2 Timo 1 - Chinsenga New Testament

¹ Ni newo, Paulo nthumi ya Kristu Yesu, mu kupangwa kwa Mulungu. Enituma kuti niŵilizye layizyo ya moyo uli mwa Kristu Yesu.

² Nukulembela wewo Timoteyo, mwana wangu wotemweka. Mulungu Atata na Kristu Yesu Asikulu ŵasu akupe cisomo, lusungu, na mtendele.

Paulo otembezya Mulungu

³ Nutembezya Mulungu wanutumikila na cikumbumtima cosanisusha, ngani mwecicitila makolo ŵangu. Nutembezya nokukumbuka kosalekezya mu malombelo ŵangu usiku na mzuŵa.

⁴ Nuyewa kukuwona soti, pakuti nukumbuka misozi yako petenzopatukana. Nipo nikazuzyiwe na cimwemwe pati tikawonane soti.

⁵ Nukumbushiwa kuti cicetekelo cako ni ca vyendi. Cicetekelo ici etatika kuŵa naco ni ambuya ŵako Aloyisi. Anyoko Ayunisi enze naco soti, nipo lomba nukayikalini kuti nawe soti uli naco.

Paulo okosesha Timoteyo mtima

⁶ Ni cikomo cake, nukukumbusha kuti cawanzi cecikupa Mulungu ciwepokela peneyika manja pa wewo, ciyake soti ngani mulilo.

⁷ Pala mzimu wecitipa Mulungu ni Mzimu wosatipa wowa yayi, koma mzimu wotipa mphamvu, cinthemwa, na kuzilesha.

⁸ Tetyo, osamvwa nsoni kucitila umboni Asikulu ŵasu. Usacite soti nsoni keno newo panili mu jele cikomo ca yeve, koma umvwe nawo voŵaŵa cikomo ca Malizu Aweme, na yavyo ya mphamvu za Mulungu.

⁹ Yeve etipulumusha, nipo etiyita kuti tiŵe ŵanthu ŵake. Aliyocite ivi cikomo cakuti sewo tecita nchito iweme yayi, koma cikomo cakuti mwine eziwamyilatu motetyo, nipo notipa cisomo mwa Kristu Yesu, nsita ikaliyotatika.

¹⁰ Koma lomba Mulungu watiwululila ivi kupitila mukuwoneka kwa mpulumushi wasu, Kristu Yesu. Kristu uyu esilizya mphamvu za imfwa, nipo mwa Malizu Aweme, ewonesha patuŵa moyo ungafwelini na patontho kumo.

¹¹ Mulungu eniyika kuti niwe muŵilizyi, nthumi na msambizyi wa Malizu Aweme,

¹² ni cikomo cake nukumvwa manzunzo aŵa. Koma nucitalini nsoni, pakuti nuziŵa nocetekela, nipo nukayikalini kuti yeve angatweshe kunisunga luweme, mpaka nsiku ya cipingulo.

¹³ Ukatishe malizu ŵa vyendi ŵewicimvwa kuli newo, kuti aŵe cisanzo cakuti ukokonkha. Ukocita ivi mwa cicetekelo na mwa cinthemwa, vili mwa Kristu Yesu.

¹⁴ Usunge luweme viweme vecikusungizya pokonkha Mzimu Mtuŵa akuŵa mwa sewo.

¹⁵ Uziŵa kuti wonse ŵa ku calo ca Asiya eniwutuka. Mwa aŵa muyakine ni Figelo na Helemogene.

¹⁶ Asikulu acite nayo lusungu luko ya onesifole, cikomo cakuti yeve enzonisangulusha kaŵili–kaŵili. Nipo enzocitalini nane nsoni, cukanga nenzewomangiwa na unyolo.

¹⁷ Peciyingofwika ku Roma, etatika kunisakila mpaka enifwana.

¹⁸ Asikulu amulole kuti azeapokele lusungu kwa Mulungu pa nsiku ya cipingulo. Uziŵa luweme nawe kuti eniyavya ku Aifeso.