Agalatiya 1 - Chinsenga New Testament

¹ Ni newo Paulo nthumi, wamene kuyitiwa kwangu kuliyofumile ku ŵanthu keno mu nzelu za ŵanthu, koma kwefuma kwa Yesu Kristu na Mulungu Awusu wasu, emuwukisha kwa akufwa.

² Newo na enekwasu wonse ŵanili nawo pano tutumizya moni ku mipingo ya ku Galatiya:

³ Mulungu Awusu wasu na Asikulu ŵasu Yesu Kristu akucitileni cisomo nokupani mtendele.

⁴ Kristu elitwala yeka kuti atimangulule ku macimo ŵasu, na kuti atimangulule ku viyipa va luko ino, ecita tetyo kutwesha cenzopangwa Mulungu Awusu wasu.

⁵ Mcinzi uŵe kwa Mulungu mpaka nsita zosasila. Amen.

Kuliye malizu aweme ayakine

⁶ Nukanganishiwa navo vamucita, kuti mmangu–mmangu musiya Mulungu ekuyitani na cisomo ca Kristu, nozomela malizu aweme ayakine.

⁷ Koma ni malizulini ngawo–ngawo. Pali ŵanthu ayakine okupumvyani, opangwa kuyaluzya Malizu Aweme ŵa Kristu.

⁸ Koma keno sewo ŵamene keno mngelo wa Kululu oŵilizya kwa mwewo Malizu ayakine osiyana na ŵatuŵilizya sewo, lekani apinguliwe notwaliwa ku ngʼanjo yosasila.

⁹ Nalaŵila kale, koma nulaŵila soti kuti oŵilizya Malizu ayakine osiyana na ŵala ŵemwipokela, lekani apinguliwe notwaliwa ku ngʼanjo yosasila.

¹⁰ Kansi polaŵila ivi nupangwa kuti ŵanthu azomekezye? Yayi, canupangwa ni cakuti Mulungu azomekezye. Kansi nupangwa kutemwesha ŵanthu? Koma keno nenzopangwa kucita tetyo, sembe nenzelini nyanchito wa Kristu.

Paulo mwecinkhalila nthumi

¹¹ Nupangwa kukuwuzyani mwenekwasu kuti Malizu Aweme ŵanuŵilizya ni wopangiwalini na ŵanthu.

¹² Niliyoŵapokelele kufuma ku ŵanthu, nipo paliye soti munthu enisambizya, koma Yesu niye eŵawulula kwa newo.

¹³ Mwecimvwa unkhalo wangu kale penenze mu Ciyuda, mwenenzotamanishila mipingo ya Mulungu kosacita lusungu, nenzocita ciliconse kupangwa kuyiceneka.

¹⁴ Nenze pa nthangu pa ayangu wonse aciyuda kucita va mpingo wa ciyuda, nipo nenze wa kapamphu ngako pokonkha myambo ya makolo ŵasu.

¹⁵ Koma Mulungu mwa cisomo cake enisalula, nikaliyovyalika noniyita kuti nikamutumikile.

¹⁶ Tetyo, pecipangwa kuwulula va Mwana wake kwa newo, kuti ningaŵilizye va yeve pakati pa ŵanthu asali Ayuda, niliyokonshe munthu aliyense,

¹⁷ keno kuya ku Yelusalemu kuyowona ŵala enze nthumi nikaliyowela newo, koma peneluta ku Alabiya nozyokela soti ku Damasiko.

¹⁸ Vyaka vitatu pevipita, niluta ku Yelusalemu kuyolaŵizyana na Petulo nipo nenkhala naye masiku kumi na asanu.

¹⁹ Niliyowone nthumi iyakine soti, koma tyala Yakobe mkwawo wa Asikulu.

²⁰ Vanukulembelani ni vyendi. Mulungu woziŵa kuti ni wenyelini.

²¹ Pa vuli pake neluta ku malo woyitiwa kuti Siliya na Silisiya.

²² Pa nsita iyo ŵanthu ŵa mu mipingo ya ku Yudeya enze mwa Kristu enzoniziŵalini.

²³ Enzokumvwa tyala venzolaŵila ŵanthu ayakine kuti, “Munthu uyu enzotitamanisha lomba oŵilizya va cilambilo cenzopangwa kuceneka.”

²⁴ Tetyo, etembezya Mulungu cikomo ca newo.