Psalmowo 114 - Biblia alo Ŋɔŋlɔ Kɔkɔe La Le Eʋegbe Me 1913

Yakob ƒe Mawu ƒe nuku ŋusẽ.

¹ Esime Israel nu tso Egipte, Yakob ƒe aƒe la tso fiafialawo dome la,

² Yuda nye eƒe kɔkɔeƒe, eye Israel nye eƒe fiaɖuƒe.

³ Atsiaƒu kpɔe, eye wosi, Yordan gbugbɔ ɖe megbe;

⁴ towo ti kpo abe agbowo ene, togbɛwo abe alẽviwo ene.

⁵ Atsiaƒu, nya kae dzɔ, be nèsi, wò, Yordan, be nègbugbɔ ɖe megbe?

⁶ Mi towo, be miele kpo tim abe agbowo ene, eye mi togbɛwo abe alẽviwo ene?

⁷ Anyigba, dzidzi neƒo wò le Aƒetɔ la ŋku me, le Yakob ƒe Mawu la ŋku me;

⁸ amesi na agakpe zu tsíta, eye ahliha zu tsidzɔƒe!