2 Mose 17 - Biblia alo Ŋɔŋlɔ Kɔkɔe La Le Eʋegbe Me 1913

Tsi do go tso kpe gbadza me na Israel-viwo.

¹ Eye Israel-viwo ƒe ha blibo la ho tso Sin-gbedzi hele teƒeleƒewo tom, abe alesi Yehowa de se ene, eye woƒu asaɖa anyi ɖe Refidim. Ke tsia ɖeke meli be, dukɔ la nano o.

² Tete dukɔ la wɔ dzre kple Mose, eye wogblɔ bena: Mina tsi mi miano! Mose ɖo ŋu na wo bena: Nukaŋuti miele dzre wum kplim? Nukaŋuti miele Yehowa tem kpɔ?

³ Eye tsikɔ wu dukɔ la le afima. Eye dukɔ la ti Mose ŋu gblɔ bena: Nukaŋuti nèkplɔ mí tso Egipte, bena tsikɔ nawu mia ŋutɔwo, mía viwo kple míaƒe lãwo míaku mahã?

⁴ Tete Mose do ɣli yɔ Yehowa bena: Nuka mawɔ na dukɔ sia? Esusɔ vie ko woafɔ kpe aƒum!

⁵ Yehowa gblɔ na Mose bena: Dze dukɔ la ŋgɔ, eye naɖe ame tsitsia ɖewo le Israel dome akpe ɖe ɖokuiwò ŋu, eye natsɔ atikplɔ, si netsɔ ƒo Nil dzi la, ɖe asi yii.

⁶ Kpɔ ɖa, matsi tre ɖe ŋkuwò me ɖe Horeb-kpe la dzi, eye naƒo kpe la, ekema tsi ado atso me, be dukɔ la nano. Eye Mose wɔ nenema le Israel-me tsitsiawo ƒe ŋku me.

⁷ Eye wona ŋkɔ teƒe la bena: Masa kple Meriba. Elabena Israel-viwo wɔ dzre, eye wote Yehowa kpɔ gblɔ bena: Ɖe Yehowa le mía dome loo, alo meli o?

Israel-viwo ɖu Amalekitɔwo dzi.

⁸ Esia megbe Amalekitɔwo va wɔ aʋa kple Israel le Refidim.

⁹ Tete Mose gblɔ na Yosua bena: Tia ŋutsuwo kpe ɖe ŋuwò, eye nayi aɖawɔ aʋa kple Amalek etsɔ; ke nye la maɖatsi tre ɖe togbe la tame, eye male Mawu ƒe atikplɔ la ɖe asi.

¹⁰ Eye Yosua wɔ, abe alesi Mose gblɔ nɛ ene be, wòaɖawɔ aʋa kple Amalek. Ke Mose, Aron kple Xur woyi togbe la tame.

¹¹ Eye ne Mose kɔ eƒe asi dzi la, ekema Israel ƒe alɔ ɖea dzi; ke ne eɖiɖi asi ɖe anyi la, ekema Amalek ƒe alɔ ɖea dzi.

¹² Ke esi alɔ ku ɖe Mose ŋu la, wotsɔ kpe ɖe ete wòbɔbɔ nɔ edzi. Eye Aron kple Xur lé eƒe asiwò ɖe dzi; ame ɖeka le axa ɖeka, eye ame evelia le axa bubu dzi Ale wole eƒe asiwò de te, vaseɖe esime ɣe ɖo to.

¹³ Eye Yosua ɖu Amalek kple eƒe aʋakɔ dzi kple yi.

¹⁴ Eve Yehowa gblɔ na Mose bena: Ŋlɔ nusia ɖe agbalẽ me hena ŋkuɖoɖo dzi, eye nakui ɖe Yosua ƒe to me, elabena matsrɔ̃ Amalek ƒe ŋkɔ ɖa le dziƒoa te keŋkeŋ.

¹⁵ Eye Mose ɖi vɔsamlekpui, eye wòna ŋkɔe be: Yehowa nye aflaga.

¹⁶ Eye wogblɔ bena: Meta Yehowa ƒe zikpui Yehowa ewo aʋa kple Amalek tegbetegbe.