Psalmowo 53 - Biblia alo Ŋɔŋlɔ Kɔkɔe La Le Eʋegbe Me 1913

Gbedodoɖa le amegbetɔwo ƒe ɖeɖe tso gbegblẽ me ŋu.

¹ Dawid ƒe nufiameha na henɔ la, ne woadzi ɖe nublanuigbe me.

² Ahunetɔwo gblɔna le woƒe dzi me bena: Mawua ɖeke meli o! Wowɔa nu gbegblẽwo kple nu nyɔŋuwo le nu tovo wɔwɔwo me. Amea ɖeke meli, si wɔa nu nyui o.

³ Mawu ɖe ŋku ɖe amegbetɔviwo tso dziƒo, ne yeakpɔ be, amea ɖe dze nunya, eye wòbiaa Mawu ta sena hã?

⁴ Wo keŋ wote ɖe aga, wo katã tim wogblẽ. Ame ɖeka hã meli, si wɔa nu nyui o, ɖeka hɔ̃ hã meli o!

⁵ Ɖe nu vlo wɔlawo, amesiwo le nye dukɔ ɖum, abe alesi woɖua aboloe ene, eye womeyɔa Mawu o la, medze si esia oa?

⁶ Tete vɔvɔ̃ ɖo dzikatsoƒoe na wo le afisi ŋɔdzia ɖeke mele o; elabena Mawu kaka amesi ƒu asaɖa anyi ɖe ŋuwò la, ƒe ƒuwo. Ena ŋukpe lé wo, elabena Mawu gbe wo.

⁷ Oo, ɖe xɔname atso Zion eya na Israel! Ne Mawu gaɖo eƒe dukɔ te la, Yakob atso aseye, dzi adzo Israel!