Ahebrayo 1 - Chinsenga New Testament

Malizu ŵa Mulungu kupitila mu Mwana wake

¹ Macezo pa nsita zinyinji, na mwa njila zinyinji, Mulungu elaŵila na makolo ŵasu kupitila mwa aneneli,

² koma masiku ŵano wosilizya walaŵila nase tonse kupitila mwa Mwana wake, wamene kupitila mwa yeve elenga calo conse, wamene soti weciyika kuŵa mwine wa vinthu vonse.

³ Yeve niye kuŵala kowonesha ulemelelo wa Mulungu, nipo yeve ni cimvwili–mvwili ngaco–ngaco ca Mulungu. Yeve woyendesha vinthu vonse na malizu ŵake ŵa mphamvu. Pecituŵisha nolekelela macimo ŵa ŵanthu wonse, eciyokuŵa Kululu, ku kwanja kwendi kwa Mulungu mwa ulemelelo.

Mwana wa Mulungu wopula angelo

⁴ Mwana wa Mulungu ni wopula angelo, ngani zina yecimupa Mulungu yupula zina ya angelo.

⁵ Pakuti Mulungu aliyowuzye mngelo wake aliyense kuti, “Wewo niwe Mwana wangu, lelo nakuvyala.” Keno kuti, “Nikaŵe Awusu wake, na kuti yeve akaŵe Mwana wangu.”

⁶ Koma penzotuma Mwana wake wawiya pano pansi, elaŵila soti kuti, “Angelo wonse ŵa Mulungu awomulambila.”

⁷ Nipo va angelo elaŵila kuti, “Oyalusha angelo ŵake kuŵa mphepo, na angelo ŵake kuŵa mulilo woyaka.”

⁸ Koma ku Mwana, Mulungu olaŵila kuti, “Mwewo Mulungu, Mpando wanu wa cifumu uŵe mpaka nsita zosasila; cilungamo niye cili ngani ndodo ya cifumu mu ulamulilo wanu.

⁹ Mwatemwa cilungamo notinkhana na ciyipa; ni cikomo cake Mulungu, Mulungu wanu, wakuzozani na mafuta ŵa cimwemwe, kupula ayanu wonse.”

¹⁰ Elaŵila soti kuti, “Mwipanga maziko ŵa calo potatika, mwewo Asikulu, nipo Kululu ni nchito ya manja ŵanu.

¹¹ Ivi vikasile, koma mwewo mukasale; vonse ivi vikasilile ngani covwala.

¹² Mukavipeteke ngani mukanjo, nipo vikayaluke ngani covwala. Koma mwewo muyalukalini; vyaka vanu vikasilelini.”

¹³ Kansi ni ku mngelo wotyani kwecilaŵila kuti, “Nkhala ku kwanja kwangu kwendi, mpaka nikayalushe alwani ŵako kuŵa cokandapo mendo ŵako.”

¹⁴ Angelo wonse ni mizimu yotumikila tyala, yecituma Mulungu mu malo mwa ŵala akuzopokela cipulumusho.