Psalmowo 54 - Biblia alo Ŋɔŋlɔ Kɔkɔe La Le Eʋegbe Me 1913

Yehowa enye nye kpeɖeŋutɔ.

¹ Dawid ƒe nufiameha na kasaŋkuwo ƒe henɔ,

² le esime Ziftɔwo va gblɔ na Saul bena: Menye Dawid ye nye esi ɣla ɖe mia gbɔ oa?

³ Mawu, tsɔ wò ŋkɔ xɔ nam, eye natsɔ wò ŋusẽ tso afia nam!

⁴ Mawu, se nye gbedodoɖa, eye nalé to ɖe nye nu me nyawo ŋu!

⁵ Elabena ame tovowo tso ɖe ŋunye, eye ŋutasẽlawo le nye ku dim. Wometsɔ Mawu ɖo ŋku me o. Sela.

⁶ Kpɔ ɖa. Mawua nye xɔnametɔ, Aƒetɔ la lé nye luʋɔ ɖe asi.

⁷ Vɔ̃ la agbugbɔ ayi nye ketɔwo dzi; tsrɔ̃ wo ɖa le wò nyateƒe la nu!

⁸ Lɔlɔ̃nu faa matsɔ asa vɔ na wòe, Yehowa, makafu wò ŋkɔ, elabena enyo.

⁹ Elabena èɖem tso xaxawo katã me, eye nye ŋku atsa le nye ketɔwo dzi.