1 Mose 16 - Biblia alo Ŋɔŋlɔ Kɔkɔe La Le Eʋegbe Me 1913

Abram ɖe Hagar.

¹ Eye Abram srɔ̃ Sarai medzi vi nɛ kpɔ o. Ke Egipte-nyɔnua ɖe, si woyɔna be Hagar la, nye eƒe kosi.

² Eye Sarai gblɔ na Abram bena: Kpɔ ɖa, Yehowa xe nye vidzidɔ, eyata dɔ kple nye kosi la, ɖewohĩ maxɔ mamayɔvi mahĩ? Eye Abram ɖo to Sarai ƒe gbe.

³ Le Abram ƒe Kanaan-nyigba dzi nɔnɔ ƒe ewo megbe la, Sarai, Abram srɔ̃, tsɔ eƒe kosi, Egipte-nyɔnu Hagar, na srɔ̃a Abram wòɖe.

⁴ Eye wòdɔ kple Hagar, eye wòtɔ fu. Ke esi wòkpɔ bena, yefɔ fu la, eva eƒe aƒenɔ kpɔ ge ɖe ƒomevii.

⁵ Eye Sarai gblɔ na Abram bena: Nu manyomanyo, si teƒe kpɔm mele la, etso gbɔwò. Nye ŋutɔ metsɔ nye kosi na wò; ke azɔ esi wòkpɔ bena, yefɔ fu ko la, eva kpɔ ye ge ɖe ƒomevii. Yehowa nadrɔ̃ ʋɔnu le mía kpli wò dome!

⁶ Tete Abram gblɔ na Sarai bena: Kpɔ ɖa, wò kosi la le asiwò me, wɔ nusianu, si nyo ŋuwò la, ɖo eŋu faa! Tete Sarai bɔbɔe ɖe anyi; eyata wòsi le egbɔ.

Hagar si, eye wògatrɔ gbɔ. Hagar dzi Ismael.

⁷ Ke Yehowa ƒe dɔla kpɔe le tsivudoa ɖe, si le gbe dzi le Sur-mɔ dzi la to.

⁸ Eye wògblɔ nɛ bena; Hagar, Sarai ƒe kosi, afika nètso, eye afika néyina? Eɖo ŋu bena: Ɖe mesi le nye aƒenɔ Sarai gbɔ.

⁹ Eye Yehowa ƒe ɖɔla la gblɔ nɛ bena: Trɔ yi wò aƒenɔ gbɔ, eye nabɔbɔ ɖokuiwò ɖe ete!

¹⁰ Eye Yehowa ƒe dɔla la gblɔ nɛ bena: Mawɔ wò dzidzimeviwo nasɔ gbɔ ŋutɔ, ale bena le woƒe agbɔsɔsɔ ta womate ŋu axlẽ wo o.

¹¹ Yehowa ƒe dɔla la gagblɔ nɛ bena: Kpɔ ɖa, èfɔ fu, eye àdzi ŋutsuvi, eye nayɔ eƒe ŋkɔ bena Ismael; elabena Yehowa se wò konyi, si nèfa le wò fukpekpe la ŋuti

¹² Awɔ nu abe lu ene, akɔ asi dzi ɖe amesiame ŋu, eye amesiame akɔ asi dzi ɖe eya hã ŋu, eye wòatigi nɔvia wo katã ɖo.

¹³ Tete wòyɔ Yehowa, amesi ƒo nu kplii la ƒe ŋkɔ bena: Wòe nye Mawu nusianu kpɔla! Elabena egblɔ bena: Alo menye amesi le kpɔyem la yome mekpɔ ɖa vava oa?

¹⁴ Eyata woyɔ vudo ma bena: Agbetɔ, si le kpɔyem la ƒe vudo; ele Kades kple Bared dome.

¹⁵ Eye Hagar dzi ŋutsuvi na Abram, eye Abram tsɔ ŋkɔ na ŋutsuvi, si Hagar dzi nɛ la, be Ismael.

¹⁶ Abram xɔ ƒe blanyi vɔ ade, esime Hagar dzi Ismael nɛ.