1 Timo 1 - Chinsenga New Testament

¹ Ni newo, Paulo, nthumi ya Kristu Yesu, ngani mwecipingulila Mulungu, Mpulumushi wasu, na Kristu Yesu, cilolelo casu.

² Nulembela wewo Timoteyo, mwana wangu ngaye–ngaye mu cicetekelo. Mulungu Atata na Kristu Yesu Asikulu wasu akucitileni cisomo na lusungu, nokupani mtendele.

Acenjele na vosambizya va wenye

³ Penenzofumako ku Masedoniya nekusengani kuti musalile ku Aifeso. Kuli ŵanthu kwamene uko osambizya viyakine va cilwendo, nupangwa wewo kuti uŵaleshe.

⁴ Uŵawuzye kuti aleke kuyingoyika mtima pa visilili vopeka, na pa kufufuza kosalekezya mdandanda wa makolo. Ivi vuyingowusha mikangano tyala, vusambizyalini veciwamya Mulungu, vuziŵika pocetekela.

⁵ Colinga cangu pokupani malangizo aŵa, ni cakuti paŵe cinthemwa cofumila mu mtima utuŵa, mtima uliye kanthu kowususha.

⁶ Ŵanthu ayakine epatuka kuli ivi nosoŵa nokonkha nkhani za tyala–tyala.

⁷ Ŵeve opangwa kuŵa Asambizyi ŵa Matetulo ŵa Mulungu, vonse ivi omvwishalini vakulaŵila ŵeve ŵeka keno vakupangwa kusimikizya.

⁸ Tuziŵa kuti Matetulo ni aweme, malinga ni kuŵaseŵenzesha mwakupangwikila.

⁹ Mumvwishishe oyikalini Matetulo cikomo ca ŵanthu olungama, koma cikomo ca ŵanthu osamvwa, na osapingulika, ŵanthu wocimwa na osalambila, ngani ŵanthu opaya awusu wawo, anyina wawo keno ŵanthu ayakine.

¹⁰ Matetulo oŵayika cikomo ca ŵanthu akacenche, wocimwa na analume ayawo, oyiŵa ŵanthu, ŵa wenye, olapila va wenye, na ocita ciliconse cosushana na cisambizyo ca vyendi.

¹¹ Cisambizyo ca vyendi cala cufwanika mu Malizu Aweme olaŵila va ulemelelo wa Mulungu ocinzikiwa, wecinisungizya yeve mwine.

Otembezya Mulungu cikomo ca lusungu

¹² Nutembezya Kristu Yesu Asikulu ŵasu, enipa mphamvu pa nchito iyi. Nutembezya poniwona wocetekeleka,

¹³ cukanga kuti kale nenzocita vyongo, kutamanisha na kutafula. Koma Mulungu enicitila lusungu cikomo cakuti nenzovicita mosaziŵa, nipo nenzeve cicetekelo.

¹⁴ Asikulu Kristu Yesu enipa cisomo, cicetekelo na cinthemwa cikomo cokatizyana nawo.

¹⁵ Aŵa ni malizu osimikizyika, owamila kuŵazomelezya na mtima wonse, malizu olaŵila kuti Kristu Yesu ewela pano pansi kuti azeapulumushe ŵanthu wocimwa.

¹⁶ Koma cikomo ca ici, Mulungu enicitila lusungu, kuti mwa newo, wocimwa kopula, Kristu Yesu awoneshe kulezya mtima kwake. Epangwa kuti niŵe cisanzo ca kuŵalezyela mtima wonse ŵatiazemucetekele kuti azeapokele moyo wosasila.

¹⁷ Kwa Mfumu ya nsita zosasila, yosafwa, yosawoneka, yeve yeka niye Mulungu, kuŵe mcinzi na ulemelelo mpaka nsita zosasila. Amen.

Malizu ayakine ŵa Paulo olangiza Timoteyo

¹⁸ Wewo Timoteyo, mwana wangu nukupa malangizo aŵa molingana na vecinenela aneneli kale va wewo. Malizu aŵa akuyavye kulwa nkhondo iweme,

¹⁹ uli na cicetekelo nipo soti na mtima uliye kanthu kowususha. Ayakine aliyewumvwile mtima wawo pewenzoŵasusha, tetyo cicetekelo cawo cecenekeka.

²⁰ Mwa aŵa, muyakine ni Himenewo, muyakine Alekisandelo, ŵanthu ŵanatwala kwa Satana kuti asambile kusatafulila Mulungu.