Psalmowo 39 - Biblia alo Ŋɔŋlɔ Kɔkɔe La Le Eʋegbe Me 1913

Dawid bia Mawu ƒe akɔfafa.

¹ Dawid ƒe ha na henɔ Yedutun.

² Mebe: Malé ŋku ɖe nye zɔzɔme ŋu, ne nyemagawɔ nuvɔ̃ kple nye aɖe o; made ga nye nu, ŋkeke alesi ame vɔ̃ɖi la gale ŋkunye me ko.

³ Doɖoe zi le ŋunye klenee, eye mezi ɖoɖoe le dzɔgbenyuiewo ŋu, ke nye vevesesewo do gã ɖe dzi.

⁴ Nye dzi xɔ dzo ɖe dɔme nam; ne mele tame susum la, dzo la flana. Metsɔ nye aɖe le nu ƒom be:

⁵ Yehowa, na manya nye nuwuwu kple alesi nye ŋkekewo ƒe dzidzeme le; na madze si ɣesiɣi nunye ava yi!

⁶ Kpɔ ɖa, èwɔ nye ŋkekewo wonye asi ƒe kekeme, eye nye agbenɔɣi menye naneke le ŋkuwò me o. Nyateƒe, ne amegbetɔ li ke ʋuu hã la, ƒuƒu ko wònye. Sela.

⁷ Vavã, amegbetɔ le yiyim abe vɔvɔli ene, eye ƒuƒu ŋu ko wòle zi dom ɖo; eli kɔ nu gleglegle, ke menya ameka si me wole yiyi ge ɖe o.

⁸ Azɔ, Aƒetɔ, nuka sinu makpɔ? Wò ɖeɖe koe mele mɔ kpɔm na.

⁹ Ɖem tso nye dzidadawo katã me; megatsɔm wɔ alɔmeɖenu na bometsilawo o!

¹⁰ Ɖoɖoe zi le ŋunye, nyemeke nye nu o, elabena wòe wɔe.

¹¹ Ɖe wò hiãkame ɖa le ŋunye, wò asi ƒe avuwɔwɔ kplim na metsrɔ̃.

¹² Ne ètsɔ tohehe ka mo na amegbetɔa ɖe le eƒe vodada ta la, ekema eƒe nyonyo dome agblẽ, abe agbagblaʋui ye ɖui ene. Vavãe, ƒuƒu ko amegbetɔwo katã nye! Sela.

¹³ Yehowa, se nye gbedodoɖa, nye ɣlidodo nede to me na wò, eye megazi kpi kpɔ nye aɖatsiwo o, elabena amedzro menye le gbɔwò, eye amegbɔme menye abe fofonyewo katã ene.

¹⁴ Ɖe kɔ ɖa le ŋunye, ne magbɔ ɖe me, hafi mayi, eye nyemaganɔ anyi o!