Psalmowo 59 - Biblia alo Ŋɔŋlɔ Kɔkɔe La Le Eʋegbe Me 1913

Konyifafa kple kukuɖeɖe le kpekpeɖeŋu ŋuti.

¹ Megagblẽ nu o! Dawid ƒe ɖe futamee na henɔ la, le esime Saul dɔ be, woadze aƒea ŋu, ne woawui.

² Nye Mawu, ɖem tso nye futɔwo nu, eye nakpɔ tanye tso amesiwo tso ɖe ŋunye ta si me!

³ Ɖem tso nu vlo wɔlawo si me, eye naxɔm tso hlɔmewo si me!

⁴ Elabena wode xa de nye luʋɔ ŋu; ame sesẽwo kpe ta ɖe ŋunye, menye le nye dzidada kple nye nuvɔ̃wo ta o. Yehowa!

⁵ Menye vodada ŋuti wole du dzi, eye wodzra ɖo ɖi ɖo o. Nyɔ, nava kpem, eye kpɔ nya la me!

⁶ Wò, Yehowa, Mawu Zebaot, Israel ƒe Mawu la nyɔ, eye natu fe na dukɔwo katã, megava nu vlo wɔla, siwo katã meɖia anukware o la, dome tɔa ɖeke nu o!

⁷ Wogbɔ le fiẽ le gbe tem abe avũwo ene, eye wole tsa glãla tsam le ɖua me.

⁸ Kpɔ ɖa, nya le dodom le wo nu blobloblo be: Amea ɖeke mehele esem o ɖe? Yi le woƒe nuyiwo dzi.

⁹ Ke wò, Yehowa, èle wo kom, eye nele alɔme ɖem le dukɔwo katã ŋu.

¹⁰ Nye ŋusẽ, asiwò nu kpɔm mele, elabena Mawu enye nye sitsoƒe.

¹¹ Nye Mawu ava kpem kple eƒe amenuveve, Mawu ana nye ŋku atsa le nye ketɔwo dzi.

¹² Megawu wo o, ne nye dukɔ ƒe ŋku nanɔ edzi! Tsɔ wò ŋusẽ nyã wo de gbe, eye natsɔ wo aƒu anyi, wò Aƒetɔ, mía akpexɔnu!

¹³ Woƒe nu me nuvɔ̃ enye woƒe nuyiwo ƒe i ya, eyata woalé wo le woƒe dada la me le fiƒode kple alakpa, si dona tsoa wo nu la ta.

¹⁴ Tsrɔ̃ wo le dɔmedzoe me, tsrɔ̃ wo, ne womaganɔ anyi o, eye ne woanyae be, Mawue nye dziɖula le Yakob vaseɖe anyigba ƒe mlɔenuwo! Sela.

¹⁵ Wotrɔna gbɔna le fiẽ nɔa gbe tem abe avũwo ene, henɔa tsatsam le dua me.

¹⁶ Wonɔa tsa glãla tsam le nuɖuɖu ta; eye ne womeɖi ƒo o la, wotsina dɔna.

¹⁷ Ke nye la madzi ha le wò ŋusẽ ŋu, eye le ŋdi la matso aseye ɖe wò amenuveve ŋu, elabena wòe nye nye mɔ̃ sesẽ kple sitsoƒe le nye xaxaɣi.

¹⁸ Nye ŋusẽ, wòe madzi ha na, elabena Mawu, nye amenuveve ƒe Mawu lae nye nye sitsoƒe.