵ Kristu niye cimvwili–mvwili ngaco–ngaco ca Mulungu wosawoneka. Yeve niye mwana wake wotatika, wopingula volengewa vonse.

¹⁶ Kupitila mwa yeve, Mulungu elenga vonse va Kululu na va pano pansi, vowoneka na vosawoneka, mafumu, akulu–akulu, ŵa maulamulilo na ŵa mphamvu ayakine wonse. Mulungu elenga vonse kuwelela mwa yeve.

¹⁷ Yeve enzepo vinthu pepenzeve, mwa yeve vinthu vonse vukatizyana pamo.

¹⁸ Yeve niye soti Mutu wa Mpingo, uli muŵili wake. Niye kutatika kwake, wotatika mwa owuka kwa akufwa, kuti pa vonse yeve aŵe wopula cendi.

¹⁹ Kwiwamila Mulungu kuti umulungu wake wonse uŵe mwa Kristu.

²⁰ Mwa yeve Mulungu epangwa kuleta pamo vinthu vonse na yeve mwine, va pano pansi na va Kululu. Ecita tetyo poleta mtendele popitila mu imfwa ya Mwana wake pa mtanda.

²¹ Mwewo kale mwenze kutali na yeve, na malingililo ayipa, nocita viyipa.

²² Koma lomba Kristu wakuletani pamo pa imfwa yake, kuti amutwaleni atuŵa, aliye ciŵanga keno ciyipa ciliconse.

²³ Koma lomba mukokuŵa onkhazikika na otangʼa pa maziko ŵa cicetekelo canu, osakankhiwa pa cilolelo cofumila ku Malizu Aweme ŵemwecimvwa. Malizu Aweme aŵa aŵilizyiwa ku ŵanthu ŵa pa calo conse ca pansi, nipo Mulungu niye enipa newo, Paulo, nchito ya utumiki.

Paulo mwakutumikila mpingo

²⁴ Lomba nasangalala kuti numusaukilani, pakuti pakumvwa voŵaŵa ivo nusilizya mu muŵili mwangu vosilizya va mu matamano Akristu kuyavya muŵili wake, niye kuti Mpingo.

²⁵ Niye kuti newo nine mtumiki wa Mpingo wamene uyo, pakuti Mulungu niye enipa nchito yoŵilizya malizu ŵake mwa mphamvu.

²⁶ Malizu awo ni cisinsi ca pansi cenze cofisika kufumila ku maluko wonse, koma lomba Mulungu eŵawululila atuŵa mtima.

²⁷ Cilingo ca Mulungu nikuziŵisha ŵanthu kuwama kwake kwa cisinsi ico, na mcinzi wake pakati pa ŵanthu asali Ayuda. Cisinsi ico ni cakuti Kristu ali mwa mwewo, nipo yeve okupani cicetekelo ca kuzopokela mcinzi.

²⁸ Kristu wamene uyo niye watuŵilizya. Tucenjezya nosambizya ŵanthu wonse na nzelu zatili nazo. Pakuti tupangwa kuyaluzya munthu aliyense kuti aŵe muweme mwa Kristu.

²⁹ Ni cikomo ca ici canuseŵenzela ngako na mphamvu ya Kristu yamene yuseŵenza mwa newo.