2Alabaraɗe Də Mabərkiziti 1 - Bible en Guidar

Əzəm məlĩ na Salomoŋ ( 1:1—9:31 ) Salomoŋ assohuk maɗɗula səva Maŋgəlva, kawzəm məlyã

¹ Salomoŋ wətən Davit, ampak səwerin aka məlyã. Yawe Maŋgəlva nan asanək dəndən, akkpaŋganək ka məlĩ gagdaka.

² Yaŋ Salomoŋ apel sit ɗiy na Israyel baymeti, sit deyeɗe net ɗiy gabal gəm sit deyeɗe net ɗiy səkatə, sit mətawaŋwəna dit deyeɗe na Israyel pak gəm migil gəla.

³ Salomoŋ mbat dit ɗiyis pak addəv gəlamatuya dəssan a Gabawən, vi adaki gizlirke nalma də Maŋgəlva məs Moyis gawla na Yawe azaɓ a kapta-muyã.

⁴ An dəwəlsən akoti salala na Maŋgəlva na, Davit agəmək hã sə Kiryat-Ye'arim, aka a təki an azaɓ səni vi Davit van ampə sənək gizlirke a Yerusalem.

⁵ Ya matuya na təbəz pepreŋ məs Besalel wətən Uri, wətən Hur arkə hara na, nan tay adak aba təki nassa na Yawe a Gabawən. Adak vani Salomoŋ dit ɗiy en dəlhãnən pak addoŋ əkkaman Yawe.

⁶ Salomoŋ mbat adak aba Yawe go'o də matuya na təbəz pepreŋ məs dəsan addəv gizlirke nalma də Maŋgəlva, adə əvəl nawzla kurmbuɗuk gabal akani.

⁷ Də dəfəɗ nan na, Maŋgəlva arbanək zən aza Salomoŋ, aɓsən na: «Assohu! Mi kəŋgəl nəpsukgən di?»

⁸ Salomoŋ azlan sən Maŋgəlva na: «Kəɗɗak moggon nok diyɗa ammba afu Davit yas kəɗiwu əzəm məlĩ a gəlani.

⁹ Yaŋkəŋ na, Yawe Maŋgəlva, aɗɗa an kiynan napsən afu Davit. Vi kəɗiwək məlĩ aket ɗiy diyɗa va burɗuk naka dəlvafuŋ.

¹⁰ Avay maɗɗula gəm əsəna, ka nəsəngən ədawgit ɗiyiŋki. Vas ɓa na, naway nawɓap əzəm məlĩ aket ɗiy nokiŋ gbeŋkiŋ di?»

¹¹ Maŋgəlva aɓsən Salomoŋ na: «Adan aski dəsan a mokroko, kəssõh arya ɓa, ərəh ɓa, gagdak ɓa, may meseŋgiɗuk dəmtaŋgə ɓa, may ənziya nok egge diyɗa ɓa; maɗɗula də əsəna kəŋgələ vi kadawgit ɗiy naw məs nəɗiyuk ka məlĩ aketi.

¹² An vaski na, wakərah maɗɗula də əsəna. Mbəksa asna, wanəpsuk arya, ərəha gəm gagdaka; məlĩ tay dəsan ɗah vas də ərah daabəŋ kiyuk ɓa, tay nawsan ɗah vas dərɓogok ɓa.»

¹³ Yaŋ Salomoŋ azar səddəv gəlamatuya na Gabawən, səba gizlirke nalma də Maŋgəlva ammbat a Yerusalem. Asan əzəm məlĩ aka Israyel.

Gagdaka gəm arya na Salomoŋ

¹⁴ Salomoŋ asepetik mawteɗ nawgay dit pilseŋge. Tay dit mawteɗ nawgay gabal də səkat poɗo, məŋkoroŋ pilseŋge gabal kəlaw kiyit sula, azi a walaŋgəleɗe gugriɗ nawzi mawteɗ nawgaya gəm azan a Yerusalem.

¹⁵ Məlĩ yi dəɗɗa təbəz babar gəm meleŋge assoŋ diyɗa va gərmeŋge a Yerusalem gəm muguguleɗ na Liban diyɗa va korvoŋɗe a Bagərma.

¹⁶ Sə Eziptə gəm sə Kewe adawkinin pilseŋge na məlĩ Salomoŋ; məmanən vet na məlĩ sə Kewe adalbihini.

¹⁷ Tahəŋ əgilginin mawta nawgay taka pak sə Eziptə aka təbəz babar səkat sləre, pələs tamə, səkat də kaklaw sle'i. Vas adawgilgit sitin milyeŋge net mə Hitɗe gəm milyeŋge na Aram.

Salomoŋ tay əzaɓan wən narka gəla na Maŋgəlva

¹⁸ Salomoŋ aynanək narka gəla aka iya na Yawe, gəm gəla nawzəm məlĩ nani.