1 Samuel 3 - Biblia alo Ŋɔŋlɔ Kɔkɔe La Le Eʋegbe Me 1913

Mawu ƒo nu kple Samuel, eye wobui abe Aƒetɔ la ƒe nyagblɔla nyateƒetɔ ene.

¹ Eye Samuel ɖevi la subɔ Yehowa le Eli gbɔ. Ɣemaɣi la Yehowa meƒoa nu enuenu o, eye ŋutega kpɔkpɔ mebɔ o.

² Eva me gbe ɖeka bena, Eli mlɔ emlɔƒe; eƒe ŋkuwo le tsitsim, eye megale nu kpɔm o,

³ womekpɔ tsi Mawu ƒe akaɖiawo haɖe o, eye Samuel mlɔ Yehowa ƒe gbedoxɔ me, afisi Mawu ƒe aɖaka la le.

⁴ Tete Yehowa yɔ Samuel, eye wòtɔ gblɔ bena Nyee nye si!

⁵ Enumake wòƒu du yi Eli gbɔ gblɔ bena; Nyee nye si, elabena eyɔm. Ke eɖo ŋu bena: Nyemeyɔ wò o, gbugbɔ yi ɖamlɔ anyi! Eye wòyi ɖamlɔ anyi.

⁶ Ke Yehowa gayɔ Samuel. Tete Samuel fɔ yi Eli gbɔ gblɔ bena: Nyee nye si, elabena eyɔm. Eɖo ŋu bena: Vinye, nyemeyɔ wò o, gbugbɔ yi ɖamlɔ anyi!

⁷ Samuel menya Yehowa haɖe o, eye Yehowa meɖe eƒe nya fiae haɖe o.

⁸ Yehowa gayɔ Samuel zi etɔ̃lia, enumake wòfɔ yi Eli gbɔ gblɔ bena: Nyee nye si, elabena eyɔm. Tete Eli dze sii bena, Yehowae le ɖevi la yɔm.

⁹ Eye Eli gblɔ na Samuel bena: Yi ɖamlɔ anyi, ne wogayɔ wò la, ekema gblɔ bena: Ƒo nu, Yehowa! Wò dɔla ke to ɖi. Eye Samuel yi ɖamlɔ emlɔƒe.

¹⁰ Tete Yehowa va tsi tre ɖi, eye wòyɔe abe tsã ene bena: Samuel! Samuel! Eye Samuel gblɔ bena: Ƒo nu, wò dɔla ke to ɖi!

¹¹ Tete Yehowa gblɔ na Samuel bena: Kpɔ ɖa, mele nane wɔ ge le Israel, eye amesiame, si asee la, ƒe toawo kple eve me aɖi yeŋ!

¹² Gbemagbe mana nusiwo katã megblɔ ɖe Eli ƒe aƒe ŋu la, nava me; madze egɔme, eye mawu enu.

¹³ Megblɔ nɛ be, mahe to na eƒe aƒe la kokoko le eƒe vodada ta, elabena enyae bena, viawo wo busunu gake megbe na wo o.

¹⁴ Eyata meka atam ɖe Eli ƒe aƒe la ŋu bena: Womatsɔ vɔsalã alo nuɖuvɔsa alé avu ɖe Eli ƒe aƒe la ƒe vodada nu akpɔ o!

¹⁵ Eye Samuel mlɔ anyi, vaseɖe esi ŋu ke, eye woʋu Yehowa ƒe xɔ la ƒe ʋɔtru. Ke Samuel le ŋutega la gbɔgblɔ na Eli vɔ̃m.

¹⁶ Tete Eli yɔ Samuel bena: Vinye Samuel! Etɔ bena: Nyee nye si!

¹⁷ Eye wògblɔ bena: Nya ka wogblɔ na wò? Megaɣla naneke ɖem o! Ne èɣla nusi wògblɔ na wò la ɖe ɖem la, ekema Mawu afia wò agafia wò ɖe edzi!

¹⁸ Tete Samuel gblɔ wo katã ne, eye meɣla ɖeke ɖee o. Eye wòɖo ŋu bena: Yehowae, newɔ nusi dze eŋu ko!

¹⁹ Samuel va tsi, eye Yehowa nɔ kplii, eye mena nyaa ɖeke to le nya, siwo wògblɔ la me o.

²⁰ Eye Israel blibo la tso Dan vaseɖe Beerseba nyae bena, Yehowa bu Samuel nyateƒetɔe, eye wòɖoe nyagblɔɖilae.

²¹ Eye Yehowa gade asi eɖokuiɖeɖefia me le Silo, elabena Yehowa ɖe eɖokui fia Samuel le Silo to Yehowa ƒe nya la me.