4 Mose 34 - Biblia alo Ŋɔŋlɔ Kɔkɔe La Le Eʋegbe Me 1913

Kanaan-nyigba ƒe liƒowo.

¹ Eye Yehowa ƒo nu kple Mose bena:

² De se na Israel-viwo, eye nagblɔ na wo bena: Ne mieva Kanaan-nyigba dzi la, ekema anyigba, si anye miaƒe domenyinu la, enye si: Kanaan-nyigba kple eŋu liƒowo.

³ Miaƒe dziehekpa natso Zin-gbedzi amlo ato Edom ŋu. Ale miaƒe dzieheliƒo natso Dzeƒu la ƒe mlɔenu le ɣedzeƒe gome,

⁴ eye liƒo la naɖo ta Akrabim-to dzi mo ƒe dziehe gome ato Zin ŋu ayi ɖe Kades-Barnea ƒe dziehe gome, eye wòaɖo ta Xazar-Adar ava ke ɖe Azmon.

⁵ Eye liƒo la nanyè kpo tso Azmon ɖe Egipte-tɔʋu la ŋu ava wu nu ɖe ƒu la nu.

⁶ Miaƒe ɣetoɖoƒeliƒo nanye ƒu gã la; eya nado liƒo na mi le ɣetoɖoƒe gome.

⁷ Miaɖe anyieheliƒo la tso ƒu gã la nu ato Hor-to la ŋu.

⁸ Miaɖee tso Hor-to la gbɔ aɖo ta Xamat, eye liƒo la naɖe Zedad.

⁹ Liƒo la nato Zifron ava wu nu ɖe Xazar-Enan. Esia nanye anyieheliƒo na mi.

¹⁰ Miaɖe ɣedzeƒeliƒo la tso Xazar-Enan ayi Sefam.

¹¹ Eye liƒo la natso Sefam ato Ribla le Ain ƒe ɣedzeƒe gome, eye liƒo la nazɔ Kineret-ta ƒe ɣedzeƒekpa ŋu.

¹² Eye liƒo la nazɔ Yordan ŋu axa wu nu ɖe Dzeƒu la nu.

¹³ Eve Mose de se na Israel-viwo bena Esia nye anyigba, si dzi woadzidze nu ɖo amã na mi la; anyigba si ŋu Yehowa ɖe se le be, woatsɔ na to asieke kple afã la.

¹⁴ Elabena Ruben-viwo ƒe to kple Gad-viwo ƒe to kpakple Manase ƒe to atã la xɔ woƒe domenyinu ɖe wo tofowo ƒe aƒewo nu xoxo.

¹⁵ To eve kple afã xɔ woƒe domenyinu ɖe Yordan ƒe go keme dzi le Yerixo kasa le ɣedzeƒe gome.

Alesi woama anyigba la mee.

¹⁶ Eye Yehowa ƒo nu kple Mose bena:

¹⁷ Ŋutsu, siwo amã anyigba la na mi, ƒe ŋkɔwo nye si: Nunɔla Eleazar kple Yosua, Nun vi.

¹⁸ Eye miade amegã ɖekaɖeka le to sia to me, bena woamã anyigba la.

¹⁹ Ŋutsuawo ƒe ŋkɔwo nye si: Kaleb, Yefune vi, tso Yuda-to la me,

²⁰ Semuel, Amihud vi, tso Simeon-viwo ƒe to la me;

²¹ Elidad, Kislon vi, tso Benyamin-to la me;

²² amegã Buki, Yogli vi, tso Dan-viwo ƒe to la me.

²³ Yosef-viwo tɔwo nye si: Amegã Xaniel, Efod vi, tso Manase viwo ƒe to la me,

²⁴ kple amegã Kemuel, Siftan vi, tso Efrayim-viwo ƒe to la me

²⁵ Amegã Elizafan, Parnax vi, tso Zebulon-viwo ƒe to la me,

²⁶ amegã Paltiel, Asan vi, tso Isaxar-viwo ƒe to la me;

²⁷ amegã Axihud, Selomi vi, tso Aser-viwo ƒe to la me,

²⁸ kple amegã Pehadel, Amihud vi, tso Naftali-viwo ƒe to la me.

²⁹ Esiawo nye amesiwo Yehowa de se na bena, woamã domenyinu la na Israel-viwo le Kanaan-nyigba dzi.