Afilipi 1 - Chinsenga New Testament

¹ Paulo na Timoteyo, ŵazya ŵa Kristu Yesu. Tulembela wonse atuŵa mtima mwa Kristu Yesu onkhala ku Filipo, pamo na akulu ololesha pa va mpingo na atumiki.

² Mulungu Awusu wasu na Asikulu ŵasu Yesu Kristu akucitileni cisomo nokupani mtendele.

Kutembezya na lombelo

³ Nsita zonse nikakukumbukani nutembezya Mulungu wangu.

⁴ Nsita zonse mu malombelo ŵangu nukulombelani mwewo monse, nulomba na cimwemwe.

⁵ Cikomo ca mwamwaniyavyila mu nchito ya Malizu Aweme kufumila pa nsiku yotatika mpaka lomba.

⁶ Tetyo, nunkhala wosimikizyila kuti Mulungu, etatika nchito iweme mwa mwewo apitilizye mpaka kusilizya pa nsiku yowela soti ya Kristu Yesu.

⁷ Ni coniwamila newo kumvwa moteti va mwewo monse, cikomo cakuti nili namwe mu mtima mwangu; cukanga kuti nili mu maunyolo, kucingilizya nosimikizya Malizu Aweme, mwewo monse tuyaŵana na newo cawanzi ca Mulungu.

⁸ Mulungu angacitile umboni mwanukuyewelani na cinthemwa ca Kristu Yesu mwine.

⁹ Lombelo yangu ni yakuti cinthemwa canu cipitilile kukulila–kulila pamo na nzelu na kumvwisha vinthu vozama.

¹⁰ Tetyo, mukoziŵa kusalula vinthu viweme, kuti pa nsiku yowela Kristu akakufwaneni nimwe atuŵa mtima, na osayifya.

¹¹ Moyo wanu ukaŵe wozula na vitwalo va cilungamo kufumila mwa Yesu Kristu, kuti ŵanthu wonse acinzike nokupa ulemelelo kwa Mulungu.

Muli moyo mukutumikila Kristu

¹² Mwenekwasu, nupangwa kukuziŵishani kuti vanicitikila, vaŵa voyavya kutwala pa nthangu Malizu Aweme.

¹³ Ni cikomo ca ici asilikali wonse olonda linga, na ayakine wonse kuno, aziŵa kuti nili mu jele, cikomo cakuti nine nyanchito wa Kristu.

¹⁴ Kuŵa kwangu mu jele, kwepangisha enekwasu anyinji kutangʼa mtima mwa Asikulu. Nipo oŵilizya Malizu ŵa Mulungu osacita wowa.

¹⁵ Alipo ayakine oŵilizya Kristu cikomo ca ukwa notemwa mkangano. Koma alipo ayakine oŵilizya na malingililo aweme.

¹⁶ Osilizyila oŵilizya cikomo ca cinthemwa, pakuti woziŵa kuti Mulungu eniyika muno kuti nicite nchito yocinjilizya Malizu Aweme.

¹⁷ Koma otatika ŵala oŵilizyalini Kristu mu vyendi. Oyingozitemwa ŵeka, nopangwa kuyikililapo voŵaŵa panili mu jele muno.

¹⁸ Paliye kanthu! Keno oŵilizya mu wenye, keno mu vyendi, malinga Kristu oŵilizyiwa pamene apo nusangalala.

¹⁹ Nilekelini kutemwa poziŵa kuti cikomo ca malombelo ŵanu na poyavyiwa na Mzimu Mtuŵa wopewa na Yesu Kristu, nimangululiwe.

²⁰ Tetyo, nulindila na cicetekelo na mtima wonse kuti nicitelini nsoni. Newo nulindila kuti nikose mtima kulaŵila patuŵa, kuti lomba, ngani nsita zonse, Kristu acinzikiwe mwa newo, cukanga nili na moyo keno kumwalila.

²¹ Kwa newo, kuŵa moyo ni cikomo ca Kristu, kumwalila cingaŵe soti ca phindu.

²² Koma nikaŵa na moyo, kunganipe shuko yakuti ningacite nchito yowonesha vitwalo, nuziŵalini keno ningasalulepo vinji?

²³ Nine wongʼambika pakati pa viŵili ivi: Nupangwishisha kuti nilute kuyokuŵa na Kristu, cili ciweme kupula vonse;

²⁴ koma ni copangwika ngako kwa mwewo kuti niŵe mphela–mphela mu muŵili.

²⁵ Mosushika na ici, nuziŵa kuti niŵepo mphela na kupitilizya na mwewo monse mu citukuko na cimwemwe mu cicetekelo,

²⁶ na soti kuti nikayowela muzaŵe naco cikomo comekela mwa Kristu Yesu, pa cawacita yeve mwa newo.

Paulo oŵawuzya kuti okopilila

²⁷ Cikulu ni cakuti, unkhalo ŵanu uŵe wokatizyana na Malizu Aweme ŵa Kristu. Tetyo, cukanga nikawele keno osawela kuzokuwonani, keno kumvwa tyala va mwewo, nikaziŵe kuti nimwe opanama nji mu mzimu umo, mokatizyana kulwa nkhondo cikomo cocetekela Malizu Aweme,

²⁸ osalola kuti alwani ŵanu akokuyofyani pa kanthu kalikonse, vamene ivi vikaŵasimikizyile kuti ŵeve akacenekeke, koma mwewo mukapulumuke. Mulungu niye ŵatiakakucitileni ivi.

²⁹ Pala yeve ekupani shuko, osati yocetekela tyala Kristu yayi, koma ya kumvwa voŵaŵa cikomo ca yeve.

³⁰ Mwewo soti mulwe nkhondo yala yemweniwona kulwa, yanikalikulwa ngani mwamumvwila.