3 Mose 18 - Biblia alo Ŋɔŋlɔ Kɔkɔe La Le Eʋegbe Me 1913

Ʋu ɖeka me tsolawu nagaɖe wo nɔewo o. Nuvɔ̃ vlo bubuwo.

¹ Eye Yehowa ƒo nu kple Mose bena:

² Ƒo nu kple Israel-viwo, eye nagblɔ na wo bena: Nyee nye Yehowa, mia Mawu.

³ Migawɔ Egipte-nyigba, si dzi mienɔ la, dzinɔlawo ƒe nuwɔnawo o, eye migawɔ Kanaan-nyigba, si dzi mekplɔ mi yinae la, dzitɔwo ƒe nuwɔnawo o, eye migawɔ woƒe ɖoɖowo dzi hã o.

⁴ Miwɔ nye sewo dzi, eye milé ŋku ɖe nye ɖoɖowo ŋu, ne miawo wo dzi. Nyee nye Yehowa, mia Mawu!

⁵ Eyata milé ŋku ɖe nye ɖoɖowo kple sewo ŋu, elabena woana amesi woa wo dzi la, nanɔ agbe. Nyee nye Yehowa.

⁶ Amea ɖeke megamlɔ eƒe ƒometɔ kekeake gbɔ ade asi eŋu o. Nyee nye Yehowa.

⁷ Megaɖe ama fofowò o, eye megade asi dawo ŋu o; dawò wònye, eyata megade asi eŋu o.

⁸ Megade asi fofowò srɔ̃ ŋu o, elabena eƒe ama nye fofowò tɔ.

⁹ Megaɖe asi nɔviwònyɔnu, fofowò vinyɔnu alo dawò vinyɔnu, si wodzi ɖe aƒe alo ɖe afi bubu la ŋu o.

¹⁰ Megaɖe asi viwòŋutsu ƒe vinyɔnu alo viwònyɔnu ƒe vinyɔnu ŋu o, elabena wò ŋutɔ wò ama wònye.

¹¹ Megaɖe asi fofowò srɔ̃ ƒe vinyɔnu ŋu o, elabena wò ŋutɔ fofowòe dzii, eye nɔviwònyɔnu hãe wònye.

¹² Megade asi fofowò nɔvinyɔnu ŋu o, elabena eya kple fofowòe dzɔ tso dɔ ɖeka me.

¹³ Megade asi dawò nɔvinyɔnu ŋu o, elabena eya kple dawòe dzɔ tso ɖɔ ɖeka me.

¹⁴ Megaɖe ama fofowò nɔviŋutsu o, eye megamlɔ srɔ̃ gbɔ hã o, elabena dawòɖiae.

¹⁵ Megaɖe asi viwòŋutsu srɔ̃ ŋu o; wò ŋutɔ viwò srɔ̃e; megaɖe amae o.

¹⁶ Megade asi nɔviwòŋutsu srɔ̃ ŋu o, elabena nɔviwòŋutsu ƒe amae.

¹⁷ Megaɖe asi nyɔnua ɖeke kple vianyɔnu siaa ŋu o, eye megaɖe asi viaŋutsu ƒe vinyɔnu kple vianyɔnu ƒe vinyɔnu ŋu o, elabena ƒometɔ kekeakewo wonye; ŋukpenanu wònye.

¹⁸ Ne srɔ̃wò le agbe la, megaɖe nɔvianyɔnu kpe ɖe eŋu o, eye megaɖe asi eŋu hã o, bena nagadɔ atsusidzre o.

¹⁹ Ne nyɔnua ɖe kpɔ dzinu la, megamlɔ egbɔ ade asi eŋu o.

²⁰ Megaɖe asi hawòvi srɔ̃ ŋu, bena nado ŋunyɔ ɖokuiwò o.

²¹ Megatsɔ viwò sa vɔe na Molex o, bena nagaƒo ɖi Yehowa, wò Mawu ƒe ŋkɔ o. Nyee nye Yehowa.

²² Megadɔ ŋutsu gbɔ abe nyɔnu gbɔ ene o, ŋunyɔnu wònye.

²³ Megade asi lã ŋu ahado ŋunyɔ ɖokuiwò o, eye nyɔnua ɖeke megana lã nayɔ asii o, ŋukpenanu vɔ̃ɖi wònye.

²⁴ Migawɔ nusiawo atsɔ ado ŋunyɔ mia ɖokui o, elabena trɔ̃subɔla, siwo nyã ge mala le mia ŋgɔ la, wɔ nusiawo heɖo ŋunyɔ wo ɖokui,

²⁵ eye woƒe anyigba gblẽ; eyata maɖo woƒe vodadawo teƒe na wo, eye anyigba la atu edzinɔlawo aƒu gbe.

²⁶ Milé ŋku ɖe nye ɖoɖoawo kple seawo ŋu, eye migawɔ ŋunyɔnu siawo dometɔa ɖeke o, eɖanye duamevi alo amedzrovi, si le mia dome la o;

²⁷ elabena anyigbadzitɔ, siwo nɔ mia ŋgɔ la, wɔ ŋunyɔnu siawo katã, eye anyigba la gblẽ;

²⁸ ne anyigba la nagatu miawo hã aƒu gbe, le esi miegblẽe ta, abe alesi wòtu dukɔ, si nɔ mia ŋgɔ la, ƒu gbe ene o.

²⁹ Ne amea ɖe wɔ ŋunyɔnu siawo dometɔa ɖe la, woatsrɔ̃ amesi wɔe la ɖa le eƒe dukɔ la dome.

³⁰ Eyata milé ŋku ɖe nye ɖoɖoawo ŋu, bena miagawɔ kɔnu gbegblẽ, siwo wowɔ le mia ŋgɔ la, ahado ŋunyɔ mia ɖokui o Nyee Yehowa, mia Mawu!