3 Mose 3 - Biblia alo Ŋɔŋlɔ Kɔkɔe La Le Eʋegbe Me 1913

Akpedavɔsa ŋu se.

¹ Ne ebe, yeatsɔ nyi asa akpedavɔe la, ekema wòatsɔ esi sɔ blibo, eɖanye atsu alo nɔ o, asa vɔ lae na Yehowa.

² Eye wòatsɔ eƒe asi aɖo eƒe vɔsalã la ƒe tame, eye woawui le Mawu ƒe agbadɔ la nu; emegbe Aron viŋutsu, siwo nye nunɔlawo, natsɔ ʋu la ahlẽ ɖe vɔsamlekpui la ŋu godoo ava kpe.

³ Nusiwo wòaɖe le akpedavɔsa la ŋu asa dzovɔ na Yehowa, wonye: Ami, si tsyɔ dɔmenuawo dzi kple ami, siwo katã le dɔmenuawo ŋu,

⁴ ayiku eveawo kple wo ŋu mi, siwo ku ɖe ali la ŋu kpakple aklã ŋu miawo; ayikuawo ŋu wòaɖe wo le.

⁵ Eye Aron viŋutsuwo nato dzo wo le vɔsamlekpui la dzi kpakple numevɔsa, si le nake, siwo te wodo dzo ɖo la dzi, dzovɔsa, si ʋẽna lilili ɖe Yehowa wònye.

⁶ Nenye alẽ wòbe, yeatsɔ asa akpedavɔ na Yehowa la, ekema wòatsɔ esi sɔ blibo, eɖanye atsu alo nɔ o, asa vɔ lae.

⁷ Nenye alẽvi wotsɔ be, yeasa vɔ lae la, ekema wòakplɔe ava Yehowa ŋku me,

⁸ eye wòatsɔ eƒe asi aɖo eƒe vɔsalã la ƒe tame, eye wòawui le Mawu ƒe agbadɔ la nu; emegbe Aron viŋutsuwo natsɔ ʋu la ahlẽ ɖe vɔsamlekpui la ŋu godoo ava kpe.

⁹ Nusiwo wòaɖe le akpedavɔsa la ŋu asa dzovɔ na Yehowa, wonye: Lã la ƒe ami, asike la kple eŋu nuwo, wòaɖee ɖe aligoe la nu; ami, si tsyɔ dɔmenuawo dzi kple ami, siwo katã le dɔmenuawo ŋu,

¹⁰ ayiku eveawo kple wo ŋu mi, siwo ku ɖe ali la ŋu kpakple aklã ŋu miawo; ayikuawo ŋu wòaɖe wo le.

¹¹ Eye nunɔla natɔ dzo wo le vɔsamlekpui la dzi, dzovɔsanuɖuɖu wònye na Yehowa.

¹² Nenye gbɔ wòbe, yeatsɔ asa vɔ lae la, ekema wòakplɔe ava Yehowa ŋku me,

¹³ eye wòatsɔ eƒe asi aɖo eƒe tame, eye woawui le Mawu ƒe agbadɔ la ŋgɔ; emegbe Aron viŋutsuwo natsɔ eƒe ʋu ahlẽ ɖe vɔsamlekpui la ŋu godoo ava kpe.

¹⁴ Eyome wòaɖe nusiawo le eƒe vɔsalã la ŋu, asa dzovɔe na Yehowa: Ami, si tsyɔ dɔmenuawo dzi kple ami, siwo katã le dɔmenuawo ŋu;

¹⁵ ayiku eveawo kple wo ŋu mi, siwo ku ɖe ali la nu kpakple aklã ŋu miawo; ayikuawo ŋu wòaɖe wo le.

¹⁶ Eye nunɔla natɔ dzo wo le vɔsamlekpui la dzi, dzovɔsanuɖuɖu, si ʋẽna lilili wònye. Amiawo katã Yehowa tɔe.

¹⁷ Ɖoɖo mavɔ wòanye na miaƒe dzidzimeviwo le mia nɔƒewo katã. Miekpɔ mɔ aɖu lã ƒe ami alo ʋua ɖeke o.