1 Samuel 31 - Biblia alo Ŋɔŋlɔ Kɔkɔe La Le Eʋegbe Me 1913

Saul kple viawo ƒe tsɔtsrɔ̃.

¹ Eye Filistitɔwo wɔ aʋa kple Israel, eye Israel-ŋutsuwo si le Filistitɔwo nu, eye amewo tsi aʋa le Gilboa-to la dzi.

² Filistitɔwo ɖe Saul kple viaŋutsuwo ɖe nu, eye wowu Saul viŋutsuwo, siwo nye Yonatan, Abinadab kple Malkisua.

³ Aʋa la nu sẽ ŋutɔ ɖe Saul dzi, eye esi aŋutrɔdalawo va tui la, vɔvɔ̃ ɖoe ŋutɔ le aŋutrɔdalawo ŋu.

⁴ Eye Saul gblɔ na eƒe adekplɔvi la bena: Di wò yi naƒo ɖem, ne bolotɔ siawo magava ƒo nu ɖem awɔ funyafunyam o! Ke eƒe adekplɔvi la melɔ̃ o, elabena ele vɔvɔ̃m ŋutɔ. Tete Saul tsɔ eƒe yi, eye wòdze enu.

⁵ Ke esi Saul ƒe adekplɔvi la kpɔ be, eku la, eya hã tso eƒe yi dze enu, eye woku kplii.

⁶ Ale Saul kple viaŋutsu etɔ̃awo kple eƒe adekplɔvi la kpakple eƒe amewo katã ku gbe ɖeka enye si.

⁷ Esi Israel-ŋutsu, siwo le bali la ƒe go keme kple Yordan ƒe go keme dzi, kpɔ bena, Israel-ŋutsuwo si, eye Saul kple viaŋutsuwo ku la, wogblẽ woƒe duwo ɖi hesi, eye Filistitɔwo va nɔ wo me.

⁸ Esi ŋu ke la. Filistitɔwo va nu ɖe ge le ame tsiaʋawo ŋu, eye wokpɔ Saul kple viaŋutsu etɔ̃awo le Gilboa-to la dzi.

⁹ Tete wotso ɖa le enu, eye woɖe eŋutinuwo ɖo ɖe Filistitɔwo ƒe anyigba dzi godoo, ne woaɖe gbe ƒãe le woƒe trɔ̃wo ƒe me kpakple le dukɔ la dome.

¹⁰ Wotsɔ eƒe ŋutinuawo va da ɖe Astartewo ƒe me, eye wotsɔ eƒe kukua ku gli ŋu le Bet-San.

¹¹ Ke esi: Yabes-Gileadtɔwo se nusi Filistitɔwo wɔ Saul la,

¹² tete ŋutsu kalẽtɔwo dze mɔ zɔ zã blibo la ɖaɖe Saul kple viaŋutsuwo ƒe kukuawo le gli ŋu le Bet-San, eye wova Yabes hetɔ dzo wo le afima.

¹³ Eye wotsɔ woƒe ƒuwo ɖi ɖe baniti te le Yabes, eye wotsi nu dɔ ŋkeke adre.