Psalmowo 11 - Biblia alo Ŋɔŋlɔ Kɔkɔe La Le Eʋegbe Me 1913

Megasi o, ke boŋ xɔ Mawu dzi se.

¹ Dawid tɔ na henɔ la. Yehowae mesi tso. Aleke miele gbɔgblɔm nam be: Misi yi miaƒe towo dzi abe xevi ene?

² Elabena ame vɔ̃ɖiwo vu da me, wotsɔ woƒe aŋutrɔwo ɖo daka dzi, be yewoate amesiwo ƒe dzi toa mɔ ɖeka la, le blukɔ me.

³ Elabena wogbã gɔmeɖoɖoanyiwo ke hã, nuka ame dzɔdzɔe ate ŋu wɔ ma?

⁴ Yehowa le eƒe gbedoxɔ kɔkɔe la me, Yehowa, amesi ƒe fiazikpui le dziƒo la, ƒe ŋkuwo le ekpɔm, eƒe aɖabawo doa amegbetɔviwo kpɔna.

⁵ Yehowa doa ame dzɔdzɔe kpɔna, ke eƒe luʋɔ léa fu ame vɔ̃ɖi kple amesi lɔ̃a ŋutasẽnuwɔwɔ la.

⁶ Ana dzoka nadza ɖe ame vɔ̃ɖiwo dzi, eye dzo, aŋɔ kple ya xɔdzo anye woƒe kplu me nu.

⁷ Elabena Yehowa enye nuteƒewɔla, eye wòlɔ̃a nu dzɔdzɔe wɔwɔ; dzime dzɔdzɔe tɔwo akpɔ eƒe ŋku me.