Psalmowo 46 - Biblia alo Ŋɔŋlɔ Kɔkɔe La Le Eʋegbe Me 1913

Mawu enye mɔ̃ sesẽ.

¹ Korax-viwo ƒe ha na henɔ la, ne woadzi ɖe ɖetugbiwo ƒe gbe nu.

² Yehowa enye sitsoƒe kple ŋusẽ na mí, xɔnametɔ ŋutɔ wònye le xaxawo me.

³ Eyata míavɔ̃ o, nenye be, anyigba gli le enu, eye towo ʋã le atsiaƒu titina,

⁴ ne eƒe tɔwo dze agbo, eye wotso futukpɔ, eye towo ʋuʋu le eƒe nyanyrã me hã. Sela.

⁵ Tɔsisi la ƒe alɔdzewo doa dzidzɔ na Mawu ƒe du, si nye dziƒoʋitɔ ƒe nɔƒe kɔkɔe la.

⁶ Mawu le eme, maʋã o, Mawu xɔna nɛ, ne agu dze.

⁷ Dukɔwo dze agbo, ke de le fiaɖuƒewo te; enu eƒe gbe di, tete anyigba lólo.

⁸ Yehowa Zebaot li kpli mi Yakob ƒe Mawu la nye mɔ̃ sesẽ na mi! Sela.

⁹ Miva kpa Yehowa ƒe nuwɔwɔwo, amesi doa aƒedo anyigba,

¹⁰ amesi tsia aʋawɔwɔwo nu vaseɖe anyigba ƒe mlɔenu ke, eflia dati, eŋea akplɔ, eye wòtɔa dzo tasiaɖamwo!

¹¹ Midzudzɔ, ne miadze sii be, nyee nye Mawu; meɖo kpo ɖe dukɔwo dzi, meɖo kpo ɖe anyigba dzi!

¹² Yehowa Zebaot li kpli mí, Yakob ƒe Mawu la nye mɔ̃ sesẽ na mí! Sela.